પ્રતિબદ્ધતા / રસ્તા રિપેર કરવાની સરકારને મળી 30 હજાર ફરિયાદો, તાબડતોબ આટલા રોડ પર મરાયા થિગડાં

• એક સપ્તાહમાં મળી 30 હજાર ફરિયાદ
• માર્ગ અને મકાન વિભાગને મળી ફરિયાદ
• બાવીસ હજાર ફરિયાદનું કરાયું  નિરાકરણ

 રાજ્યમાં નવી સરકાર આરુઢ થયાના 15 જ દિવસમાં સરકારના માર્ગ-મકાન વિભાગની રસ્તા સમારકામ ઝૂંબેશને વ્યાપક પ્રતિસાદ મળ્યો છે. બિસ્માર રોડ-રસ્તાને લઈને રાજ્ય સરકારના આ અભિયાનને છેલ્લા એક સપ્તાહમાં 30 હજાર ફરિયાદો મળી છે. જેમાંથી માર્ગ-મકાન વિભાગે 22 હજાર રસ્તાના પેચ વર્ક પૂર્ણ કરી દઈને કામ આટોપી લીધું છે. આ અભિયાન અંતર્ગત રાજ્ય સરકારે એલાન કર્યું હતું કે, નવરાત્રી પૂર્ણ થયા સુધીમાં તમામ ફરિયાદોનું નિરાકરણ લાવવામાં આવશે.જો કે, નવરાત્રી દરમિયાન પણ કેટલાક વિસ્તારોમાં છૂટો છવાયો વરસાદ રસ્તા સમારકામમાં વિઘ્ન રૂપ છે જ.  આમ છતાં,રાજ્ય સરકારની પ્રતિબદ્ધતા સમય મર્યાદામાં રાજ્યના રોડ-રસ્તા રીસરફેસ કરવાની પણ છે જ.

આઠ હજાર રસ્તાઓનું કામ બે દિવસમાં પૂર્ણ થશે 

રાજ્યના માર્ગ અને મકાન વિભાગના મંત્રી પુર્ણેશ મોદી એ એલાન કર્યું હતું કે, નવરાત્રી દરમિયાન 10 ઓક્ટોબર સુધીમાં રાજ્યભરના બિસ્માર અને ખાડા-ખબડા વાળા રોડ રસ્તાનું સમારકામ થઇ જશે. રાજ્ય સરકારે આવી ફરિયાદ માટે એક વોટ્સઅપ નંબર પણ જારી કરી,આ પ્રકારની ફરિયાદો મોકલવા જણાવ્યું હતું. આ મહાઅભિયાનને બહોળો પ્રતિસાદ મળતો હોય તેમ રાજ્યભરમાંથી લાગ્બહ્ગ 30 હજાર ફરિયાદો  માર્ગ-મકાન વિભાગને મળી હતી.રાજ્યના  જામનગર, અમરેલી, રાજકોટ, જૂનાગઢ જિલ્લાઓમાંથી સૌથી વધુ ફરિયાદો ભારે વરસાદના કારણે રોડ-રસ્તા તૂટી ગયાની ફરિયાદો મળી હતી. આગામી બે દિવસમાં 8 હજાર ફરિયાદના રોડનું પેચ વર્ક પૂર્ણ કરવાનું લક્ષ્યાંક છે. એક સપ્તાહ અભિયાન પછી રોડ રસ્તાની ફરિયાદમાં ઘટાડો થતા હવે પ્રતિ દિવસ 1000 ફરિયાદ મળે છે. વિભાગનો લક્ષ્યાંક છે કે, આગામી બે દિવસની અંદર જ બાકી રહેતી 8 હજાર ફરિયાદોનો નિકાલ પણ આવે. આમ છતાં હજુ રવિવાર સુધી હવામાન વિભાગે રાજ્યના કેટલાક વિસ્તારોમાં વરસાદની આગાહી કરી છે ત્યારે, બે-એક દિવસ મોડું પણ કાર્ય પૂર્ણ થઇ જશે.રાજ્યમાં જ્યાં રસ્તાઓ ધોવાઈ ગયા છે કે, ખાડા પડી ગયા છે એ રસ્તાઓમાં મોટા ભાગે તમામ જવાબદારી વાળા રસ્તા છે.આ જવાબદારી એટલે કોન્ટ્રેક્ટરની જવાબદારી બને છે કે સમારકામ કરાવી આપવા. એટલે રાજ્ય સરકારે જવાબદાર વ્યક્તિ/કોન્ટ્રેકટરને પણ રસ્તા સમારકામ અંગે તાકીદ કરી દીધી છે.