ગુજરાતમાં યુવાધનને ડ્રગ્સ દ્વારા બરબાદ કરવાનું ષડયંત્ર ચાલી રહ્યું છે. ડ્રગ્સની હેરાફેરી, ડ્રગ્સનું સેવન અને ડ્રગ્સનું વેચાણ ગુજરાતમાં મોટાપાયે થતું હોવાનું ખુલી રહ્યું છે. ત્યારે જાણો છેલ્લા કેટલાક મહિનાઓમાં ઝડપાયેલા ડ્રગ્સના ચોંકવનારા આંકડા...
ગુજરાતનો દરિયો ડ્રગ્સ હેરાફેરી માટે હૉટફેવરીટ
ગુજરાત ડ્રગ્સ માટેનું એપી સેન્ટર બની રહ્યું છે
મોટી શહેરોથી લઇને ગામડાઓ સુધી ડ્રગ્સના કનેક્શન
છેલ્લા બે મહિનાની અંદર ગુજરાત ડ્રગ્સ મામલે ચર્ચાનું કેન્દ્ર બન્યું છે. કારણકે પંજાબની જેમ જ ગુજરાતમાં પણ અનેક જગ્યાએથી ડ્રગ્સનો મોટા જથ્થો અચાનક ઝડપાવવા લાગ્યો છે. આશરે દર 3 દિવસે ડ્રગ્સ ઝડપાવાની કે ડ્રગ્સના આરોપીઓના ઝડપાવાની ઘટનાઓ સામે આવતી રહે છે. ગુજરાતના ખૂણે ખૂણે ડ્રગ્સનો વેપાર અને સેવન થઇ રહ્યું હોય તેવું લાગી રહ્યું છે. ગુજરાતના વિવિધ વિસ્તારોમાંથી છેલ્લા કેટલાક મહિનામાં અંદાજિત 24,800 કરોડનું ડ્રગ્સ ગુજરાત પોલીસ અને નાર્કોટિક્સ સેલ દ્વારા ઝડપી પાડવામાં આવ્યું હોવાની માહિતી મળી રહી છે.
આફઘાનિસ્તાન, પાકિસ્તાન જેવા દેશોમાંથી દરિયાઇ માર્ગે ગુજરાતમાં ડ્રગ્સ લાવવામાં આવી રહ્યું છે. ગુજરાતથી બીજા રાજ્યો અને દેશોમાં ડ્રગ્સ મોકલવામાં આવી રહ્યું છે. તો સાથે ગુજરાતમાં પણ ડ્રગ્સનું સેવન વધ્યું હોવાના પણ કેટલાક કેસમાં પૂરાવા સામે આવ્યા છે. તો ડ્રગ્સની હેરાફેરમાં વિદ્યાર્થીઓ અને મહિલાઓનો ઉપયોગ થઇ રહ્યો છે. બીજી તરફ ગુજરાતનું યુવાધન પણ મોટાપાયે ડ્રગ્સનું સેવન કરતું હોવાનું સામે આવ્યું છે.
ગુજરાતમાં સૌથી વધુ આશરે 21 હજાર કરોડની કિંમતનું 3 હજાર કિલો ડ્રગ્સ કચ્છના મુન્દ્રામાંથી ઝડપાયું હતું. ત્યારબાદ દ્વારકામાંથી અંદાજે 700 કરોડનું ડ્રગ્સ ઝડપાયું હતું. તો પોરબંદરમાં પણ 150 કરોડથી વધુનું ડ્રગ્સ ઝડપી પાડવામાં આવ્યું હતું. તો વિવિધ જગ્યાએથી બાકીનું ડ્રગ્સ ઝડપાયું હતું. જેમાં આજે દ્વારકામાં પકડાયેલું રૂપિયા 350 કરોડનું 66 કિલો ડ્રગ્સ પણ સામેલ છે. છેલ્લા કેટલાક મહિનાઓમાં જુઓ કયા જિલ્લામાંથી કેટલો ડ્રગ્સનો જથ્થો ઝડપાયો છે.
