વરસાદી આફતમાં બનાસકાંઠા જિલ્લાના સોયલા ગામે કરુણાંતિકા સર્જાઇ હતી. જેમાં વરસાદી પાણીમાં મહિલા તણાઈ જતા તેણીનું મોત નીપજ્યું હતું.
ડીસાના સોયલા ગામે મહિલા તણાઇ
વરસાદી પાણીમાં મહિલા તણાઈ જતા મોત
ઊંડા પાણીમાં મહિલાનું ડૂબી જવાને કારણે મૃત્યુ થયુ
બનાસકાંઠાના ડીસા તાલુકામાં ભારે વરસાદ પડતા અનેક ગામડાઓ બેટમાં ફેરવાયા હતા. અનેક ગામોંમાં લોકોના ઘરમાં પાણી ઘૂસી જતાં લોકોને હાલાકીનો સામનો કરવાનો વારો આવ્યો હતો અને ઘરવખરીને પણ નુકસાન થયું છે.સતત વરસાદ યથાવત રહેતા પૂર જેવી સ્થિતિનું નિર્માણ થયું હતું. આ સ્થિતિમાં ડીસાના સોયલા ગામે પણ પાણી ભરાયા હતા. જેમાં એક મહીલા અટવાઇ હતી. વરસાદી પાણીમાં મહિલા તણાઈ હોવાની ફાયર વિભાગને જાણ થતા ફાયર સ્ટાફ તાત્કાલિક ઘટનાસ્થળે પહોચ્યુ હતુ.
મહિલાનું કમકમાટીભર્યું મોત નીપજતા હાહાકાર
આ દરમિયાન બજારોમાં નદીઑ વહી હોય તેવા દ્રશ્યો સર્જાયા હતા. જેમાં વરસાદી પાણીમાં ફસાયેલી મહિલાનું રેસ્ક્યૂ હાથ ધરવામાં આવ્યુ હતું. પરંતુ ઊંડા પાણીમાં અટવાયેલી મહિલાનું ડૂબી જવાને કારણે મૃત્યુ થયુ હતું. ફાયર બ્રિગેડના જવાનોની જહેમત બાદ પણ મહિલા બચી શકી ન હતી. મહિલાનું કમકમાટીભર્યું મોત નીપજતા હાહાકાર મચી ગયો હતો.
બનાસકાંઠા જિલ્લામાં દસ ઇંચ સુધીનો વરસાદ નોંધાયો
હવામાન વિભાગની આગાહીના પગલે સમગ્ર બનાસકાંઠા જિલ્લામાં છેલ્લા 24 કલાક દરમિયાન પાંચથી દસ ઇંચ સુધીનો વરસાદ વરસી ચુક્યો છે ત્યારે અનેક વિસ્તારોમાં પાણી ભરાયા છે. વધુમાં ગુજરાતને જોડતો આબુ હાઇવે પાણી ભરવાના કારણે બંધ કરવાની નોબત આવી હતી. આબુ હાઇવે પર ટ્રાફિક જામ થતાં અનેક લોકો રસ્તામાં અટવાયા હતા. દર ચોમાસે આ હાઈવે ઉપર કેડ સમા પાણી ભરાય છે જેને લઇને વાહન ચાલકો રાહદારીઓ ભારે મુશ્કેલી વેઠી રહ્યા છે.