સીક્રેટ / આખરે કેમ એપલે iPhone 11ની ડિઝાઇન લીક મામલે પોલીસને દૂર રાખી?

સેમસંગ, એપલ, હુઆવે કે પછી ગુગલના ફલેગશીપ ફોનની ડિઝાઇન અને ફિચર્સ હવે તો ફોન લોન્ચ થાય તેના મહિનાઓ પહેલા લીક થઇ જાય છે.  કંપનીઓ તમામ તકેદારી રાખે છે તેમ છતાં સિક્રેટ રહેતું નથી. ઓગસ્ટમાં લોન્ચ થનારા સેમસંગના નોટ 11 સપ્ટેમ્બરમાં આવી રહેલા આઇફોન 11 અને ઓકટોબરમાં લોન્ચ થનારા ગુગલના પિકસેલ 4ની ડિઝાઇન લીક થઇ ગઇ છે અને વધુને વધુ વિગતો હજુ લીક થઇ ગઇ છે. 

ચીનના એપલના એસેમ્બલી પ્લાન્ટમાંથી કોઇ કર્મચારીએ આઇફોન 11 ની ડિઝાઇન લીક કરી હતી. એપલે તેની ભાળ પણ મેળવી લીધી છે. જોકે એપલે તેની સામે પોલીસ ફરીયાદ કે કોઇ કાનુની કાર્યવાહી કરી નથી. એપલે નવી પ્રોડકટ સિકયુરિટી ટીમ બનાવી છે. જેનું કામ તેના તમામ કર્મચારીઓ પ્રોડકટસની ગુપ્તતા જાળવે અને કોઇ પણ માહિતી લીક ન થાય તે જોવાનું છે.

આઇફોન 11ની ડિઝાઇન ઓનલાઇન લીક થયા બાદ તરત જ આ ટીમ એકશનમાં આવી હતી અને માહિતી લીક કરનાર સુધી પહોંચી ગઇ હતી. જોકે એપલે આખા મામલામાં પોલીસને દુર રાખી.  તેનું કારણ એ છે કે એપલે એ સાબિત કરવું પડે કે જે ડિઝાઇન લીક થઇ છે તે સાચી છે. તેના માટે કંપનીએ તૈયાર કરેલી ડિઝાઇન પણ આપવી પડે અને તે પણ ચીનની પોલીસને. વળી એપલ પોલીસ કેસ કરે એટલે એ વાત પણ કન્ફર્મ થઇ જાય કે લીક થયેલી ડિઝાઇન સાચી છે. 

ટેક વર્લ્ડમાં ચાલતી ચર્ચા મુજબ એપલે આખુ ઓપરેશન સિક્રેટલી પાર પાડયું હતું. જેથી લીક થયેલી કહેવાતી આઇફોન 11ની ડિઝાઇન કોઇએ કલ્પનાના આધારે તૈયાર કરી છે અને માત્ર અફવા છે તેવી ધારણા અને શંકા પણ આઇફોન પ્રેમીઓમાં ચાલતી રહે. માત્ર એપલ જ નહીં અન્ય કંપનીઓ પણ આવા લીકસ સામે કાયદાકીય પગલા આ જ કારણથી લેતી નથી. ગુગલના પીકસેલ 3 એકસએલનું તો આખું કન્સાઇન્મેન્ટ ચોરાયુ હતુ અને બ્લેકમાર્કેટમાં ફોન તેના લોન્ચીંગના બે-ત્રણ મહિના પહેલા વેચાયા હતા. તેમ છતાં ગુગલે પણ ચુપ રહેવાનું યોગ્ય સમજયું હતું.