હવામાન પલ્ટો / રાજકોટ, બનાસકાંઠા અને છોટાઉદેપુર સહિતના જિલ્લાઓમાં વરસાદ, 21-22 જૂલાઇએ આગાહી

રાજ્યમાં મેધરાજાએ વિરામ લેતા ખેડૂતો મુશ્કેલીમાં મુકાયા હતા. જોકે હવે રાજ્યના કેટલાક વિસ્તારોમાં મધ્યમ વરસાદ વરસતા ખેડૂતો હરખાયા છે. જોકે ભારે ઉકળાટ બાદ વરસાદ વરસતાં વાતાવરણમાં ઠંડક પ્રસરી હતી. વરસાદની આશાએ ખેડૂતોએ વાવણી કરી હતી. પરંતુ વરસાદ ખેંચાયો હતો. આથી ખેડૂતો કાગડોળે વરસાદની રાહ જોતા હતા. ત્યારે ફરીવાર વરસાદી માહોલ સર્જાતા ખેડૂતોમાં આશા બંધાઈ છે. વરસાદ થતા પાકને ફાયદો થવાની આશા બંધાઈ છે. વરસાદ પડતા ખેડૂતોમાં હરખની લાગણી જોવા મળી રહી છે..

બનાસકાંઠા જિલ્લાના વાતાવરણમાં પલટો, સુરતમાં વરસાદ

જો કે લાંબા વિરામબાદ બનાસકાંઠા જિલ્લાના વાતાવરણમાં પલટો જોવા મળ્યો હતો. પાલનપુર પંથકમાં ધીમીધારે વરસાદ શરૂ થયો હતો. મહત્વનું છે કે, સુરતમાં પણ ધીમીધારે વરસાદ વરસ્યો હતો.

છોટા ઉદેપુરમાં ધોધમાર

છોટાઉદેપુરમાં પણ બે સપ્તાહના વિરામબાદ મેઘરાજાનું આગમન થયુ છે. છોટાઉદેપુર પંથકમા ધોધમાર વરસાદ શરૂ થયો હતો. કાળઝાળ ગરમી બાદ વરસાદ પડતા વાતાવરણમાં ઠંડક પ્રસરી હતી. વરસાદની આશાએ ખેડૂતોએ વાવાણી કરી હતી. વાવાણી બાદ વરસાદ ખેંચાતા ખેડૂતો ચિંતામાં મુકાયા હતા. જો કે, વરસાદ પડતા ખેડૂતોમાં આનંદની લાગણી જોવા મળી છે.

અમરેલી પંથકમાં મેઘમહેર

અમરેલીના સાવરકુંડલા સહિત ધારીના ગીર વિસ્તારમાં વરસાદનું આગમન થયું છે. જાંબાળ, અભરામ પરા, ગઢકડા સહિતમા વરસાદ શરૂ થયો છે. ગરમી બાદ વરસાદ પડતા લોકોને ગરમીથી રાહત મળી રહી છે. ગીરના જંગલ તેમજ ધારીના સુખપુરમાં ધીમીધારે વરસાદ વરસ્યો હતો.

બાબરામાં ધીમીધારે વરસાદ

અમરેલીના બાબરામાં ધીમીધારે વરસાદનું આગમન થયુ છે. બાબરા સહિતના ગ્રામ્ય વિસ્તારોમાં વરસાદની શરૂઆત થઈ છે. વરસાદના આગમનથી ખેડૂતોમાં ખુશીનો માહોલ જોવા મળ્યો હતો. વરસાદે વિરામ લેતા ખેડૂતો પરેશાન થયા હતા. ત્યારે હવે ફરી એક વખત વરસાદ થતા ખેડૂતોમાં ખુશીનો માહોલ જોવા મળ્યો છે.

રાજકોટમાં મેઘરાજાની પધરામણી 

રાજકોટમાં મેઘરાજાની પધરામણી થઈ છે. સતત ત્રીજા દિવસે શહેરમાં ધીમો વરસાદ પડી રહ્યો છે. સતત વધી રહેલા ઉકળાટથી રાજકોટવાસીઓને રાહત મળી છે. તો ધીમીધારે વરસાદથી સમગ્ર શહેરમાં ઠંડક પથરાઇ છે. જોકે, રાજકોટવાસીઓ ધોધમાર વરસાદની રાહ જોઈ રહ્યા છે.

બોટાદમાં લાંબા વિરામ બાદ વરસાદ 

બોટાદમાં લાંબા વિરામ બાદ વરસાદ શરૂ થયો છે. ગઢડામાં મેઘરાજાની પધરામણી થતા ખેડૂતોમાં આનંદની લોગણી જોવા મળી. ગઢડામાં ભારે પવન સાથે વરસાદ શરૂ થયો. વરસાદના પગલે વાતાવરણમાં ઠંડક પ્રસરી હતી.

હવામાન વિભાગની આગાહી

હવામાન વિભાગ દ્વારા આગાહી કરવામાં આવી છે કે, દ. ગુજરાત અને સૌરાષ્ટ્રમાં 21-22 જૂલાઇએ વરસાદ વરસી શકે છે. જેમાં સુરત, જામનગર, દ્વારકા, ગીર સોમનાથ, પોરબંદર, અમરેલી અને વલસાડ સહિતના વિસ્તારોમાં વરસાદની આગાહી કરવામાં આવી છે.