કર્ણાટક વિધાનસભામાં વિજય મળ્યા બાદ કોંગ્રેસ અને અન્ય વિપક્ષોમાં નવા શ્વાસ પુરાયા છે. આ જુસ્સા સાથે વિપક્ષ 2019માં મોદીનો વિજય રથ રોકવાનો પ્રયાસ કરશે અને તેને લઈને વિપક્ષોએ ફોર્મ્યુલા તૈયાર કરી દીધી છે. આ ફોર્મ્યુલા અંતર્ગત દેશમાં 13 રાજ્યોના 15 પક્ષ ભેગા મળીને 429 લોકસભા બેઠકો પર મોદી-શાહને ભીંસમાં લેવાનો પ્રયાસ કરશે.જો કે તે એટલું સરળ નહીં રહે કારણ કે 20 રાજ્યોમાં ભાજપનો ઝંડો લહેરાઈ રહ્યો છે ત્યારે તેના ગઢમાં ગાબડું પાડવા વિપક્ષો ભેગા થયા છે. શું વિપક્ષો આ વિજયરથને રોકી શકશે...? તે તો આવનારો સમય જ કહેશે.
ઉલ્લેખનીય છે કે કર્ણાટક ચૂંટણીનાં પરિણામો પછી 21માં રાજ્યમાં ભાજપ સરકાર બનાવવાની તૈયારી કરી લીધી હતી અને 3 દિવસ માટે પોતાના સીએમને પણ બેસાડી દીધા હતા. પરંતુ ફ્લોર ટેસ્ટ પહેલા જ ફિયાસ્કો થતાં ભાજપને હારનો સામનો કરવો પડયો હતો અને જેડીએસ અને કોંગ્રેસે ગઠબંધન કરીને સરકાર બનાવી લીધી.
આ જીત બાદ તમામ વિપક્ષોમાં નવો જોમ ઉમેરાયો છે. ભાજપના વિજય રથને રોકવા માટે તમામ વિપક્ષ ભાજપ સામે મેદાને આવ્યા છે અને એકમંચ પરથી 2019માં મોદી શાહને જવાબ આપવા માટેની તૈયારી દર્શાવી છે. આ શપથ સમારોહમાં ભાજપ સામે તમામ વિપક્ષના નેતાઓએ શકિતપ્રદર્શન કર્યું હતું. 2014માં નરેન્દ્ર મોદીની સરકારને ભારે બહુમતિ મળી હતી.
ખાસ કરીને તેમને યુપીમાં વધારે બેઠકો મળી હતી.હવે ભાજપની સરકારને યૂપીમાં માયાવતી રાહુલ અને અખિલેશનું ગઠબંધન ગ્રહણ લગાવી શકે છે. ત્યારે હવે મોદી સરકાર માટે 2019ની ચૂંટણીમાં કણરા ચઢાણ હશે.
આપને જણાવી દઇએ કે 2019માં મોદી-શાહ દ્વારા સમગ્ર દેશમાં ભાજપનો ભગવો લહેરાય તે માટે અત્યારથી જ તડામાર તૈયારીઓ શરૂ કરી દેવાઈ છે તેને લઈને ભાજપ અનેક નિર્ણય કરી રહી છે. પશ્ચિમ બંગાળમાં ભાજપ સામે કોંગ્રેસ તૃણમુલ કોંગ્રેસ અને લેફ્ટ એક સાથે મળીને ટકકર આપવાના છે ત્યારે બિહારમાં પણ રાજદ અને કોંગ્રેસ હાથ મિલાવીને ભાજપને પડકારશે. આમ તમામ મોટા રાજ્યોમાં સ્થાનિક પાર્ટીઓ સાથે રાહુલ ગાંધી હાથ મિલાવવાના છે જેથી મોદી સરકારની મુશ્કેલી વધશે.
આ ઉપરાંત વાત કરીએ તો ભાજપની સત્તાવાળા રાજ્યો જેવાકે પૂર્વોતરના આસામમાં કોંગ્રેસ નાની પાર્ટીઓ સાથે ગઠબંધન કરવાના છે.ઓડિશા કર્ણાટક ઝારખંડમાં પણ કોંગ્રેસ આ જ નુસ્ખો અપનાવવાનો છે.આમ તમામ વિપક્ષો આજે દેશભરમાં એકતા બતાવી છે અને ભાજપને 2019માં રોકવાનું મન બનાવી લીધું છે. હવે જોવાનું એ છે કે મોદી અને શાહ આ રણનીતિ સામે શું પ્લાન તૈયાર કરશે.