હેડકલાર્ક પેપર લીક: ઉમેદવારોએ કહ્યું ગૌણસેવા પસંદગી મંડળમાં જ ગેરરીતિ કેમ?, તો કોંગ્રેસે પણ વહેતા પાણીમાં હાથ ધોયા
ગૌણ સેવા પસંદગી મંડળનું ભેદી મૌન
પેપરલીકના આરોપોનો સચોટ જવાબ કેમ નહીં?
ફરિયાદની રાહ કેમ જુઓ છો?
ગુજરાતમાં પેપર લીક કૌભાંડ. ભરતીઓ રદ્દ થવી. લાખો યુવાઓની મહેનત પર પાણી ફરી જવું. આ બધું હવે સામાન્ય બની ગયું હોય તેવું લાગી રહ્યું છે. કારણ કે, પારદર્શિતા સાથે ગુજરાતમાં ભરતી થાય તો ઈતિહાસ રચાઈ જાય.કારણ કે, ફરી એક વખત ગૌણ સેવા પસંદગી દ્વારા લેવાયેલી પરીક્ષાનું પેપર લીક થયાના આક્ષેપો થયા છે.
સરકારની આખીય દાળ જ કાળી:કોંગ્રેસ
હેડ ક્લાર્ક પેપર લીક મામલે હવે ગુજરાત મા રાજકારણ ગરમાયુ છે. ગૌણ સેવા પસંદગી મંડળ ના ચેરમેન અસિત વોરા એ જણાવ્યું કે પેપર લીક મામલે કોઇ ફરિયાદ નહોતી મળી એટલે રાહ જોતા હતા અને પરંતુ પોલીસે તપાસ ચાલુ છે. આ મામલે કોંગ્રેસ પ્રવક્તા મનીષ દોષી એ નિવેદન આપતા જણાવ્યું હતું કે ગુજરાત માં જાહેર પરીક્ષા ની વિશ્વવસનીયતા પર હવે ભરોસો નથી. ગુજરાત ગૌન સેવા પસંદગી સેવા મંડળ નું નામ બદલી ગમતા પસંદગી મંડળ કરવું જોઈએ. અગાઉ પણ સરકાર એવું કહેતી હતી કે ગેરરીતિ નથી થઈ અને ત્યાર બાદ તમામ પેપરલીકની ઘટના સામે આવી અને હકીકત પણ. સરકારે દોઢ લાખ પરિવાર ને ચિંતા માં મુક્યાં છે..આક્ષેપ નથી હકીકત છે કે પેપર ફૂટ્યું છે.જાહેર પરીક્ષાની વ્યવસ્થામાં ખામી છે. ભરતી જાહેર થાય એની સાથે એના ભાવ પણ જાહેર થયા છે. સરકારની દાળમા કાળું નથી દાળ જ કાળી છે.
પેપર 2014 પછી પેપર લીક થવાના શરૂ થયા: જગદીશ ઠાકોર
પેપરલીક મામલે ગુજરાત કોંગ્રેસના અધ્યક્ષ જગદીશ ઠાકોરનું નિવેદન પણ સામે આવ્યું છે. સરકાર પર પ્રહાર કરતાં કહ્યું છે કે આ પહેલું પેપર લીક નથી થયુ, પેપર 2014 પછી લીક થવાના શરૂ થયા છે. બેરોજગાર યુવાનોને સરકાર પરથી વિશ્વાસ ઉઠી ગયો છે. હેડ ક્લાર્ક પરીક્ષામાં 2 લાખ ઉમેદવારો હતા. પેપર લીકની માહિતી આપો તો જેલ થાય તેવો ઉમેદવારોને ડર છે.
દારૂ-ડ્રગ્સની માહિતી આપો તો જેલ થાય છે. સરકાર આ તમામને મદદ કરી રહી છે.
