ગુજરાતના પરણિત IAS અધિકારી ગૌરવ દહિયાના પ્રેમ પ્રકરણની ચર્ચાએ સમગ્ર રાજ્યમાં ચકચાર મચાવી છે ત્યારે આ મુદ્દે યુવતી અને IAS ઓફિસરે સામ-સામે ફરિયાદો કરી છે. આ પ્રકરણમાં ચર્ચાસ્પદ બનેલા આઈએએસ ગૌરવ દહિયાએ પોતે સાવ નિર્દોષ છે તેવી વાત ઉચ્ચારી છે.
તેમણે જણાવ્યું હતું કે, દિલ્હીની તે યુવતીએ જ તેમને ફેસબુકના માધ્યમથી ફસાવી રિલેશનશિપ માટે દબાણ કર્યું હતું. જ્યારે બીજી તરફ યુવતીનું કહેવું છે કે, દહિયાએ તેને કોઇ સોફ્ટ ડ્રિન્ક પીવડાવી અર્ધબેભાન કરીને તેની બીભત્સ તસવીરો અને વીડિયો ઉતારી લીધા હતા. ત્યારબાદ તેને વાયરલ કરવાની ધમકી આપીને લગ્ન કરવા માટેનું દબાણ કર્યું હતું અને 2018માં તેણી સાથે લગ્ન પણ કર્યા હતા.
IAS અધિકારી ગૌરવ દહિયાનો ખુલાસો
IAS અધિકારી ગૌરવ દહિયા VTV સાથે ખાસ વાતચીત કરતા જણાવ્યું હતું કે, યુવતીના આક્ષેપો પાયાવિહોણા છે. યુવતી મને બ્લેકમેઈલ કરી રહી છે. આ સાથે જ દિલ્હીમાં મકાન લઈ આપ્યું તે એક તપાસનો વિષય છે. દહિયાએ વધુમાં કહ્યું કે, જે પણ ફરિયાદ થઈ છે તે પાયાવિહોણી છે.
દિલ્હીમાં MBBSનો અભ્યાસ કરે છે મહિલા
ઉલ્લેખનીય છે કે, રાજધાની દિલ્હીમાં MBBSનો અભ્યાસ કરતી આ યુવતી સ્થાનિક વિમેન સેલમાં પોતાની આપવીતી જણાવતા કહ્યું હતું કે, ગુજરાતના IAS અધિકારી ગૌરવ દહિયા પરણિત હોવા છતાં તેમણે તેને બીજા લગ્ન કરવા માટે સતત દબાણ કરી મારી સાથે છેતરપીંડી આચરી છે.
2018માં થયાં લગ્ન
આ અધિકારીએ સોફ્ટ ડ્રિન્ક પીવડાવી અર્ધબેભાન કરી તેની બિભત્સ તસવીરો અને કેટલાક વીડિયો ઉતાર્યા છે. આ સાથે જ તેને વાયરલ કરવાની તેમજ જાનથી મારી નાખવાની ધમકીઓ આપી લગ્ન માટે દબાણ કરતા અંતે 2018માં તેઓ લગ્નગ્રંથિએ જોડાયા હતા.