અમદાવાદના બાપુનગરથી કાલુપુર જવા નીકળેલા વૃદ્ધને ત્રણ ગઠિયાઓનો ભરમાવી ખિસ્સામાંથી રૂપિયા 15 હજાર સેરવી લીધાની ઘટના સામે આવી છે.
અમદાવાદના વૃદ્ધને ગઠિયાએ છેતર્યા
બેસતાં ફાવતું નથી કહી ગઠિયા વૃદ્ધનાં ખિસ્સાંમાંથી ૧૫ હજાર તફડાવી ગયા
આજકાલ રીક્ષામાં મુસાફરોના સ્વાંગમાં તફડંચી કરતી ગેંગ સક્રિય બની છે ત્યારે અમદાવાદના બાપુનગરથી કાલુપુર જવા નીકળેલા વૃદ્ધને ત્રણ ગઠિયાઓનો ભેટો થઈ ગયો હતો અને બેસતા ફાવતું નથી કહી વૃદ્ધના ખિસ્સામાંથી રૂપિયા 15 હજાર તફડાવી નાસી ગયા હતા.
નટવરલાલ પટણી નામના વૃદ્ધ બન્યા ભોગ
અમદાવાદના બાપુનગર વિસ્તારમાં નટવરલાલ પટણી નામના વૃદ્ધ કાલુપુર જવા માટે સુભાષબ્રિજ પાસે ઊભા હતા, ત્યારે નજીક આવીને ઊભેેલી રિક્ષાના ડ્રાઇવરે ક્યાં જવું છે ? તેમ કહેતાં વૃદ્ધ નટવરલાલે કાલુપુર જવાનું છે તેમ કહી રિક્ષામાં બેસી ગયા હતા. બીજી તરફ રીક્ષામા અગાઉથી જ બેઠેલા ત્રણ ગઠિયાઓએ શિકાર મળી ગયો હોવાનું સમજી પેતરાબાજી શરૂ કરી હતી અને ગઠિયાઓએ વૃદ્ધ નટવરલાલને કહ્યું હતું કે, બેસતાં ફાવતું નથી જેથી વૃદ્ધને બે ત્રણ વાર આગળ પાછળ કર્યા હતા.
રીક્ષામાંથી ઉતર્યા બાદ વૃદ્ધ નટવરલાલની નજર પર્સ પર પડતાં જ ચોંક્યા
દરમિયાન થોડી વાર બાદ રીક્ષા શાહીબાગ પોલીસ સ્ટેશન સામે પહોચતા જ ગઠિયાઓ સાથે મળેલા રિક્ષાચાલકે નટવરલાલને કહ્યું હતું કે, તમને બેસતા ફાવતું ન હોય તો ઊતરી જાવ.જેથી નટરવરલાલને ઉતારી રિક્ષાચાલક સહિતના ગઠિયાઓ રીક્ષા લઇને ભાગ્યા હતા. જો કે, રીક્ષામાંથી ઉતર્યા બાદ વૃદ્ધ નટવરલાલની નજર પર્સ પર પડતાં જ ચોંક્યા હતા અને રિક્ષામાં મુસાફરના સ્વાંગમાં સાથે બેઠેલા ત્રણ ગઠિયા ૧૫ હજાર રોકડ રકમ તફડાવી ગયા હોવાનું માલુમ પડ્યું હતું.