સુરતમાં અફીણની હેરાફેરીમાં વિદ્યાર્થીનો ઉપયોગ કરાયો હોવાનું સામે આવ્યું છે.સુરતમાં એક વિદ્યાર્થી બે કિલોના અફીણના જથ્થા સાથે ઝડપાયો પોલીસ પૂછપરછમાં વિદ્યાર્થીઓ અફીણની ડિલીવરી કરતા હોવાનું બહાર આવ્યું છે. આ અફીણ રાજસ્થાનના ચિત્તોડગઢથી સુરત લાવવામાં આવ્યું હતું. જેને વિદ્યાર્થીઓ સ્કૂલ બેગમાં છુપાવીને તેની હેરાફેરી કરતા હતા. જો કે પુણા પોલીસને શંકા જતા નિયોલ ચેકપોસ્ટ ઉપરથી વિદ્યાર્થીઓની પૂછપરછ કરવામાં આવી હતી. જેમાં વિદ્યાર્થીઓની બેગની તલાસી લેતા વિદ્યાર્થીની સ્કૂલ બેગમાંથી બે કિલો અફીણ મળી આવ્યું હતું. ધોરણ 9ના વિદ્યાર્થીના સ્કૂલ-બેગમાં અંદાજે 1.98 લાખની કિંમતનો 2 કિલોગ્રામ જેટલો અફીણનો જથ્થો હતો. તે રાજસ્થાનથી સુરતમાં ડિલિવરી કરવા આવી રહ્યો હતો.
સુરત(તા.12-2-2021) : 40 કિલો ગાંજો ઝડપાયો
સુરત SOGએ 40 કિલો ગાંજો પકડી પાડ્યો છે. 4 લાખની કિંમતનો ગાંજો જપ્ત કરાયો છે. ગાંજા સાથે 4 આરોપીની SOGએ ધરપકડ કરી છે. જેમાં 2 મહિલા અને 2 પુરૂષ આરોપી છે. આ ગાંજો ટ્રેન મારફત ઓરિસ્સાથી સુરત લાવ્યા હતા.
સુરતના સરથાણા વિસ્તારમાંથી MD ડ્રગ્સની લેબોરેટરી પકડાવાના મામલે પોલીસને વધુ એક સફળતા મળી છે. પોલીસે કોસાડ આવાસમાં રહેતા ત્રીજા આરોપી ફૈઝલની ધરપકડ કરી છે. ફૈઝલ ડ્રગ્સના મામલે જૈમીન સવાણીની મદદ કરતો હતો. રાજસ્થાનથી ડ્રગ્સ લાવનાર પ્રવિણ વાનાની પહેલા જ પોલીસે ધરપકડ કરી છે. સિન્થેટિક MD ડ્રગ્સ બનાવનાર જૈમીનની પણ પોલીસે ધરપકડ કરી છે. આ કેસમાં રાજસ્થાનથી ડ્રગ્સ મોકલનાર આશુરામ હજુ પોલીસ પકડથી દૂર છે.
સુરત(25-9-2021) : કડોદરા પાસે 19.62 લાખ રૂપિયાનું મેફેડ્રોન ડ્રગ્સ ઝડપાયું
ક્રાઈમ બ્રાન્ચે કડોદરા નિયોલ ચેકપોસ્ટ પરથી સુરત ક્રાઈમ બ્રાન્ચની ટીમે 19.62 લાખ રૂપિયાના ડ્રગ્સને ઝડપી પાડ્યું હતું. ગાડીમાં મેફેડ્રોન ડ્રગ્સ લાવતા ત્રણ આરોપીને પણ ઝડપી પડાયા હતા. પોલીસે આરોપી પાસેથી 196.2 ગ્રામ ડ્રગ્સ કબજે કર્યું હતું. આરોપીઓ આ ડ્રગ્સ મુંબઈથી લાવ્યા હોવાનું સામે આવ્યું હતું.
વલસાડના વાપી GIDC વિસ્તારમાં આવેલા ડુંગરી ફળિયામાંથી ગુજરાત નાર્કોટિક્સ કન્ટ્રોલ બ્યુરોની ટીમે દરોડા પાડીને 4.5 કિલો MD ડ્રગ્સ, 85 લાખ રોકડ સાથે 2 શખ્સોને ઝડપી પાડ્યા હતા.
