- કપિલ હાલ પોતાની ટીમ સાથે વિદેશ પ્રવાસની મજા માણી રહ્યો છે
- કપિલે 2015 માં વિદેશમાં 6 શો કરવાનો કોન્ટ્રાક્ટ કર્યો હતો
- પૈસા અગાઉથી ચૂકવી આપવામાં આવ્યા છે, અને હજુ પરત કર્યા નથી
કપિલ પર કોન્ટ્રાક્ટ પૂર્ણ ન કરવાનો કેસ
બધા લોકોનો ફેવરિટ અને ટીવીના સૌથી સફળ કોમેડિયનમાંથી એક કપિલ શર્મા કાનૂની ગુંચવણમાં ફસાઈ ગયો છે. કપિલ આ દિવસોમાં કેનેડાના પ્રવાસે છે જ્યાં તેની સાથે તેની ટીમ પણ હાજર છે. હવે કેનેડા પ્રવાસની વચ્ચે કપિલ શર્મા સામે ફરિયાદ દાખલ કરવામાં આવી છે. અભિનેતા પર કોન્ટ્રાક્ટ પૂર્ણ ન કરવાનો આરોપ છે. આ મામલો તાજેતરનો નહી પરંતુ ભૂતકાળનો છે આ વર્ષ 2015ની વાત છે.
પૈસા હજુ પરત કાર્ય નથી
રીપોર્ટના જણાવ્યા અનુસાર Sai USA Inc એ કપિલ સામે ફરિયાદ નોંધાવી છે. 2015માં કપિલે નોર્થ અમેરિકામાં કેટલાક શો માટે એક કોન્ટ્રાક્ટ સાઈન કર્યો હતો જે તેણે પૂરો કર્યો નથી. અમેરિકાના જાણીતા શો પ્રમોટર અમિત જેટલીએ કહ્યું કે, "કપિલે 6 શો કરવા માટે એક કોન્ટ્રાક્ટ સાઈન કર્યો હતો, જેના માટે પેમેન્ટ પણ કરવામાં આવ્યું હતું, પરંતુ કપિલે તેમાંથી એક પણ શો કર્યો નથી. કોમેડિયને વાયદો કર્યો હતો કે તે તેમના પૈસા ચૂકવી દેશે, પરંતુ કપિલે એવું પણ કર્યું નહીં. તેણે ન તો પ્રદર્શન કર્યું કે ન તો કોઈ પણ વસ્તુનો જવાબ આપ્યો. કોર્ટમાં જતાં પહેલાં તેણે કપિલ સાથે ઘણી વાર વાત કરવાનો પ્રયત્ન કર્યો હતો, પરંતુ થઇ શક્યો નહીં."
ન્યૂયોર્ક કોર્ટમાં ચાલશે કેસ
જેટલીએ કહ્યું કે, આ મામલો હજુ ન્યૂયોર્ક કોર્ટમાં છે અને કપિલ સામે કાયદાકીય કાર્યવાહી જરૂરથી કરશે. તમને જણાવી દઈએ કે કપિલ શર્મા ગત મહિનાથી કેનેડાના પ્રવાસે છે. હાલમાં જ તેણે વેનકુવરમાં પરફોર્મ કર્યું હતું જ્યાં તેની સાથે કૃષ્ણા અભિષેક, રાજીવ ઠાકુર, ચંદન, કીકુ શારદા અને સુમોના ચક્રવર્તી પણ હતા. સમગ્ર ટીમ હાલ ટોરેન્ટોમાં છે.
