ખેડાના નગરા ગામ નજીક કંપનીમાં તોડફોડ થઇ હતી. ગ્રામજનોએ કસ્ટમ એન્ડ એનવાયર્નમેન્ટ કંપનીમાં તોડફોડ કરી હતી. પ્રદૂષણ ફેલાવાના કારણે ગ્રામજનો વિરોધ કરી રહ્યા હતાં. રોષે ભરાયેલા લાકોએ 2 બાઈક અને 3 કાર સહિત 7 થી વધુ વાહનોની તોડફોડ કરવામાં આવી છે.
આ ઘટના અંગેની જાણ નજીકના ફાયરમથકમાં કરવામાં આવતા ફાયર બ્રિગેડના જવાનો ફાયર ફાયટર સાથે આવી પહોંચ્યા હતા અને સળગતા વાહનો પર પાણીનો મારો ચલાવ્યો હતો. જો કે વાતાવરણ વધુ ગંભીર બનતા જિલ્લા પોલીસનો કાફલો પણ ઘટનાસ્થળે આવી પહોંચ્યો હતો. અને કંપનીને જોડતા રસ્તાઓ પોલીસે કોર્ડન કર્યા હતાં. જો કે નગરામાં ગ્રામજનો શાંતિપૂર્ણ રીતે વિરોધ કરી રહ્યાં હતાં પરંતુ તંત્ર દ્વારા યોગ્ય કામગીરી ન કરાતા ગ્રામજનો રોષે ભરાયા હતાં.
ઉલ્લેખનીય છે કે આ ખેડાના નગરા ગામના ગ્રામજનોએ એક સ્થાનિક કંપનીમાંથી નિકળતા ધુમાડાને કારણે વાતાવરણમાં પ્રદૂષણનો વધારો થાય છે તેવી રજૂઆત તંત્રને વારંવાર કરી હતી. પરંતુ તંત્રએ આંખ આડા કાન કરતા આજરોજ ઉગ્ર થયેલ ગ્રામજનોએ કંપનીમાં હલ્લાબોલ કર્યું હતું અને કેટલાક વાહનોને આગચંપી પણ કરી હતી.