રાજકોટ / CM રૂપાણી આજે ખંઢેરી સ્ટેડિયમમાં નિહાળશે ભારત-ઓસ્ટ્રેલિયા મેચ, પાણીની બોટલ લઇ જવા પર પ્રતિબંધ

• રાજકોટના ખંઢેરી સ્ટેડિયમમાં ભારત-ઓસ્ટ્રેલિયાની મેચ
• ભારત સીરિઝ જીવંત રાખવા મેદાનમા ઉતરશે
• મુખ્યમંત્રી વિજય રૂપાણી પણ ક્રિકેટ મેચમાં ઉપસ્થિત રહેશે

ભારત-ઓસ્ટ્રેલિયા વચ્ચે ત્રણ વન ડે મેચની શ્રેણી પૈકીની બીજી મેચ રમાશે. બંને ટીમ બુધવારે રાજકોટ પહોંચી હતી. આ મેચમાં જાધવ, સૈની અને ચહલને તક મળી શકે છે. ભારત છેલ્લી ચાર મેચથી ઘરઆંગણે ઓસ્ટ્રેલિયા સામે જીત્યું નથી. મુખ્યમંત્રી વિજય રૂપાણી પણ ક્રિકેટ મેચમાં ઉપસ્થિત રહેશે. મુખ્યમંત્રી આજે સાંજે 7 વાગ્યે ખંઢેરી સ્ટેડિયમ ખાતે મેચ જોવા આવશે. રાજકોટમાં રમાનારી વન-ડેને લઈ સ્ટેડિયમ સહિત શહેરમાં લોખંડી બંદોબસ્ત ગોઠવી દેવામાં આવ્યો છે. સુરક્ષાને ધ્યાનમાં રાખી કેમેરા, માચીસ, સિગારેટ, પાણીની બોટલ લઈ જવા પર પ્રતિબંધ મુકવામાં આવ્યો છે. 

આ મેચને લઇને જિલ્લા પોલીસ વડા બલરામ મીણાએ જણાવ્યું હતું કે, મુખ્યમંત્રી વિજય રૂપાણી પણ ક્રિકેટ મેચમાં ઉપસ્થિત રહેશે. સાંજે 7 વાગ્યે તેઓ ગ્રાઉન્ડમાં હાજરી આપશે. 450 પોલીસ કર્મીઓ અને 250 જેટલા પ્રાઇવેટ સિક્યોરિટી હાજર રહેશે. DySP, PI, PSI સહિતનો પોલીસ કાફલો કરશે બંદોબસ્ત કરશે. 2 પોલીસ ચોકી મેચ દરમિયાન કાર્યરત રહેશે. મેચમાં અંદાજિત 30 હજાર દર્શકો સ્ટેડિયમમાં ઉપસ્થિત રહેશે.

રાજકોટમાં ટ્રાફિક જામની સમસ્યા ન સર્જાય તે માટે રાજકોટથી જામનગર તરફ જતા મોટા વાહનો માટે મોરબી રોડ અને જામનગરથી રાજકોટ તરફ આવતા વાહનોને પડધરીના મોવીયા સર્કલ થઈ રોડ ડાયવર્ટ કરવામાં આવશે.