સર્વે / ઇન્ટરનેટ પર વધતો હિન્દીનો દબદબો, 2 વર્ષમાં અંગ્રેજીને પાછળ રાખી દેશે

• રાષ્ટ્ર ભાષા હિન્દી ઇન્ટરનેટ પર ખૂબ ઝડપથી છવાઇ રહી છે
• હિન્દી વાચકોની સંખ્યા દર વર્ષે 94 ટકા વધી રહી છે
• ૨૦૧૧માં હિન્દી ભાષીની સંખ્યા વધીને 52 કરોડ થઈ

આમ તો વિશ્વની કોઈપણ ભાષા માતૃભાષાનું સ્થાન લઈ શકે નહીં. આપણા દેશની રાષ્ટ્ર ભાષા હિન્દી ઇન્ટરનેટ પર ખૂબ ઝડપથી છવાઇ રહી છે. ઇન્ટરનેટ પર હિન્દી વાચકોની સંખ્યા દર વર્ષે 94 ટકા વધી રહી છે. ઇન્ટરનેટ પર હિન્દીની લોકપ્રિયતાનો અંદાજ તેના પરથી લગાવી શકાય છે. ગુગલ, કેપીએમજી રિસર્ચ, સેન્સસ ઈન્ડિયા અને આઇરએસના રિપોર્ટ મુજબ 2021માં ઇન્ટરનેટનો ઉપયોગ હિન્દીમાં કરવાવાળા યુઝર્સની સંખ્યા અંગ્રેજીમાં ઇન્ટરનેટ યુઝ કરતા લોકો કરતાં વધી જશે.

એક અંદાજ મુજબ 20.1 કરોડ લોકો હિન્દીનો ઉપયોગ કરતા હશે. ગૂગલના જણાવ્યા મુજબ અંગ્રેજીનો ઉપયોગ કરનારા લોકો દર વર્ષે 17 ટકા વધે છે. એમેઝોન ઈન્ડિયાએ હાલમાં જ હિન્દીમાં તેની એપ્લિકેશન શરૂ કરી છે. હિન્દીમાં પહેલેથી જ ઓએલએક્સ, ક્વિકર જેવા પ્લેટફોર્મ ઉપલબ્ધ છે. સ્નેપડીલ પણ હિન્દીમાં આવી ગઈ છે. 2021 સુધીમાં 8.1 કરોડ લોકો ડિજિટલ પેમેન્ટ માટે હિન્દીનો ઉપયોગ શરૂ કરશે. જ્યારે વર્ષ 2016માં આ સંખ્યા 2.2 કરોડ હતી.

2016 સુધીમાં 2.4 કરોડ લોકોએ સરકારી કામ માટે હિન્દીનો ઉપયોગ કર્યો હતો, જે 2021 માં વધીને 9.4 કરોડ થઈ જશે. 2016માં ડિજિટલ માધ્યમમાં હિન્દીમાં સમાચાર વાંચનારા લોકોની સંખ્યા 5.5 કરોડ હતી. જે 2021માં 14.4 કરોડ થવાનો અંદાજ છે. 2001ની વસતી ગણતરી પ્રમાણે દેશમાં હિન્દી ભાષીઓની સંખ્યા 42 કરોડ હતી. ૨૦૧૧ માં આ સંખ્યા વધીને 52 કરોડ થઈ ગઈ છે.