બે સ્થાનિક યુવાનો યુ ટ્યુબ પર જોઇને ઇગ્લુ બનાવતા શીખ્યા, હવે તે પર્યટકોની વચ્ચે ખાસ્સા ફેમસ થયા, એડવાન્સ બુકિંગ કરાવવું પડે છે, એક રાતનું ભાડુ 5500 રુપિયા.
હિમાચલ પ્રદેશના ફેમસ હિલસ્ટેશન મનાલીમાં બરફવર્ષા બાદ સહેલાણીઓની સંખ્યામાં ખાસ્સો વધારો થયો છે. સહેલાણીઓ અહીં બરફ સાથે રમવાનો આનંદ લે છે. જો તમે પણ મનાલી જવાનુ પ્લાનિંગ કરી રહ્યા હો તો અહીં ઇગ્લુમાં રાત વિતાવવાનો આનંદ જરુર ઉઠાવજો.
એકબીજા પર બરફ ફેંકવાથી વધુ આનંદ તમે બીજી એક વાતનો પણ લઇ શકો છો. અહીંના પર્યટકો વચ્ચે એક ખાસ આકર્ષણ બનેલા ઇગ્લુ ઘર જેની અંદર લોકો એસ્કિમો બનીને રહી શકે છે. ઇગ્લુ ભારે બરફવાળી જગ્યાઓમાં રહેવા માટે બરફમાંથી બનાવેલા ઘર હોય છે. તેમાં રહેનાર લોકોને એસ્કિમો કહેવાય છે.
મનાલીથી લગભગ 15 કિમી દુર 9000 ફુટની ઉંચાઇ પર આવેલા હમતામાં આ ઇગ્લુ ચાર વર્ષ પહેલા એક્સપરિમેન્ટ તરીકે શરુ કરાયા હતા. ધીમે ધીમે તેણે એક કોલોનીનું સ્વરુપ લીધુ. સ્થાનિક યુવા તાશી અને વિકાસે સતત ચોથા વર્ષે આ ઇગ્લુ બનાવ્યા છે. હવે તે એટલા લોકપ્રિય બન્યા છે કે આખી સીઝન પર્યટકો તેનો આનંદ ઉઠાવવા આવે છે.
વિકાસે જણાવ્યુ કે અમે આ સીઝનમાં 5 ઇગ્લુ બનાવ્યા છે અને પર્યટકો તેના દિવાના થઇ ગયા છે. તેઓ ચોંકી જાય છે કે આ અંદરથી કેટલા ગરમ હોય છે. અમે ડિસેમ્બરમાં બુકિંગ શરુ કર્યુ હતુ અને માર્ચ સુધી પર્યટકો આવે તેવી આશા છે. વિકાસ અને તાશીએ 2016-17માં આ સ્નો વિલેજ બનાવવાનું નક્કી કર્યુ હતુ. આશ્વર્યની વાત એ છે કે આ બંનેએ આના માટે કોઇ ટ્રેનિંગ લીધી નથી. તેઓ માત્ર યુટ્યુબ પર જોઇને ઇગ્લુ બનાવવાનું શીખ્યા હતા.
અહીં રહેવા માટે એડવાન્સ બુકિંગ કરાવવું પડે છે. એક ઇગ્લુની અંદર બે લોકો રહી શકે છે અને એક રાતનું ભાડુ 5500 રુપિયા છે. આ ઉપરાંત મોટી સંખ્યામાં લોકો દિવસના સમયે તેને જોવા માટે આવે છે. તેની અંદર સુંદર લાઇટ્સ લાગેલી છે અને બેડિંગ પણ છે. દિવસના સમયે લોકો સ્કીઇંગ અને સ્નોબોર્ડીંગ કરે છે જ્યારે સાંજે તેઓ અહીં બેસીને ગરમ થાય છે.