રાજ્ય સરકારે લાખો યુવાનોની કારકિર્દી પર પાણી ફેરવ્યું આઉટસોર્સિંગ પદ્ધતિમાં કટકી

ગાંધીનગરઃ યુવાનોને રોજગાર આપવાના ઠાલા વચનો આપીને ગુજરાત સરકારે છેલ્લાં એક દશકામાં બેરોજગાર યુવાનોની ઘોર ખોદી નાખી છે. પહેલાં ફિક્સ પગાર અને બાદમાં કરાર પછી આઉટસોર્સિંગની સિસ્ટમ દાખલ કરીને સરકારી નોકરીઓમાં યુવાનોની કારકિર્દી સાથે ગંભીર ચેડા કર્યા છે. 

આઉટ સોર્સિંગ દ્વારા હાલ મળતિયાઓના ખિસ્સા ભરાઈ રહ્યાં છે. તો આ આઉટસોર્સિંગમાં કટકીની રકમ ગણવામાં આવે તો વર્ષે દહાડે રૂ. 900 કરોડની કટકી થઈ છે. થોડા સમય અગાઉ વિધાનસભાના સત્રમાં સરકારી તંત્રમાં આઉટસોર્સિંગનો મુદ્દો ચર્ચાનો વિષય બન્યો હતો. વર્ગ-3ની જગ્યામાં પણ આ સિસ્ટમ દાખલ કરવામાં આવી હતી. 

તો હવે આગળ વર્ગ-2માં પણ આ સિસ્ટમ દાખલ કરવાની વિચારણા ચાલી રહી છે. ગ્રામ વિકાસ એજન્સીઓ જેવી સંસ્થાઓમાં તો વર્ગ-2ની જગ્યાના ચાર્જ આવા કર્મચારીઓ પાસે હોવાના અનેક દાખલા છે. રાજ્યની મેડિકલ કોલેજ આરોગ્ય વિભાગ શિક્ષણ પાણી-પુરવઠા માર્ગ અને મકાન વિભાગ ખેતીવાડી મહેસૂલ જિલ્લા અને તાલુકા પંચાયતો પાલિકા વિવિધ બોર્ડ અને નિગમોમાં હાલ હજારો જગ્યા ખાલી હોવા છતા બેરોજગાર યુવાનોની ભરતી કરવામાં આવતી નથી. 

આવા વિભાગોમાં આઉટસોર્સિંગથી કર્મચારીઓ પૂરા પાડવા એજન્સીઓને કોન્ટ્રાક્ટ સોંપી દેવાયા છે. રાજ્યમાં આવા કર્મચારીઓ અંગે લડત લડાવતા સંગઠનોનુ માનીએ તો ગુજરાતમાં સાત લાખથી વધુ યુવાનોનું આઉટસોર્સિંગથી શોષણ થઈ રહ્યું છે. તો સરકારના મળતિયાઓનું કારસ્તાન હોય એવું લાગી રહ્યું છે. 

સરકારી અધિકારીઓ અને કેટલાંક રાજકીય આગેવાનોની આ એજન્સીઓ હોવાનું પણ ચર્ચાઈ રહ્યું છે. જો આવું જ ચાલશે તો નજીકના વર્ષોમાં આખી સરકાર આઉટસોર્સિંગથી ચાલતી હોય એવું પણ બની શકે છે.