રિયાલિટી ચેક / રાજકોટમાં મિનરલ વોટરના નામે આરોગ્ય સાથે ચેડાં: અધિકારીઓને માત્ર નોટિસથી સંતોષ, VTV પહોંચ્યું ત્યારે પણ પ્રોડક્શન ચાલુ

• રાજકોટમાં મિનરલ વોટરના નામે આરોગ્ય સાથે ચેડાં
• મિનરલ પાણી વેચતા બે ઉત્પાદકો સામે મોટી કાર્યવાહી
• પાણી વેચતા બે ઉત્પાદકોને 23 લાખ રૂપિયાનો દંડ ફટકારાયો
• રિયાલિટી ચેકમાં હજુ પણ પ્રોડક્શન ચાલુ હોવાનું આવ્યું સામે 

રાજકોટમાં લોકોના આરોગ્ય સાથે ચેડાં કરનાર સામે મોટી કાર્યવાહી કરવામાં આવી છે. મિનરલ પાણી વેચતા બે ઉત્પાદકોને લાખોનો દંડ ફટકારવામાં આવ્યો છે. રાજકોટ મનપા દ્વારા બીશવીન બેવરેજીસ અને મેક્સ બેવરેજીસ નામની મિનરલ વોટર બનાવતી બે કંપનીઓને લાખો રૂપિયાનો દંડ ફટકારવામાં આવ્યો છે. બીશવીન બેવરેજીસ કંપનીને 15 લાખનો દંડ અને મેક્સ બેવરેજીસ નામની કંપનીને 8 લાખ રૂપિયાનો દંડ ફટકારવામાં આવ્યો છે. સેમ્પલની તપાસ કરતા બંને હલકી ગુણવત્તાનું પાણી વેચાતા હોવાનું સામે આવ્યું છે. આ ઉપરાંત આ બંને મિનરલના નામે ડુપ્લીકેટ બ્રાન્ડિંગ કરી પાણી વેંચતા હતા. 

પ્રોડક્શન ચાલું હોવાનું સામે આવ્યું  
શહેરના વેદવાળી વિસ્તારમાં આવેલા બીશવીન બેવરેજીસ કંપની ખાતે VTV ન્યૂઝની ટીમ પહોંચી હતી. VTV ન્યૂઝના રિયાલિટી ચેકમાં હજુ પણ પ્રોડક્શન ચાલુ હોવાનું આવ્યું સામે આવ્યું છે. નમૂના ફેઇલ થવા છતા પણ હજુ પ્રોડક્શન ચાલી રહ્યું છે. મનપા દ્વારા લાખોનો દંડના ફટકારવામાં આવ્યો હોવા છતાં પણ આ ફેક્ટરી ધમધમી રહી હોવાનું રિયાલિટી ચેકમાં સામે આવ્યું છે. ત્યારે શું લોકોના આરોગ્ય સાથે ચેડાં કરતા શખ્સોને તંત્ર છાવરી રહ્યુ છે? આ એક મોટો સવાલ છે.

એરોબિક માઇક્રોબાયલના કાઉન્ટ વધારે હોવાથી દંડ ફટકાર્યોઃ શૈલેષ ભૂત
આ દરમિયાન ફેક્ટરીના માલિક શૈલેષ ભૂત નામના વ્યક્તિએ VTV સાથેની વાતચીતમાં જણાવ્યું કે, આરોગ્ય વિભાગ દ્વારા મિનરલ વોટરના નમૂના લેવામાં આવ્યા હતા. જે તે સમયે નમુના પરીક્ષણ અર્થે લેબોરેટરીમાં મોકલવામાં આવ્યા હતા જેમાં પાણીમાં રહેલા એરોબિક માઇક્રોબાયલના કાઉન્ટ પાણીમાં વધુ હોવાનું સામે આવ્યું હતું. જેનો અમને દંડ ફટકારવામાં આવ્યો છે. 

મારું ક્યારેય સેમ્પલ ફેલ થયું નથીઃ શૈલેષ ભૂત
તેઓએ જણાવ્યું કે, પાણીમાં એવું કોઈ ફેક્ટર નથી કે કોઈ ભેળસેળ થઈ શકે. એરોબિક માઇક્રોબાયલ કાઉન્ટ એટલે પાણીમાં રહેલું એક ફેક્ટર છે, જેને અમે છુટ્ટુ પાડતા હોઈએ છીએ અને ક્યારેક પાવરની સમસ્યાને કારણે એવું બની જતું હોય જથી કરીને થોડા માઇક્રો કાઉન્ટ વધારે આવ્યા હોય એની ઉપર અમને દંડ આપવામાં આવ્યો છે. મારું ક્યારેય સેમ્પલ ફેલ થયું નથી, આગલા વર્ષે પણ સેમ્પલ મોકલ્યું હતું, જે પાસ થયું હતું. આ પહેલી વખત આવું બન્યું છે. સાથે એરોબિક માઇક્રોબાયલમાં ફેલ થવામાં આટલો બધો દંડ આવ્યો હોય એવું પણ મેં ક્યારેય સાંભળ્યું નથી. 5થી 15 હજાર રૂપિયા દંડ હોય છે. 

હલકી ગુણવત્તાનું પાણી વેચાતું હોવાનું સામે આવ્યું
આ મામલે વિગતવાર વાત કરીએ તો રાજકોટના બિસ્વિન અને મેક્સ બેવરેજીસના પાણીના નમૂનાને તપાસ માટે મોકલવામાં આવ્યા હતા. લેબોરેટરીમાં હલકી ગુણવત્તાનું પાણી વેચાતું હોવાનું સામે આવ્યું હતું. પાણીના લીધેલા નમૂનાની તપાસ કરતા બંનેમાં રોબિક માઈક્રોબાયલ કાઉન્ટ વધારે આવ્યા હતા એટલે કે તેમાં સૂક્ષ્મ જીવો જેવા કે બેક્ટેરિયાનું પ્રમાણ ધારાધોરણ કરતા વધારે રહેતા તે નમૂના ફેલ થયા હતા. જે બાદ આ પેઢીને માતબર દંડ ફટકારતા ગુણવત્તા મામલે બેદરકાર રહેતી અનેક પેઢીઓમાં સોપો પડી ગયો છે. બીસવીન બેવરેજીસને રૂપિયા 15 લાખનો અને મેક્સ બેવરેજીસને રૂપિયા 8 લાખનો દંડ ફટકારાયો છે.

પેટને લગતા થઈ શકે છે રોગઃ આરોગ્ય અધિકારી
આ મામલે RMCના આરોગ્ય અધિકારીએ જણાવ્યું હતું કે, એરોબિક માઇક્રોબાયલ કાઉન્ટ વધારે ન હોવા જોઇએ. આ કાઉન્ટ વધારે હોવાથી પેટને લગતા રોગ થઇ શકે છે. આ ઉપરાંત આતરડાંના રોગ, ઝાડા ઉલટી જેવા રોગ થઇ શકે છે. પાણીની બોટલમાં એરોબિક બેક્ટિરીયાની હાજરી 37 ડિગ્રી તાપમાનમાં મેનુફેક્ચરીંગના પ્રથમ 24 કલાકમાં 
પ્રતિ  ML 20 કાઉન્ટ હોવા જોઇએ. જ્યારે આ પ્રોડક્ટમાં 6200 કાઉન્ટ જોવા મળ્યા હતા. 20-22 ડિગ્રી તાપમાનમાં મેન્યુફેક્ચરીંગના 72 કલાક સુધીમાં 100 કાઉન્ટ હોવા જોઇએ જેની સામે 11200 કાઉન્ટ જોવા મળ્યા હતા.