અમદાવાદ / સોશિયલ મીડિયાનો નકલી જ્યોતિષ ઝડપાયો, પ્રેમભગ્ન થયેલાને બનાવતો શિકાર, 'ઇન્સ્ટા' બાબાના કાંડથી લોકો હચમચ્યાં

• નકલી જ્યોતિષની ઓળખ આપી છેતરપિંડી કરતો ઝડપાયો
• પોલીસે આરોપી પાસેથી બે લાખનું સોનું કબજે કર્યું છે
• પ્રેમી કે પ્રેમિકા સાથે પુનઃમિલન કરાવવા માટે વિધી બહાને ઠગાઈ કરતો

સોશિયલ મીડિયા પર જ્યોતિષ તરીકેની ઓળખ આપી પ્રેમમાં નાસીપાસ થયેલા યુવક-યુવતીઓ સાથે ઠગાઈ કરતા એક નકલી જ્યોતિષની અમદાવાદ ક્રાઈમ બ્રાન્ચે ધરપકડ કરી છે. બદનામીના ડરથી લોકો ફરિયાદ ન કરતા હોવાનો લાભ લઈ આરોપી ઠગાઈ કરતો હતો. પોલીસે આરોપી પાસેથી બે લાખનું સોનું કબજે કરી છ માસમાં કેટલા લોકોને ભોગ બનાવ્યા તે અંગે તપાસ શરૂ કરી છે. આ ઇન્સ્ટા બાબાના અનેક કાંડ બહાર આવી શકે છે.

આરોપી મૂળ મોઢેરાનો વતની
આરોપીનું નામ રાજેન્દ્ર ઉર્ફે રાજુ ભાર્ગવ જે મૂળ મોઢેરાનો વતની છે. આરોપી વિરુદ્ધ બે દિવસ અગાઉ અમદાવાદના સાબરમતી પોલીસ સ્ટેશનમાં એક મહિલાએ છેતરપિંડીની ફરિયાદ નોંધાવી છે. ફરિયાદમાં જણાવેલી હકીકત મુજબ આરોપી રાજુ ભાર્ગવ જ્યોતિષ તરીકે ઓળખ આપી સોનાના દાગીના પર વિધિ કરવાના બહાને રૂ. 2 લાખની કિંમતનું 40 ગ્રામ સોનું મેળવી ઠગાઈ કરી છે. જોકે ફરિયાદ નોંધાતા ક્રાઈમ બ્રાન્ચે તેની તાત્કાલિક ધરપકડ કરી છે. 

વિધી કરવાના બહાને ઠગાઈ કરતો
પોલીસે રાજેન્દ્ર ઉર્ફે રાજુ ભાર્ગવની ધરપકડ કરી પૂછપરછ કરતા હકીકત સામે આવી કે instagram અને facebook જેવા સોશિયલ મીડિયાના માધ્યમથી પ્રેમમાં નાસીપાસ થયેલા અથવા નિષ્ફળ રહેલા યુવક યુવતીઓનો સંપર્ક કરતો અને પ્રેમી કે પ્રેમિકા સાથે પુનઃમિલન કરાવવા માટે વિધી કરવાના બહાને ઠગાઈ કરતો હતો. રાજેન્દ્ર વિધિ કરવા માટે યુવક યુવતીઓએ પહેરેલા સોનાના દાગીનાની માંગણી કરતો અને સોનાના દાગીના પર વિધિ કરવાથી પ્રેમમાં સફળતા મળશે તેવી બાહેધરી આપી સોનુ લઈ ફરાર થઈ જતો હતો. 

ક્રાઇમ બ્રાન્ચે આરોપીના રિમાન્ડ મેળવી વધુ તપાસ શરૂ કરી 
ક્રાઈમ બ્રાન્ચની પૂછપરછમાં એવી હકીકત પણ સામે આવી કે આરોપી રાજેન્દ્ર ઉર્ફે રાજુ ભાર્ગવેએ સંખ્યાબંધ લોકો સાથે એજ મોડેશ ઓપરેન્ડીથી ઠગાઈ કરી છે. પરંતુ સમાજમાં બદનામીના ડરે કોઈ યુવક કે યુવતીઓ ફરિયાદ કરતા ન હતા. તેથી જ પોલીસે ભોગ બનનાર લોકોને અપીલ કરી છે કે, આવા પાખંડી અને ધુતારા જ્યોતિષ વિરુદ્ધ ફરિયાદ નોંધાવે જેથી કરીને અન્ય કોઈ ભોગ ન બને. હાલમાં ક્રાઇમ બ્રાન્ચે આરોપીના રિમાન્ડ મેળવી વધુ તપાસ શરૂ કરી છે.