મુંબઈ: ઈંગ્લિશ પ્રીમિયર લીગ ચેમ્પિયન માન્ચેસ્ટર સિટીની માલિકીની કંપની સિટી ફૂટબોલ ગ્રૂપ (CFG)એ ઇન્ડિયન સુપર લીગ (ISL)ની ફ્રેંચાઇઝી મુંબઈ સિટી એફસીનો 65 ટકા હિસ્સો ખરીદી લીધો છે. આ અંગેની જાહેરાત CFGના મુખ્ય કાર્યકારી અધિકારી ફેરાન સોરિયાનો અને ફૂટબોલ સ્પોર્ટ્સ ડેવલપમેન્ટ લિમિટેડ એન્ડ રિલાયન્સ ફાઉન્ડેશનનાં પ્રેસિડેન્ટ નીતા અંબાણીએ કરી.
CFGના મુખ્ય અધિકારી ફેરાન સોરિયા અને નીતા અંબાણીએ કરી જાહેરાત
માન્ચેસ્ટર સિટીએ મુંબઈ સિટીનો 65 ટકા હિસ્સો ખરીદી લીધો
પહેલી વાર કોઈ યુરોપિયન ક્લબ ભારતીય ક્લબની ભાગીદાર બની છે
આ પ્રસંગે નીતા અંબાણીએ જણાવ્યું, ''આ એક ઐતિહાસિક પ્રસંગ છે. ભારતીય ફૂટબોલે જે સિદ્ધિઓ હાંસલ કરી છે તેનો આ જશ્ન છે. મને સંપૂર્ણ વિશ્વાસ છે કે મુંબઈ સિટી એફસીને ભારતીય ફૂટબોલને આ ઐતિહાસિક ભાગીદારીનો ફાયદો મળશે.'' ઉલ્લેખનીય છે કે નીતા અંબાણીની IPL ટીમ મુંબઈ ઇન્ડિયન્સ પણ છે, જે અત્યાર સુધીમાં સૌથી વધુ ચાર વાર IPLનો ખિતાબ જીતી
ચૂકી છે.
મુંબઈ સિટી એફસીનું ઘરેલુ મેદાન 8000ની ક્ષમતાવાળું મુંબઈ ફૂટબોલ એરિના છે. ISLની છઠ્ઠી સિઝનમાં ટીમ અત્યાર સુધીમાં પાંચ મેચ રમી ચૂકી છે. સોરિયાનોએ જણાવ્યું, ''માન્ચેસ્ટર સિટીના સ્પેનિશ મેનેજર પેપ ગોડિયોલા મુંબઈ સિટી એફસીના મેનેજરના સંપર્કમાં રહેશે. આ સાથે જ પહેલી વાર કોઈ યુરોપિયન ક્લબ ભારતીય ક્લબની ભાગીદાર બની છે.''
હવે મુંબઈ સિટી એફસીને વ્યવસાયી અને ફૂટબોલની જાણકારીઓનો ફાયદો મળશે. આ સાથે જ ક્લબની પહોંચ સીએફજી ગ્લોબલ પ્લેટફોર્મ સુધી હશે. સિટી ફૂટબોલ ગ્રૂપ માન્ચેસ્ટર સિટીના માલિકીપણા માટે જાણીતું છે. આ ગ્રૂપ પાસે અન્ય ફૂટબોલ ક્લબમાં યુએસની ન્યૂયોર્ક સિટી, ઓસ્ટ્રેલિયાની મેલબોર્ન સિટી એફસી, જાપાનની યોકોહામા એફ મેરિનો, ઉરુગ્વેની ક્લબ એટલેટિકો ટોર્ક, સ્પેનની ગિરોના એફસી અને ચીનની સિચુઆન જિઉનિઉ એફસી સામેલ છે.
સિટી ફૂટબોલ ક્લબ એટલે કે CFGનાં દુનિયાભરમાં 13 કાર્યાલય અને આઠ ફૂટબોલ ક્લબ છે. CFGની સ્થાપના માર્ચ-2013માં થઈ હતી. તેની આઠ ક્લબમાં 1500થી વધુ ફૂટબોલ ખેલાડી છે, જે દર વર્ષે લગભગ 2500થી વધુ મેચ રમે છે. આમ, કેટલાક ભારતીય ખેલાડીઓને પણ આગળ વધવાની તક મળશે