ટ્રાફીકના નિયમોનું ચુસ્તતા પૂર્વક પાલન કરાવવા માટે ટ્રાફીક પોલીસે કમર કસી છે. ગાંધીનગરમાં ટ્રાફિક પોલીસની ડ્રાઈવ યોજાઈ હતી જેમાં SP કચેરીમાં આવતા પોલીસકર્મીઓને પણ ટ્રાફિક પોલીસે દંડ ફટકાર્યો હતો.
ગાંધીનગરમાં SP કચેરી પાસે ટ્રાફિક ડ્રાઈવ કરવામાં આવી
પોલીસકર્મીઓ સામે પણ લાલ આંખ કાર્યવાહી
30થી વધુ પોલીસકર્મીઓને દંડ ફટકાર્યો
ગાંધીનગર ટ્રાફીક પોલીસે પોલીસકર્મીઓ ઉપર પણ લાલ આંખ કરી છે. આમ જનતા હોય કે વીઆઈપી તમામ માટે નિયમો એક છે. આજે પોલીસકર્મીઓને દંડ ફટકારીને એ સાબીત કરી દીધુ હતુ.
રાજ્યમાં વાહન વ્યવહારના નવા નિયમોનો અમલ આગામી 16 સપ્ટેમ્બરથી થશે. ટ્રાફીકના નિયમો મામલે કોઈ પર રહેમ નજર નહીં રખાય તેવો મેસેજ ગાંધીનગર ટ્રાફીક પોલીસે આપી દીધો છે. સીટબેલ્ટ, હેલમેટ સહિતના નિયમોનું પાલન ન કરનારા પોલીસકર્મીઓને પણ બક્ષવામાં નહોતા આવ્યા. પોલીસકર્મીઓને પણ ટ્રાફિક પોલીસે દંડ ફટકાર્યો હતો. 30 જેટલા પોલીસ કર્મીઓને ટ્રાફિક નિયમોનું પાલન ન કરવા માટે મેમો અપાયા હતા.
નવા નિયમમા રાજ્ય સરકારે 400 સુધારા કર્યા છે
મુખ્યમંત્રી ના કહેવા મુજબ , નિયમોનો અમલ લોકોને હેરાન કરવા નહી પરંતુ નાગરિકોની સલામતી સેફ્ટી માટે છે. રાજ્યમાં આ નિયમોનો સખ્તાઈથી અમલ કરવામાં આવશે. નવા નિયમ પ્રમાણે, હવે વાહનચાલકે લાયસન્સ સહિતના જરૂરી દસ્તાવેજો ડિજિટલ ફોર્મમાં એટલે કે મોબાઈલ ફોનમાં સેવ કરેલા હશે અને સંબંધિત અધિકારી માગે ત્યારે તે બતાવશે તો એ દસ્તાવેજો માન્ય ગણાશે એવી સૂચના પણ આપી દેવામાં આવી છે. કેન્દ્ર સરકારે નક્કી કરેલા ટ્રાફિકના દંડની રકમ કરતાં ગુજરાતમાં દંડની રકમમાં ઘટાડો કરવામાં આવ્યો છે. જેમાં કલમ 200 હેઠળ માંડવાળની સત્તા હેઠળ રાજ્ય સરકારે આ સુધારો કર્યો છે. નવા નિયમોમાં આશરે 400 જેટલા સુધારા કરવામાં આવ્યાં છે.
(તસવીર પ્રતિકાત્મક )