અલગ અલગ વીમા કંપનીઓ અલગ અલગ રીતે હેલ્થ ઈન્શ્યોરન્સ પ્રોડક્ટ ઓફર કરે છે. દરેક પ્રોડક્ટના અલગ અલગ ફાયદા હોય છે અને તેની અલગ અલગ શરતો હોય છે, તેના કારણે ગ્રાહકોને પડતી મુશ્કેલીઓ દૂર કરવા માટે વીમા નિયામક ઇરડાએ તમામ વીમા કંપનીઓને એક લાખથી પાંચ લાખ રૂપિયા સુધીની સ્ટાન્ડર્ડ ઇન્ડિવિડ્યુઅલ હેલ્થ ઇન્સ્યોરન્સ ઉપલબ્ધ કરાવવા જણાવ્યું છે.
ઇરડાએ ગાઇડલાઇન્સ જારી કરી
તમામ વીમા કંપની સ્ટાન્ડર્ડ હેલ્થ ઈન્સ્યોરન્સ પોલિસી ઓફર કરેઃ ઈરડા
આ પ્રોડક્ટનું નામ આરોગ્ય સંજીવની પોલિસી હશે
ઇરડાએ આ બાબતમાં ગાઇડલાઇન્સ જારી કરી છે. ઇરડાએ જણાવ્યું છે કે હેલ્થ ઇન્સ્યોરન્સ માર્કેટમાં ઇન્ડિવિડ્યુઅલ પોલિસીની જુદી જુદી પ્રોડક્ટ ઉપલબ્ધ છે. દરેક પ્રોડક્ટના ફીચર્સ અલગ હોય છે, જેના કારણે યોગ્ય પ્રોડક્ટ પસંદ કરવામાં લોકોને મુશ્કેલી પડે છે. આથી ઓથોરિટીએ તમામ જનરલ અને હેલ્થ ઇન્યોરન્સ કંપની માટે ફરજિયાત કરી દીધું છે કે તેઓ સ્ટાન્ડર્ડ ઇન્ડિવિડ્યુઅલ પ્રોડક્ટ તૈયાર કરીને ગ્રાહકને ઓફર કરે.
આ પ્રોડક્ટનું નામ આરોગ્ય સંજીવની પોલિસી હશે
ઈરડાએ જણાવ્યું છે કે, આ પ્રોડક્ટનું નામ આરોગ્ય સંજીવની પોલિસી હશે. ત્યાર બાદ કંપની તેમાં પોતાનું નામ જોડી શકે છે. દસ્તાવેજમાં આ સિવાય અન્ય કોઇ નામનો ઉલ્લેખ થવો જોઇએ નહીં. આ પ્રોડક્ટ ગ્રાહકોને બેઝિક હેલ્થ સાથે સંકળાયેલી જરૂરિયાતોને કવરેજ આપશે. આ પોલિસી હેઠળ મહત્તમ પાંચ લાખ રૂપિયા અને લઘુતમ રૂ. એક લાખનું કવરેજ મળશે.
આ સ્ટાન્ડર્ડ પ્રોડક્ટમાં ફરજિયાત રીતે આધારભૂત તબીબી જરૂરિયાતનું કવરેજ હશે
આ સ્ટાન્ડર્ડ પ્રોડક્ટમાં ફરજિયાત રીતે આધારભૂત તબીબી જરૂરિયાતનું કવરેજ હશે. તેમાં કોઇ પણ પ્રકારના એડ-ઓન કે વૈકલ્પિક કવરેજની ઓફર કરવામાં આવશે નહીં. કંપનીઓ ઇરડાની ગાઇડલાઇન્સના દાયરામાં રહીને સૂચિત કવરેજના આધારે આ સ્ટાન્ડર્ડ પ્રોડક્ટની કિંમત નક્કી કરી શકશે. તેમાં હોસ્પિટલમાં દાખલ થવાનો ખર્ચ, અમુક મર્યાદા સુધી મોતિયાનાં ઓપરેશનનો ખર્ચ, કોઇ બીમારી કે ઇજાના કારણે જરૂરી પ્લાસ્ટિક સર્જરી અથવા ડેન્ટલ ટ્રીટમેન્ટનો ખર્ચ, તમામ પ્રકાર ડે કેર ટ્રીટમેન્ટ અને રૂ. બે હજારની મહત્તમ મર્યાદામાં એમ્બ્યુલન્સ ચાર્જનો સમાવેશ થશે.