રથ યાત્રા / ભગવાનનું આજે મામેરુઃ મંગળવારે મામાના ઘરેથી આવશે પરત

આજે ભગવાનના મોસાળ સરસપુરમાં ઉત્સાહ-ઉમંગનો માહોલ છે અને મામેરાનો પ્રસંગ ધામધૂમથી ઉજવાઇ રહ્યો છે. આજે ભગવાનના તમામ શણગાર સાથેનું મામેરું ભક્તોને સાંજના ચાર વાગ્યા પછી જોવા મળશે. મામેરુ કરવા ઇચ્છતા ભક્તોનું વેઇટિંગ લિસ્ટ અત્યારે ૧૮ વર્ષનું છે.

 હવે બે દિવસ પછી પુન: વિગ્રહ સ્થાપિત થશે ત્યારે આ નિમિત્તે મહામંડલેશ્વર મહંત દિલીપદાસજી મહારાજની નિશ્રામાં 'નેત્રોત્સવવિધિ' સંપન્ન થશે. ભગવાન પખવાડિયા બાદ નિજ મંદિરે આવતા હોઈ તેની ખુશાલીમાં સાધુ-સંતોનો ભંડારો પણ યોજાશે, જે પરંપરાગત રીતે 'કાળી રોટી (માલપૂઆ) અને ધોળી દાળ (દૂધપાક)'નો બનશે.
 

ઉલ્લેખનીય છે કે નિજ મંદિરે 'નેત્રોત્સવવિધિ'ની પૂર્વસંધ્યાએ ભક્તો મોટી સંખ્યામાં ઊમટી પડશે. ૧૪રમી રથયાત્રાનો પ્રારંભ તા.૪  જુલાઈ ને ગુરુવારે સવારના ૭ વાગ્યે નિજ મંદિરથી થશે. ભંડારાના દિવસે આ વખતે મોટી સંખ્યામાં સાધુ-સંતો આવશે. આ ઉપરાંત જગનાથજી મંદિરના ભંડારા તથા રથયાત્રામાં ભાગ લેવા માટે ૨,૫૦૦ જેટલા સાધુ-સંતો ગુજરાત-સૌરાષ્ટ્ર ઉપરાંત હરિદ્વાર, અયોધ્યા, વૃંદાવન, નાશિક, ઉજ્જૈન, જગન્નાથપુરી સહિતનાં સ્થાનોએથી પધારશે.
 

તા.ર જુલાઈના રોજ સવારના ૮ વાગ્યે ભગવાન જગન્નાથજી, બહેન સુભદ્રાજી અને ભાઈ બળદેવજીનો ગર્ભગૃહમાં પ્રવેશ થશે અને વૈદિક મંત્રોચ્ચાર દ્વારા વિશિષ્ટ પૂજનવિધિ સાથે ભગવાનની આંખે પાટો બાંધવાની વિધિ કે જેને નેત્રોત્સવવિધિ તરીકે ઓળખવામાં આવે છે તેનો પ્રારંભ થશે. 

ત્યારબાદ સવારના ૯ વાગ્યે ધ્વજારોહણ કરવામાં આવશે અને વિશિષ્ટ પૂજા તથા આરતી સવારના ૯.૪૫ વાગ્યે થશે, જેમાં મુખ્ય અતિથિ તરીકે રાજ્યપાલ ઓમપ્રકાશ કોહલી ઉપસ્થિત રહેશે, જ્યારે અતિથિવિશેષ તરીકે મેયર બીજલબહેન પટેલ ઉપસ્થિત રહેશે. સવારના ૧૧.૩૦ વાગ્યે સાધુ-સંતો માટેનો ભંડારો યોજાશે તથા સંતોનું સન્માન પણ કરાશે, જેના મુખ્ય અતિથિ તરીકે પ્રદેશ ભાજપ અધ્યક્ષ જીતુભાઈ વાઘાણી ઉપસ્થિત રહેશે.