સૌરાષ્ટ્રમાં ક્યારે કેટલું ઝડપાયું ડ્રગ્સ?
રાજકોટ(તા.12-2-2021) : ગોંડલમાં 10.6 મિલિગ્રામ ડ્રગ્સ સાથે 2 ઝડપાયા
રાજકોટના ગોંડલથી 10.6 મિલિગ્રામ ડ્રગ્સ સાથે બે શખ્સને SOGએ ઝડપી પાડ્યા છે. 1 લાખથી વધુ કિંમતનું ડ્રગ્સ ઝડપાયું છે. અસરફ સોલંકી અને જુમ્મા લંઘા નામના આરોપીને મુદ્દામાલ સાથે ઝડપીને આગળની કાર્યવાહી હાથ ધરવામાં આવી રહી છે. આરોપીઓ નશીલા પદાર્થનું વેચાણ કરી રહ્યા હતા.
રાજકોટમાં મેફેડ્રોન ડ્રગ્સ સાથે કચ્છના વતની મુસ્તાક અબ્દુલ ધીસોરાની ધરપકડ કરવામાં આવી છે. પોલીસે મુસ્તાક પાસેથી 70 હજારનું 7 ગ્રામ મેફેડ્રોન ઝડપ્યુ હતું. સોમનાથ-વેરાવળથી ડ્રગ લાવ્યાની SOG સમક્ષ કબૂલાત કરી હતી.
જામનગરથી ઝડપાયેલા રૂ.10 કરોડના ડ્રગ્સના મામલે તપાસ દરમિયાન ચોંકાવનારા ખુલાસા સામે આવ્યા છે. આ ઝડપાયેલા ડ્રગ્સની જખૌના દરિયામાં ડિલિવરી થઈ હતી. આ જખૌના દરિયામાંથી રહીમ હાજી અકબર ડ્રગ્સ લાવ્યો હતો. અને તેની સાથે અનવર પટેલીયા પણ સામેલ હતો. આ અગાઉ પકડાયેલા અનવર પટેલીયા જખૌથી ડ્રગ્સ લાવવામાં પણ સામેલ હતો. રૂપિયા 10 કરોડનું હેરોઈન લાવીને બેડી મરીન એરિયામાં સંતાડાયુ હતું.
ગુજરાત ATSએ 120 કરોડની કિંમતનું 24 હેરોઈનનો જથ્થો પકડી લીધો હતો. આ જથ્થો દ્રારકાના કલ્યાણપુર તાલુકાના નવાદ્રા બંદરથી ઝડપાયો છે. ATSએ રાજસ્થાન અને જોડિયાથી 3 આરોપીઓની ધરપકડ કરી હતી. જેમાં પકડાયેલા આરોપી જબ્બારે ડ્રગ્સ છુપાવ્યાની કબુલાત કરી હતી ત્યાર બાદ ATSએ દ્રારકાના કલ્યાણપુરા તાલુકાના નાવદ્રાના અનવર ઉર્ફે અનુમુસા પટેલીયાના ઘરે છુપાવેલા ડ્રગ્સના જથ્થાને ઝડપી પાડ્યો હતો. 12 કિલો હેરોઈનની રાજસ્થાનમાં ડિલવરી કરવામાં આવી હતી.
ATS દ્વારા મોરબીના ઝીંઝુડા ગામેથી ડ્રગ્સ ઝડપી પાડવામાં આવ્યું હતું. આ ડ્રગ્સ કેસમાં ત્રણ આરોપીઓની ધરપકડ કરવામાં આવી હતી. આ ત્રણેય આરોપીઓને આજે મોરબીની કોર્ટમાં રજૂ કરવામાં આવશે. ATS દ્વારા 24 કલાક કામગીરી કરીને 600 કરોડનું ડ્રગ્સ ઝડપી પાડવામાં આવ્યું હતું. તમામ આરોપીઓને હાલ મોરબી જિલ્લામાં જ રાખવામાં આવ્યા છે.
