કોરોનાની રસીને લઇને ભારત હંમેશા મદદ માટે તત્પર રહ્યું છે. પાડોશી દેશ અફઘાનિસ્તાનની પણ અવારનવાર મદદ કરી છે ત્યારે હવે ફરી કાબુલની હોસ્પિટલને કોવેક્સિનના 5 લાખ ડોઝ આપ્યા હતા.
અફઘાનિસ્તાનની મદદે આવ્યુ ભારત
કોવેક્સિનના 5 લાખ ડોઝ મોકલ્યા કાબુલ
અફઘાનિસ્તાનને ભૂખમરાથી બચાવવા ભારત મદદે
ભારત સરકાર અફઘાનિસ્તાનના લોકોની મદદ માટે પ્રતિબદ્ધ છે. ભારત થોડા દિવસો બાદ અફઘાનિસ્તાનને કોવેક્સિનના વધુ પાંચ લાખ ડોઝ મોકલશે. ગરીબી, ભૂખમરો અને બેરોજગારી સામે ઝઝૂમી રહેલા અફઘાનિસ્તાનમાં જીવનનિર્વાહ કરવો મુશ્કેલ બન્યો છે. તેવામાં દેશમાં લોકોને કોરોનાનો નવો વેરિએન્ટ ઓમીક્રોનથી બચવુ મુશ્કેલ લાગી રહ્યુ છે. આવા કપરા સમયમાં પાકિસ્તાન કે ચીન નહી પરંતુ ભારત અફઘાનિસ્તાનની મદદે આવ્યુ છે. ભારત તરફથી કાબુલની ઇન્દિરા ગાંધી હોસ્પિટલને 5 લાખ કોરોના વાયરસની રસી કોવેક્સિનના ડોઝ દાન કરવામાં આવ્યા છે.
વિદેશ મંત્રાલયે આપી જાણકારી
વિદેશ મંત્રાલયના જણાવ્યાનુસાર અફઘાનિસ્તાનના લોકોની મદદ માટે ભારત પ્રતિબદ્ધ છે. થોડા સપ્તાહ બાદ ભારત કોવેક્સિનના વધુ પાંચ લાખ ડોઝ અફઘાનિસ્તાન મોકલશે. આ ઉપરાંત અફઘાનિસ્તાનના લોકોને ભૂખમરાથી બચાવવા માટે અનાજ તેમજ જીવનજરૂરી સામાન સહિત દવાઓ પણ પહોંચાડવામાં આવી છે.
ભારત મદદ કરવા તત્પર
વિદેશ મંત્રાલયના અધિકારીઓએ જણાવ્યુ કે આ મહિનાની શરૂઆતમાં જ ભારતે અફઘાનિસ્તાનને 1.6 ટન તબીબી સહાય મોકલવામાં આવી છે. આ મદદ વિશ્વ સ્વાસ્થ્ય સંગઠન દ્વારા મોકલવામાં આવી હતી. આગામી અઠવાડિયામાં વધુ મદદ મોકલવામાં આવશે.