અમદાવાદ / પત્નીનું પ્રસુતિ દરમિયાન મોત થતાં પતિએ ડૉક્ટર પર કર્યું ફાયરિંગ

• પત્નીનું પ્રસુતિ દરમિયાન મોત નિપજતાં પતિએ બદલો દેવાનું નક્કી કર્યું
• ડૉક્ટરની હત્યા કરવાં હથિયાર મધ્યપ્રદેશથી મંગાવ્યું
• ધોળે દિવસે ડો.નો પીછો કરી હત્યાનો પ્રયાસ કર્યો

ઓઢવમાં ડૉ. પર ફાયરિંગ

અમદાવાદનાં ઓઢવ કરશનનગર ગેટ નં-1ની સામેથી એક્ટિવા લઈ પસાર થઈ રહેલાં ડૉ. મુકેશ પ્રજાપતિ પર એક વ્યક્તિએ સોમવારે ધોળે દહાડે બપોરે 12થી 12.45 વચ્ચે ફાયરિંગ કર્યું હતું. આ ઘટનામાં ડૉક્ટર ઘાયલ થયાં હતાં. પોલીસને જાણ થતાં ઓઢવ પોલીસ તાત્કાલીક ઘટના સ્થળે પહોંચી હતી. ઈજાગ્રસ્ત ડૉ મુકેશને હોસ્પિટલ દાખલ કરવામાં આવ્યાં છે. તેમની સ્થિતિ સારી છે. 

ડૉ બેંકમાં જઈ રહ્યાં હતા

ડૉ. મુકેશ પ્રજાપતિ કુંવરબા હોસ્પિટલનાં તબીબ છે. તેઓ બીએચએમએસ છે.  મુકેશભાઈને બેંકનું કામ હોઈ તેઓ સોમવારે એક્ટિવા લઈ બેંકમાં જઈ રહ્યાં હતાં. આ દરમિયાન તેમનાં પર હુંમલો કરવામાં આવ્યો હતો. 

હત્યાં માટે હથિયાર મધ્ય પ્રદેશથી લાવ્યો હતો

ઓઢવ પોલીસ સ્ટેશનનાં પીઆઈ આર. જી. જાડેજાએ તેમની ટીમ સાથે મળીને ફાયરિંગ કરનાર વિપુલ વ્યાસ(28)ને બનાવવનાં ગણતરીનાં કલાકોમાં ઝડપી પાડ્યો હતો. આરોપી હાથીજણ પાસે પોતાની રેસ્ટોરન્ટ ચલાવે છે. સૂત્રોનાં જણાવ્યાંનુંસાર ડૉક્ટર પર હુમલામાં વપરાયેલ દેશી કટ્ટો પણ પોલીસે જપ્ત કરી લીધું છે. આ હથિયાર વિપુલ મધ્યપ્રદેશથી લાવ્યો હતો.

આ હતું  હુમલાનું કારણ

વિશ્વસનીય સૂત્રો દ્વારા જાણવા મળ્યું છે કે વિપુલ વ્યાસની પત્ની રુપલ એક વર્ષ પહેલાં ગર્ભવતી હતી. જેને ડૉ. મુકેશને ત્યાં દાખલ કરવામાં આવી હતી. પ્રસુતિ દરમિયાન રુપલનું મોત  નિપજ્યુ હતું. જ્યારે રુપલે એક દિકરાને જન્મ આપ્યો હતો. જોકે રુપલનાં મોતનો વિપુલને આઘાત લાગ્યો હતો. જેનું મન દુ:ખ રાખીને તેણે એક વર્ષ સુધી મુકેશને મારવાનો પ્લાન બનાવ્યો હતો. આ પ્લાનને સફળ બનાવવાં માટે તેણે મુકેશની રેકી પણ કરી હતી. આજે લાગ લઈને વિપુલે મુકેશની હત્યાનો પ્રયાસ કર્યો હતો. ઉલ્લેખનીય છે કે વિપુલનો કોઈ ગુનાહિત ઈતિહાસ નથી.