જામનગર / વાહ... જનપ્રતિનિધિ હોય તો આવા! મહિલા કોર્પોરેટરે આ રીતે એક ઝાટકે લોકોની સમસ્યાનો લાવી દીધો હલ

• મકાનોની સરખામણીએ રોડ ઊંચાઈવાળો હોવાથી રહેવાસીઓને અનેક સમસ્યા
• મહિલા કોર્પોરેટર રચનાબેન નંદાણિયાએ આક્રામક રીતે કરી રજૂઆત
• લાંબી રજૂઆતના અંતે તંત્રએ નમતું જોખ્યું હતું અને જરૂરી કામગીરી શરૂ કરી

જામનગરના નવાગામ(ઘેડ) વિસ્તારમાં રહેણાંક મકાનથી ઉંચા કરાયેલા રોડના કામ સામે સ્થાનિક લોકોની નારાજગી જોવા મળી હતી. નગર સેવિકાની આગેવાનીમાં સ્થાનિકોએ થાળી વગાડી વિરોધ પ્રદર્શન કર્યો હતો. જનતાના પ્રશ્ને જામનગર ઘેડ વિસ્તારના ભાજપના મહિલા કોર્પોરેટર રચનાબેન નંદાણિયાએ આક્રમક રીતે રજૂઆત કરી હતી. 

વોર્ડ નંબર 4 દ્રારકેશ સોસાયટીમાં રહેણાંક મકાનથી ઉંચા કરાયેલા રોડ મુદ્દે રજૂઆત કરી હતી. વારંવાર રજૂઆત બાદ કોઈ પગલા નહીં લેવાતા રોષ વ્યક્ત કર્યો હતો. ત્યારબાદ રજૂઆત માટે મ્યુનિ. કમિશનર સમક્ષ પહોંચ્યા હતાં. જ્યાં આક્રમક રજૂઆત કરવામાં આવી હતી. આ વિરોધ પર્દશનમાં મોટી સંખ્યામાં મહિલાઓ કમિશનરે કચેરીએ પહોંચી હતી. મહિલાઓ સાથે કેટલાક બાળકો પણ જોવા મળ્યા હતા. ત્યારબાદ લાંબી રજૂઆતના અંતે તંત્રએ નમતું જોખ્યું હતું અને જરૂરી કામગીરી શરૂ કરી હતી.

એક વર્ષ અગાઉ પણ રચનાબેને કમિશનરની ચેમ્બરમાં લાકડી લઇને પહોંચ્યા હતા

અત્રે ઉલ્લેખનીય છે કે, એક વર્ષ અગાઉ પણ જામનગરનાં તળાવની પાળ વિસ્તારમાં રેકડી અને પાથરણાંવાળા નાના ધંધાર્થીઓને જગ્યા રોકાણ વિભાગ દ્વારા હેરાન-પરેશાન કરવામાં આવતા હોવાની ફરિયાદ બાદ ભાજપના કોર્પોરેટર રચનાબેન નંદાણિયાએ રણચંડીનું રૂપ ધારણ કરી કમિશનરની ચેમ્બરમાં લાકડીઓ વિંઝતા સનસનાટી મચી ગઈ હતી. આ સાથે જ તેમણે કહ્યું હતું કે હું પોલીસથી પણ ડરતી નથી.