ચીમકી / સુરતમાં ખાડીની સમસ્યા મુદ્દે આકરા પાણીએ MLA કાનાણી: સાત દિવસનું આપ્યું અલ્ટિમેટમ, સોસાયટીઓના પ્રમુખોને ભેગા કર્યા

• વરાછા વિસ્તારમાં ખાડી સમસ્યા મામલો 
• સ્થાનિકો દ્વારા આંદોલનની ચીમકી
• 40થી વધુ સોસાયટીના પ્રમુખોની બેઠક
• બેઠકમાં આંદોલનની રણનીતિ અંગે ચર્ચા

સુરતના વરાછામાં ખાડી સમસ્યા મામલે હવે સ્થાનિકો લડી લેવાના મૂડમાં છે. સ્થાનિકો દ્વારા ચીમકી ઉચ્ચારવામાં આવી છે કે, જો 7 દિવસમાં ખાડી સમસ્યાનો નિકાલ નહીં આવે તો ધારાસભ્ય કુમાર કાનાણીની અધ્યક્ષતામાં આંદોલન કરવામાં આવશે. મહત્વનું છે કે, આ મામલે અગાઉ કુમાર કાનાણી  દ્વારા પાલિકાને પત્ર લખીને ખાડી સમસ્યા સત્વરે ઉકેલવા માંગ કરાઈ હતી અને અલ્ટીમેટમ આપવામાં આવ્યું હતું.

વરાછાની અસંખ્ય સોસાયટીઓમાં ગંદકીનું સામ્રાજ્ય
નાના વરાછામાં આવેલી 40થી વધુ સોસાયટીના પ્રમુખોની બેઠક મળી હતી. આ બેઠકમાં આંદોલનની રણનીતિ અંગે ચર્ચા કરવામાં આવી હતી. આ બેઠકમાં નક્કી કરાયું હતું કે જો 7 દિવસમાં સમસ્યાનું નિવારણ નહીં આવે તો આંદોલન કરવામાં આવશે. નાના વરાછાની 40થી વધુ સોસાયટીના રહીશો ધારાસભ્ય કુમાર કાનાણીની અધ્યક્ષતામાં આંદોલન કરશે. 

કુમાર કાનાણી લખ્યો હતો પત્ર 
એક તરફ સુરત શહેરે સતત ત્રીજા વર્ષે ક્લીન સિટીનો એવોર્ડ જીત્યો છે તો બીજી તરફ વરાછાના ખાડી વિસ્તારની અસંખ્ય સોસાટીઓ ગંદકીનું સામ્રાજ્ય બની ગઈ છે. લોકો ગંદકી, દુર્ગંધ અને મચ્છરના ત્રાસથી ત્રાહિમામ પોકારી ગયા છે. વર્ષોથી અનેક રજૂઆત કરવા છતાં તેમની સમસ્યાઓનું કોઈ નિવારણ આવ્યું નથી. જેથી સ્થાનિકો દ્વારા વરાછાના ભાજપના ધારાસભ્ય કુમાર કાનાણીને રજૂઆત કરવામાં આવતા તેમણે તંત્રને ખુલ્લો પત્ર લખી આંદોલનની ચીમકી આપી હતી.

લોકો ગંદકી અને દુર્ગંધના ત્રાસથી પોકારી ગયા છે ત્રાહિમામઃ કુમાર કાનાણી
ધારાસભ્ય કાનાણીએ સુરત મહાનગરપાલિકાના કમિશનરને લખેલા પત્રમાં જણાવ્યું હતું કે, મારા વિસ્તારમાં આવેલ ખાડીના કિનારા પર અસંખ્ય સોસાયટીના લોકો મચ્છર, ગંદકી તેમજ દુર્ગંધના ત્રાસથી ત્રાહિમામ પોકારી ગયા છે, વર્ષોથી આ પ્રશ્ન બાબતે વારંવાર રજૂઆતો કરતા આવ્યા છે અને વહીવટી તંત્ર દ્વારા કોઈ કામગીરીનો રિપોર્ટ પણ આપવામાં આવતો નથી

લોકોએ જન આંદોલન કરવાની આપી છે ધમકીઃ કાનાણી
પત્રમાં લખ્યું હતું કે, કામની સમીક્ષા પણ કરવામાં આવતી નથી અને મને ફોન પર ફક્ત જવાબ આપી દેવામાં આવે છે કે કામ ચાલું છે, થઈ જશે. પરંતુ કામ થતું નથી અને લોકો કંટાળી ગયા છે. અસંખ્ય સોસાયટીના લોકો દ્વારા મારી પાસે આવી આ પ્રશ્ન હલ કરવાની રજૂઆત કરેલ છે અને જો પ્રશ્ન હલ ન થાય તો જન આંદોલન કરવાની પણ ધમકી આપેલ છે. તો આ પ્રશ્ન તાત્કાલિક હલ કરવા મારી માંગણી છે. 

....તો મારે પણ આંદોલનમાં જોડાવું પડશેઃ ધારાસભ્ય કાનાણી
ભાજપના ધારાસભ્યએ તંત્ર સામે આંદોલનની ચીમકી આપતા પત્રમાં લખ્યું હતું કે, જો લોકો જન આંદોલન કરશે તો ના છૂટકે મારે પણ આ જન આંદોલનમાં જોડાવું પડશે તેની ખાસ નોંધ લેશો.  

સતત ત્રીજા વર્ષે સુરતે જીત્યો હતો ક્લી સિટીનો એવોર્ડ
આપને જણાવી દઈએ કે, દેશના સૌથી સ્વચ્છ શહેરોના સર્વેમાં ગુજરાતમાંથી સુરતે બાજી મારી હતી. સુરત ફરી એકવાર ભારત બીજા નંબરનું સ્વચ્છ શહેર તરીકે ઉભરી આવ્યું હતું. 40 લાખથી વધુની વસ્તી ધરાવતા સૌથી ક્લીન સિટીનો એવોર્ડ સતત ત્રીજા વર્ષે સુરતે જીત્યો હતો. ઓક્ટોબર 2022માં કેન્દ્ર સરકારના સ્વચ્છતા સર્વેક્ષણ 2022નું પરિણામ જાહેર કરવામાં આવ્યું હતું. 

નંબર વન ક્લીન સિટી બનવા માટે કરી હતી તનતોડ મહેનત
દેશના નંબર વન ક્લીન સિટી બનવા માટે સુરત શહેરના તંત્ર દ્વારા ખૂબ મહેનત કરવામાં આવી હતી. તેથી આ વખતે સુરત શહેર ઈન્દોરને પછાડીને દેશનું નંબર વન ક્લીન સિટી બનશે તેવી આશા હતી પરંતુ નિરાશા મળી હતી. આ વખતે ફરી એકવાર મધ્યપ્રદેશના ઈન્દોર શહેરે દેશાના નબંર વન સ્વચ્છ શહેર તરીકે બાજી મારી લીધી હતી.