આરોપીઓ XUV 300 કારમાં પેપર લઈ ગયા
હેડ કલાર્કની પરીક્ષાના પેપર લીક કેસમાં સાબરકાંઠા સાથે તાર જોડાયા છે. કેતન વાળંદ નામના શખ્સની પોલીસે અટકાયત કરી છે. જે કારમાં આરોપી પેપર લઈ ગયો હતો તેનો નંબર સામે આવ્યો છે. XUV 300 કાર GJ-09-BJ-2416 નંબરની કારમાં પેપર લઈ જવામાં આવ્યા હતા. જે શંકાસ્પદ આરોપી કેતન વાળંદના નામે કાર રજીસ્ટર્ડ થઈ છે. બીજા એક વ્યકિતને પણ પોલીસ તપાસ માટે લઈ ગઈ હોવાની શકયતા સેવાઇ રહી છે.
કાર માલિકના ઘરે પહોંચી VTVની ટીમ
હેડક્લાર્ક ભરતી પરીક્ષાના પેપર લીક થયા હોવાનો આક્ષેપ કરવામાં આવી રહ્યો છે. ત્યારે સાબરકાંઠાના ફાર્મ હાઉસમાં કાર દેખાઇ હતી તે કાર માલિકની સાબરકાંઠા પોલીસ દ્વારા અટકાયત કરવામાં આવી છે. પોલીસે કારના માલિક કેતન વાળંકની અટકાયત કરી પૂછપરછ હાથ ધરી છે. કેતન વાળંદની અટકાયત બાદ VTV કેતનના ઘરે પહોંચ્યું હતું. કેતનના પિતાએ પોતાના પુત્રને નિર્દોષ ગણાવ્યો હતો. અને તેની સામે કાવતરૂ રચવામાં આવ્યું હોવાનું જણાવ્યું હતું.
પેપર લીક થયાની કોઇપણ ઓફિસિયલ ફરિયાદ નથી મળી: અસિત વોરા
ગુજરાત રાજ્ય ગૌણ સેવા પસંદગી મંડળ દ્વારા હેડ ક્લાર્કની પરીક્ષાનું પેપર લીક થયા બાદ આજે પસંદગી મંડળના ચેરમેન અસિત વોરાનું નિવેદન સામે આવ્યું છે. અસિત વોરાએ આજે પત્રકાર પરિષદ બોલાવીને માહિતી આપી હતી. અસિત વોરાએ જણાવ્યું હતું કે પેપર લીક થયું હોવાના નક્કર પુરાવા નથી મળ્યા. પેપર લીક થયાની કોઇપણ ઓફિસિયલ ફરિયાદ અમને મળી નથી. પરીક્ષા શરૂ થતાં પહેલા પેપર લીક થયા હોવાના પુરાવા હજુ નથી મળ્યાં. પુરાવા મળશે તો જવાબદાર સામે કડક કાર્યવાહી કરવામાં આવશે. પેપર લીક થયું છે કે તેમ તે અંગેની તપાસ હજુ ચાલી રહી છે. ગૃહ રાજ્યમંત્રી દ્વારા પણ પોલીસને પેપરલીક મામલે કડક કાર્યવાહી કરવાના આદેશ આપવામાં આવ્યા છે. પેપર લીક થવાના પુરાવા મળશે તો ફરિયાદ દાખલ કરવામાં આવશે.
