સાઉથ આફ્રિકા સામે પ્રથમ ટી-20 મેચ માટે ભારતીય ટીમ ભરપૂર તૈયારી કરી રહી છે. રાહુલ દ્રવિડે પત્રકાર પરિષદ કરી લગભગ ટીમની પ્લેઈંગ ઈલેવનની તસ્વીર પણ સ્પષ્ટ કરી દીધી છે. પહેલી ટી-20માં હાર્દિક પંડ્યા ટીમની પહેલી પસંદ રહેવાના છે.
સાઉથ આફ્રિકા સામે પ્રથમ ટી-20 મેચ માટે ભારતીય ટીમ તૈયાર
પ્લેઈંગ ઈલેવનમાં હાર્દિક પંડ્યાને સ્થાન મળવાનુ લગભગ નક્કી
હાર્દિકની એન્ટ્રીથી વેન્કટેશ ઐયરની કારકિર્દી પર મોટા જોખમના એંધાણ
પંડ્યાએ વધાર્યુ આ ખેલાડીનુ ટેન્શન
પંડ્યાની વાપસી એક યુવાન ખેલાડી માટે મોટુ જોખમ બનવાની છે. આ ખેલાડીની કારકિર્દી પર હવે જોખમના વાદળ મંડાયા છે. રાહુલ દ્રવિડની પત્રકાર પરિષદ બાદ હાર્દિક પંડ્યાને પ્લેઈંગ ઈલેવનમાં જગ્યા મળવાનુ નક્કી મનાઈ રહ્યું છે. ભારતીય ટીમમાં ત્યારથી પંડ્યાની કમી યુવાન ઓલરાઉન્ડર વેન્કટેશ ઐયર પૂરી કરી રહ્યાં હતા. તેઓ આ શ્રેણીમાં પણ ટીમનો ભાગ છે, પરંતુ ઐયર માટે હવે ટીમમાં જગ્યા બનાવવી ખૂબ મુશ્કેલ થવાની છે.
હાર્દિક છે ટીમની પહેલી પસંદ
હાર્દિક પંડ્યા હંમેશા ભારતીય ટીમની પહેલી પસંદ રહ્યાં છે. પંડ્યાની ઈજાને કારણે તેઓ ઘણા સમયથી બહાર હતા. પરંતુ તેમણે આઈપીએલ 2022ની શરૂઆત પહેલા પોતાની ફિટનેસ પર પણ કામ કર્યુ. આ સિઝનથી તેઓ શાનદાર ભૂમિકામાં દેખાયા. આઈપીએલ 2022માં હાર્દિક પંડ્યાએ 487 રન બનાવ્યાં અને 8 વિકેટ પણ લીધી. એવામાં હાર્દિક પંડ્યાની હાજરીથી વેન્કટેશ ઐયરની કારકિર્દી પર મોટુ જોખમ તોળાઈ રહ્યું છે.
ભારતીય ટીમમાં સ્થાન બનાવવુ મુશ્કેલ
વેન્કટેશ ઐયરે આઈપીએલ 2021માં ધમાકેદાર પ્રદર્શન કરી સૌ કોઈનુ ધ્યાન પોતાની તરફ ખેંચ્યુ હતુ. ત્યારબાદ ઐયરે ભારત માટે 2 વન-ડે અને 9 ટી-20 મેચ પણ રમી. પરંતુ આઈપીએલ 2022માં વેન્કટેશ ઐયર સંપૂર્ણ રીતે ફ્લોપ રહ્યાં. આ સિઝનમાં તેમણે 12 મેચોમાં 16.55ની સરેરાશથી માત્ર 182 રન બનાવ્યાં હતા. વેન્કટેશની બેટિંગથી આ સિઝનમાં માત્ર 1 અર્ધસદી જોવા મળી હતી. કંગાળ ફોર્મને પગલે વેન્કટેશ ઐયરને ટીમમાંથી બહારનો માર્ગ બતાવી દેવામાં આવ્યો હતો.