ગુજરાતની અમલદારશાહીમાં આગમી દિવસોમાં મોટા ફેરફાર જોવા મળી શકે છે કારણ કે રાજ્યના મુખ્ય સચિવ હવે નિવૃત્ત થવા જઈ રહ્યા છે. આવામાં નવા વર્ષમાં રાજ્યને નવા ચીફ સેક્રેટરી મળશે તે નક્કી છે. ઉલ્લેખનીય છે કે આ પહેલા ગુજરાત સરકારે રાજ્યના ચીફ સેક્રેટરી અનિલ મુકીમને 6 મહિનાનું એક્સ્ટેંશન આપ્યું હતું.
નવા વર્ષમાં રાજ્યને નવા ચીફ સેક્રેટરી મળશે
ફેબ્રુઆરી મહિનામાં રીટાયર થઈ રહ્યા છે અનિલ મુકિમ
નવા ચીફ સેક્રેટરી માટે ત્રણ મુખ્ય નામો ચર્ચામાં
નવા વર્ષમાં ગુજરાતને નવા મુખ્ય સચિવ મળશે કારણ કે ગુજરાતના હાલ ચીફ સેક્રેટરી અનિલ મુકીમને 6 મહિનાનું એક્સ્ટેનશન મળ્યું હતું તેમના આ એક્સટેન્શન બાદ હવે ફેબ્રુઆરી 2021સુધી CSના પદે છે. જેથી હવે માર્ચમાં રાજ્યને નવા મુખ્ય સચિવ મળશે.
કોરોનાને કારણે અપાયું હતું એક્સ્ટેન્શન
નોંધનીય છે કે ગુજરાત સરકારે રાજ્યમાં કોરોનાની સ્થિતિ અને આર્થિક હાલતને ધ્યાનમાં રાખતા મુકીમને આ પદ માટેના સૌથી યોગ્ય અધિકારી ગણીને તેમને પદ પર જાળવી રાખવાનો નિર્ણય કર્યો હતો. તેઓને દિલ્હીથી ચીફ સેક્રેટરી તરીકે ગુજરાત મૂકવામાં આવ્યા હતા જેથી એવું માનવામાં આવે છે કે તેઓને દિલ્હીમાં કેન્દ્ર સરકાર સાથે નિકટના સંબંધો છે.
એવામાં હવે ફરીથી રાજ્યના અધિકારીઓમાં મુખ્ય સચિવના પદને લઈને ચર્ચાઓ તેજ થઈ ગઈ છે તથા રાજયના નોકરશાહ વર્ગમાં મુખ્ય સચિવ પદ પર નવા કયા અધિકારીની વરણી થશે તેને લઈને ઉત્સુકતા જોવા મળી રહી છે એવામાં સરકાર અમુક નામો પર વિચાર કરી રહી હોવાનું મનાય છે.
અનિલ મુકીમની જગ્યા પર આ નામો ચર્ચામાં
અનિલ મુકીમનો 6 મહિનાનો કાર્યકાળ વધારી દેવામાં આવ્યો પરંતુ તે સમયે ઘણા બધા નામો મુખ્યસચિવના પદ માટે રેસમાં હતા.જેમાં એડિશનલ ચીફ સેક્રેટરી (રેવન્યુ) પંકજ કુમાર, એડિશનલ ચીફ સેક્રેટરી (પર્યાવરણ અને વનવિભાગ) ડો રાજીવ કુમાર ગુપ્તા, એડિશનલ ચીફ સેક્રેટરી (લેબર અને એમ્પ્લોયમેન્ટ), એડિશનલ ચીફ સેક્રેટરી વિપુલ મિત્રા અને અને ડિપાર્ટમેન્ટ ઓફ ઇન્ડસ્ટ્રીયલ પોલિસી ઇન્ટર્નલ ટ્રેડ (DIPP)ના સેક્રેટરી ગુરુપ્રસાદ મહાપાત્રા જેવા અધિકારીઓનો સમાવેશ થાય છે. આ નામો ત્યારે પણ ચર્ચામાં હતા અને સરકાર હવે અનિલ મુકીમના સ્થાને આ નામોમાંથી કોઇ એક પર મહોર મારે તેવી આશા છે.
ત્રણ અધિકારીઑના નામ સૌથી વધારે ચર્ચામાં
જો કે આ પૈકી મુખ્ય સ્પર્ધા ત્રણ અધિકારીઓ એટલે કે પંકજ કુમાર, ડો રાજીવ ગુપ્તા અને ગુરુપ્રસાદ મહાપાત્રા વચ્ચે છે. જો કેન્દ્ર સરકાર તેમના પોતાના અધિકારીને રાજ્યમાં મુકવાની ઈચ્છા રાખતી હોય તો મહાપાત્રા નવા ચીફ સેક્રેટરી બનવા માટે ફેવરિટ મનાય છે. તેઓ પાસે માર્ચ 2021થી માર્ચ 2022 સુધીનો સમય હશે ત્યાર બાદ તેઓ નિવૃત્ત થશે.