તમારા કામનું / બાળકના શિક્ષણથી લઈને લગ્ન માટે બૅન્કમાં હશે પૈસા: જાણો PPF, NSC અને સુકન્યામાંથી કઈ સ્કીમ છે સારી

• PPF પર મળી રહ્યું છે 7.1% વ્યાજ 
• રોકાણ પર લોન લેવાની પણ સુવિધા 
• કોઈ પણ બેન્ક કે પોસ્ટમાં ખોલાવી શકાય ખાતુ 

રોકાણ કરવા માટે યોગ્ય વિકલ્પ પસંદ કરવો ખૂબ જ મહત્વનું છે. કારણ કે તેની સીધી અસર તમારા ફાઈનાન્શિયલ ગોલ પર પડે છે. એવામાં જરૂરી છે કે રોકાણ પહેલા બજારમાં રહેલા દરેક વિકલ્પોને જોવામાં આવે. તેમાં મળતા રિટર્ન અને રિસ્ક જેવા ફેક્ટર્સની તપાસ કરવી જોઈએ. જો તમારૂ રોકાણ જરૂરના હિસાબથી થશે તો ગોલ સુધી પહોંચવામાં સરળતા રહેશે. 

આજે અમે તમને ત્રણ સરકારી યોજનાઓ પબ્લિક પ્રોવિડન્ટ ફંડ, નેશનલ સેવિંગ્સ સર્ટિફિકેટ અને સુકન્યા સમૃદ્ધિ યોજના વિશે જણાવી રહ્યા છીએ. તમારા પોર્ટફોલિયોમાં આ યોજનાઓનો સમાવેશ કરીને, તમે તમારા વિવિધ નાણાકીય લક્ષ્યોને પૂર્ણ કરી શકો છો. આ તમામ યોજનાઓના પોતાના ફાયદા છે, તેથી કઈ યોજના વધુ સારી છે તે તમારા લક્ષ્ય પર આધારિત છે.

પબ્લિક પ્રોવિડન્ટ ફંડ (PPF)
પબ્લિક પ્રોવિડન્ટ ફંડ (PPF) યોજના લોન્ગ ટર્મ ઈન્વેસ્ટમેન્ટ ઓપ્શન છે. હાલમાં આ યોજના હેઠળ 7.1% વાર્ષિક વ્યાજ આપવામાં આવે છે. આમાં રોકાણ કરીને તમે સરળતાથી 1 કરોડથી વધુનું ફંડ બનાવી શકો છો. આમાં તમને જે રિટર્ન મળે છે તે સંપૂર્ણપણે ટેક્સ ફ્રી છે. I-T એક્ટની કલમ 80C હેઠળ વર્ષ દરમિયાન જમા કરવામાં આવેલી રકમનો પણ ડિડક્શન તરીકે ક્લેમ કરી શકાય છે.

આ યોજનામાં લઘુત્તમ રોકાણની રકમ રૂ. 500 છે અને મહત્તમ રોકાણની રકમ વાર્ષિક રૂ. 1.5 લાખ છે. PPF ખાતું 15 વર્ષમાં મેચ્યોર થાય છે. જો કે, તેને મેચ્યોરિટીના એક વર્ષ પહેલા 5-5 વર્ષ માટે લંબાવી શકાય છે. એટલે કે તમે આ સ્કીમમાં કુલ 25 વર્ષ માટે રોકાણ કરી શકો છો. તમે 15, 20 કે 25 વર્ષ પછી તમારા પૈસા ઉપાડી શકો છો. આ યોજના તમને ગેરેન્ટેડ રિસ્ક ફ્રી રિટર્નની ખાતરી આપે છે.

નેશનલ સેવિંગ્સ સર્ટિફિકેટ (NSC)
પોસ્ટ ઓફિસ નેશનલ સેવિંગ્સ સર્ટિફિકેટ (NSC) સ્કીમમાં વાર્ષિક 6.8% વળતર આપે છે. NSCમાં કરેલા રોકાણને પણ આવકવેરા કાયદાની કલમ 80C હેઠળ રૂ. 1.5 લાખ સુધીની છૂટ મળે છે. તમારે આ સ્કીમમાં ઓછામાં ઓછા 1000 રૂપિયાનું રોકાણ કરવું પડશે. તમે NSCમાં ગમે તેટલી રકમનું રોકાણ કરી શકો છો. આમાં રોકાણની કોઈ મહત્તમ મર્યાદા નથી. NSCનો લોક ઇન પીરિયડ 5 વર્ષનો છે.

આ યોજનામાં બાળકના નામે ખાતું પણ ખોલાવી શકાય છે. જો બાળકની ઉંમર 10 વર્ષથી ઓછી હોય તો માતાપિતા વતી તેના નામે ખાતું ખોલાવી શકાય છે. 10 વર્ષની ઉંમરે બાળક પોતાનું ખાતું ચલાવી શકે છે. જ્યારે પુખ્ત વયે પહોંચે છે ત્યારે તેને ખાતાની સંપૂર્ણ જવાબદારી મળે છે. જો તમે આ સ્કીમમાં પૈસા રોકો છો તો પૈસા ડબલ થવામાં 10 વર્ષ 6 મહિનાનો સમય લાગશે.

સુકન્યા સમૃદ્ધિ યોજના (SSY)
સુકન્યા સમૃદ્ધિ યોજના એ છોકરીના સુરક્ષિત ભવિષ્ય માટે ખૂબ જ સારી સરકારી યોજના છે. તમે તેમાં 0 થી 10 વર્ષની દીકરીના નામે જ્યાં સુધી તે 14 વર્ષની ન થાય ત્યાં સુધી રોકાણ કરી શકો છો. હાલમાં આ યોજનામાં રોકાણ પર વાર્ષિક 7.6% વ્યાજ મળે છે. જ્યારે પુત્રી 21 વર્ષની થશે ત્યારે તમને વ્યાજ સાથે રકમ પરત મળી જશે. SSY ખાતું ઓછામાં ઓછા રૂ. 250 સાથે ખોલી શકાય છે અને મહત્તમ મર્યાદા રૂ. 1.5 લાખ પ્રતિ વર્ષ છે.

આ એકાઉન્ટ એક પરિવારમાં વધુમાં વધુ બે છોકરીઓ માટે ખોલાવી શકાય છે. જોડિયા અથવા ત્રણ બાળકીઓના જન્મના કિસ્સામાં, બે કરતાં વધુ ખાતા ખોલી શકાય છે. આમાં ખાતું ખોલવા માટે બાળકીનું જન્મ પ્રમાણપત્ર આપવું જરૂરી છે. આ સ્કીમ બેંક કે પોસ્ટ ઓફિસમાં ગમે ત્યાં ખોલી શકાય છે. આમાં મળતું રિટર્ન ફિક્સ છે અને રોકાણ અને મેચ્યોરિટી બંનેમાં ટેક્સ બેનેફિટ્સ પણ મળે છે.