પેપર લીક મામલે ગૌણ સેવાને સળગતા સવાલ
પેપરલીકના આરોપોની વચ્ચે ગૌણ સેવા પસંદગી મંડળ નથી પાડતું મગનું નામ મરી
અમારી પાસે કોઈ ફરિયાદ આવી નથી એમ કહીને જવાબદારીથી હાથ ખંખેર્યા
ફરિયાદ ન આવે ત્યાં સુધી રાહ જોવાનું બાબુશાહી વલણ અપનાવતું ગૌણ સેવા પસંદગી મંડળ
જાતે ફરિયાદી નથી બનવું અને ફરિયાદ કરનારની ફરિયાદ ખોટી છે એવુ સાબિત પણ નથી કરવું
નરોવા કુંજરોવા જેવી નીતિ અખત્યાર કરતું ગૌણ સેવા પસંદગી મંડળ
હેડ કલાર્કની પરીક્ષામાં હજારો વિદ્યાર્થીઓની મહેનત જોડાયેલી છે
વિદ્યાર્થીઓના હિતનો કેમ વિચાર નથી કરતું ગૌણ સેવા પસંદગી મંડળ
ગૌણસેવા પસંદગી મંડળમાં જ ગેરરીતિ કેમ?- ઉમેદવારો
હેડ ક્લાર્કની પરીક્ષાનું પેપર લીક થવાના આક્ષેપનો મામલે ગૌણસેવા પસંદગી મંડળના જવાબથી મહેનત કરતાં ઉમેદવારોમાં નારાજગી જોવા મળી રહી છે. ઉમેદવારો સીધા આરોપ કરી રહ્યા છે કે અન્ય એજન્સીઓની પરીક્ષા સારી રીતે લેવાય છે, ગૌણસેવા પસંદગી મંડળમાં જ ગેરરીતિ કેમ? યુવરાજસિંહ જાડેજાએ પુરાવા આપ્યા છે, પુરાવા છતાં અસિત વોરા ઇનકાર કરી શું સાબિત કરવા માગે છે તેવો વેધક સવાલ પણ કર્યો છે, સાથે નિસાસો નાંખતા કહી રહ્યા છે કે ગૌણસેવા પસંદગી મંડળ પરીક્ષાઓ લેવામાં તદ્દન નિષ્ફળ ગયું છે.
શંકાસ્પદ 8 થી વધુની અટકાયત
હેડ ક્લાર્કના પેપર લીકના આરોપસર શંકાસ્પદ 8 થી વધુની લોકોની અટકાયત કરવામાં આવી છે. ગાંધીનગર અને સાબરકાંઠાના શંકાસ્પદ લોકોની કોલ ડિટેઈલ્સને આધારે અટકાયત કરાઈ છે.
હેડ ક્લાર્કના પેપર લીકના આક્ષેપ શું?
રવિવારે 186 જગ્યા માટે હેડક્લાર્કની પરીક્ષા લેવાઇ હતી, પરીક્ષામાં કુલ દોઢ લાખ યુવાનોએ પરીક્ષા આપી હતીએક દિવસ પહેલા જ હેડક્લાર્કનું પેપર લીક થયું હતું. પ્રાંતિજના ઊંછા સ્થિત ફાર્મ હાઉસમાં 16 વિદ્યાર્થીઓ હાજર હતા, 2 લોકોએ 200 પ્રશ્નો બુકમાંથી સોલ્વ કરાવ્યા હતા,સાબરકાંઠાથી પેપર સુરેન્દ્રનગર, વડોદરા, ભાવનગર, હિંમતનગર પહોંચ્યું હતું, સુરેન્દ્રનગરમાં 1, વડોદરામાં 2, ભાવનગરમાં 3 અને પ્રાંતિજ કાણિયોલમાં 3-3 લોકો સુધી પેપર પહોંચ્યું, પરીક્ષાના દિવસે 10:32 અને 10:36 કલાકે સોશિયલ મીડિયામાં પેપર વાયરલ થયું,હેડક્લાર્કનું પેપર 72 લોકો સુધી પહોંચી ગયું હતું. મધુરી મનસુખ વસા સંસ્થાના એક વિદ્યાર્થીને પરીક્ષા પછી સ્કૂલ બહારથી જવાબ લખેલી ચબરખી મળી હતી. સમગ્ર કૌભાંડમાં રૂ. 6 લાખથી 12 લાખ સુધી ઉઘરાણું કરાયાનો આરોપ છે. ગૌણ સેવા પરીક્ષાના દિવસે સચિવને પણ ટેલીફોનિક જાણ કર્યાનો દાવો કર્યો છે