વિવાદ / ફેસબુક આઇફોન યુઝર્સની જાસુસી કરવા માગતું હતું: ઇઝરાયલના NSO ગ્રુપના આક્ષેપથી હોબાળો; ફેસબુકે કર્યો વળતો પ્રહાર

આ દસ્તાવેજોમાં વધુમાં જણાવાયું છે કે 2017માં, ફેસબુકના બે અધિકારીઓએ ઇઝરાઇલના NSO જૂથ સાથે ટ્રેકિંગના મુદ્દે વાતચીત કરી હતી. બીજી તરફ, એક મીડિયા રિપોર્ટમાં ખુલાસો થયો છે કે ફેસબુક જે  એપલના ડિવાઇસ ટ્રેક કરાવા માગતું હતું તેમાં આઇફોન અને આઈપેડનો સમાવેશ થતો હતો. 

કોર્ટમાં રજૂ કરાયેલા દસ્તાવેજો અનુસાર, NSO ગ્રુપના CEO શાલેવ હુલિઓએ જણાવ્યું હતું કે, 2017 માં ફેસબુકના બે અધિકારીઓ અમારી પાસે આવ્યા હતા અને સોફ્ટવેર પેગાસસ ખરીદવાની તૈયારી બતાવી હતી. પેગાસસ એ જ સોફટવેર છે જેના દ્વારા ભારત સહિત વિશ્વભરના અગ્રણી લોકોના વોટ્સએપ એકાઉન્ટ હેક કરાયા હતા. ફેસબુકે હેકિંગ માટે NSO પર દોષનો ટોપલો નાખ્યો હતો.કોર્ટમાં રજૂ કરાયેલા દસ્તાવેજો અનુસાર, વાસ્તવમાં ફેસબુક કંપની ખુદ એવા આઇફોન યુઝર્સની જાસૂસી કરવા માંગતી હતી. જેમણે onavo એપ્લિકેશન ઇન્સ્ટોલ કરી હતી. 

ઓનાવો એપ્લિકેશન સ્પાયવેર સાથેની એક VPN એપ્લિકેશન છે, જેને 2018 માં એપ સ્ટોરથી દૂર કરવામાં આવી હતી. રિપોર્ટમાં એમ પણ કહેવામાં આવ્યું છે કે ફેસબુકે આ માટે NSO ગ્રુપને માસિક ચાર્જ ચુકવવાની પણ ઓફર કરી હતી.  જોકે, ફેસબુકે આ તમામ દાવાને ફગાવી દઇને કહ્યું છે કે NSO હાલના વોટ્સએપ હેકિંગ કેસથી કોર્ટનું ધ્યાન હટાવવા માંગે છે.