હાથરસમાં દીકરી સાથે જઘન્ય અપરાધ બાદ શહેરમાં ભારે આક્રોશ જોવા મળી રહ્યો છે. રોષે ભરાયેલા લોકો અને પોલીસ વચ્ચે ઘર્ષણ થતાં પરિસ્થિતિ તણાવપૂર્ણ છે.
હાથરસમાં દલિત દીકરી સાથે જઘન્ય કૃત્ય બાદ ચાર આરોપીની ધરપકડ
ગેંગરેપ પીડિતાનું દિલ્હીમાં સારવાર દરમિયાન થયું હતું મોત
હાથરસ પોલીસે મોડીરાતે દબાણપૂર્વક અંતિમ સંસ્કાર કર્યા હોવાનો આરોપ
શહેરમાં ભારે આક્રોશ વચ્ચે પ્રદર્શનકારી અને પોલીસ વચ્ચે ઘર્ષણ
જંગલરાજના આરોપ
હાથરસની દીકરીના શબને રાતોરાત ગુપચુપ રીતે અંતિમ સંસ્કાર મુદ્દે વિરોધ થઇ રહ્યો છે અને આ મામલે પોલીસ પર પણ સવાલો ઉભા થઇ રહ્યા છે. વિપક્ષી દળો યોગી આદિત્યનાથ સરકાર પર સવાલ ઉઠાવી રહ્યા છે અને જંગલરાજના આરોપ લાગી રહ્યા છે. બીજી તરફ પીએમ મોદીએ પણ યોગીને કડક કાર્યવાહી કરવાના આદેશ આપ્યા છે.
Members of the community of #Hathras gang-rape victim, protest in the city demanding justice for her. The protesters also raised slogans against Police and local administration. pic.twitter.com/b3lIz9saMo
હાથરસમાં દીકરી સાથે જે જઘન્ય કૃત્ય કરવામાં આવ્યું તે બાદ લોકોમાં ખૂબ આક્રોશ છે. હાથરસમાં જ્યારે યુપીના મંત્રી ભુપેન્દ્ર ચૌધરી પહોંચ્યા તો તેમણે વિરોધનો સામનો કરવો પડ્યો. દીકરીનું દાહ સંસ્કાર કરવા મુદ્દે અત્યારે દલિત સમુદાર ભભૂકી ઉઠ્યો છે અને બીજી તરફ સફાઈ મજૂર સંઘે પણ સફાઈ કામ બંધ કરી દેવાની જાહેરાત કરી છે.
હાથરસમાં પોલીસ પર પથ્થરમારો
હાથરસમાં પીડિત દીકરીના પરિવારનો આરોપ છે કે પોલીસે દબાણ કરીને અંતિમ સંસ્કાર કર્યું છે જોકે પરિવારજનો છેલ્લીવાર દીકરીને ઘરે લાવવા માંગતા હતા. વિપક્ષ પણ યોગી સરકાર પર આરોપ લગાવી રહ્યું છે એવામાં આક્રોશિત લોકોએ હાથરસમાં પોલીસ પર પથ્થરમારો કર્યો અને તે પોલીસે પણ લોકો પર લાઠીચાર્જ કર્યો હતો.
હાલત તણાવપૂર્ણ
હાથરસમાં રોષે ભરાયેલા લોકોએ શહેરની અંદર બજાર બંધ કરાવી દીધા અને સફાઈકર્મીઓએ પણ કામ બંધ કરીને હડતાળ શરુ કરી દીધી છે. આક્રોશિત લોકોએ ખૂબ પથ્થરમારો કર્યો અને તે દરમિયાન એક વાહનને આગ લગાવવાના પ્રયત્ન પણ કરવામાં આવ્યા. પોલીસ ઘટનાસ્થળે પહોંચી અને લોકો પર લાઠીચાર્જ શરુ કરી દીધો એવામાં હાલમાં ત્યાં હાલત તણાવપૂર્ણ છે.
લોકોમાં પોલીસ વિરુદ્ધ ભારે આક્રોશ છે અને ખૂબ નારાબાજી કરવામાં આવી રહી છે. બીજી તરફ અલીગઢમાં પણ હાથરસ કાંડના કારણે ઉકળાટ છે. સફાઈ મજૂર સંઘ દ્વારા આંદોલન શરુ કરવામાં આવ્યો છે. શહેરની અંદર સફાઈકામ બંધ કરી દેવાયું છે.