સનરાઇઝર્સ હૈદરાબાદે પોતાના ટોચના બેટિંગ ક્રમના દમ પર ગઈ કાલે દિલ્હી કેપિટલ્સ સામે બે વિકેટે ૨૧૯ રન ખડક્યા.
આ સિઝનમાં તેમનો અત્યાર સુધીનો સૌથી મોટો અને બધી ટીમો વચ્ચે કુલ ચોથો સૌથી મોટો સ્કોર હતો. આ દરમિયાન કેપ્ટન ડેવિડ વોર્નર અને ઋદ્ધિમાન સાહાના નિશાન પર કાગિસો રબાડા રહ્યો.
રબાડાએ ચાર ઓવરમાં ૫૪ રન ખર્ચી નાખ્યા અને એક પણ વિકેટ ઝડપી શક્યો નહીં. રબાડા સાથે આવું ત્રણ વર્ષ અને ૧૧૭ દિવસ બાદ બન્યું.ગઈ કાલની મેચમાં રબાડાની પાછલાં ત્રણ વર્ષમાં સૌથી ખર્ચાળ બોલિંગ રહી. રોમાંચક વાત એ છે કે છેલ્લી ૨૫ આઇપીએલ મેચમાં તે સતત વિકેટ ઝડપી રહ્યો હતો, પરંતુ ગઈ કાલે તેનો આ શાનદાર રેકોર્ડ ધ્વસ્ત થઈ ગયો અને તેને એક પણ વિકેટ મળી નહીં.
વર્તમાન સિઝનમાં પણ સૌથી વધુ વિકેટ ઝડપનારો બોલર પણ રબાડા જ છે. હાલ તેના નામે ૨૩ વિકેટ નોંધાયેલી છે. આઈપીએલમાં પણ રબાડાનો રેકોર્ડ શાનદાર છે. તેણે ૩૦ મેચમાં ૫૪ વિકેટ ઝડપી છે. એક ઇનિંગ્સમાં ૨૧ રન આપીને ચાર વિકેટ લેનાર રબાડાનું આઈપીએલમાં સર્વશ્રેષ્ઠ પ્રદર્શન છે. અગાઉ ૨૦૧૭માં રબાડાએ સનરાઇઝર્સ સામે જ ચાર ઓવરમાં ૫૯ રન આપ્યા છતાં એક પણ વિકેટ ઝડપી નહોતી.