દેવભૂમિ દ્વારકા જિલ્લામાં ખંભાળિયા હાઈવે પરથી ડ્રગ્સનો જથ્થો મળી આવ્યો હતો. જેમાં ખંભાળિયા આરાધના ધામ પાસે કારમાંથી અંદાજિત 66 કિલોનો ડ્રગ્સનો જથ્થો ઝડપાયો હતો. જેની કિંમત 350 કરોડથી વધુની જણાવાઈ રહી છે. આ ડ્રગ્સ સમુદ્ર રસ્તે આવી રહ્યું હોવાની બાતમી મળી હતી. જેમાં દ્વારકા SOG અને ગુજરાત ATS દ્વારા સંયુક્ત રીતે તપાસ કરવામાં આવી રહી છે. આ અગાઉ મુદ્રા પોર્ટ પર પણ ડ્રગ્સનો મોટા પ્રમાણમાં જથ્થો ઝડપાયો હતો.
પોરબંદરનાં દરિયામાંથી ૧૫૦ કરોડના ડ્રગ્સ સાથે પકડાયેલા ૭ ઈરાનીઓને પોરબંદર લાવવામાં આવ્યા બાદ સુરક્ષા એજન્સીઓએ ૩૦ કિલોગ્રામ હેરોઈનનો જથ્થો કબજે કરી સઘન પુછતાછ હાથ ધરી છે. 'જુમા હુસેન' બોટના આ ખલાસીઓ પાસેથી હેરોઈનનો જથ્થો કયાંથી આવ્યો? કોને મોકલવાનો હતો? ડ્રગના હેરાફેરી પ્રકરણમાં કોણ - કોણ સંડોવાયું છે? તેની વિગતો પુછપરછ બાદ બહાર આવે તેવી સંભાવના સુત્રોએ દર્શાવી હતી.
ગુજરાત દરિયાઈ સીમા(19-9-2021) : ATSએ 250 કરોડનો હેરોઈનનો જથ્થો ઝડપાયો
ગુજરાત ATS અને ભારતીય કોસ્ટ ગાર્ડ દ્વારા સંયુક્ત ઓપરેશન હાથ ધરાયું હતું. જેમાં ભારતીય જળ સીમામાંથી અંદાજીત રૂપિયા 250 કરોડના હેરોઇન સાથે 7 ઈરાની નાગરિકોની ધરપકડ કરવામાં આવી હતી. ભારતીય જળ સીમામાંથી 50 કિલો હેરોઇન ઝડપી પાડ્યું હતું. ગુજરાત ATSને બાતમી મળી હતી કે, મોટી માત્રામાં ગુજરાતમાં ડ્રગ્સ પહોંચાડવામાં આવી રહ્યું છે. જે માહિતીના આધારે ગુજરાત ATSએ કાર્યવાહી કરી હતી.
કચ્છના ભુજમાંથી 12 કિલોગ્રામ ચરસ ઝડપાયું છે. ડ્રગ્સ જથ્થા સાથે બે આરોપી ઝડપાયા છે. પશ્ચિમ કચ્છ SOGએ કાર્યવાહી કરી છે. તો ડ્રગ્સ દરિયાઈ વિસ્તારમાં તણાઈ આવ્યાનુ પ્રાથમિક અનુમાન લગાવાયું છે. આ અંગે વધુ તપાસ હાથ ધરાઈ રહી છે.
કચ્છના મુન્દ્રા પોર્ટ પરથી 21,000 કરોડનું 3,000 કિલો ડ્રગ્સ ઝડપાયું
કચ્છના મુન્દ્રા પોર્ટમાં ટેલ્કમ પાવડરની આડમાં અંદાજે 21 હજાર કરોડની કિંમતનો 3 હજાર કિલો હેરોઈનનો જથ્થો ઝડપી પાડવામાં આવ્યો હતો. DRIની ટીમે મુન્દ્રામાં આ હેરોઈનનો જથ્થો પકડી પાડ્યો હતો, જે અત્યાર સુધીનો મળી આવેલો સૌથી મોટો ડ્રગ્સનો જથ્થો હતો.
કચ્છ(તા.17-4-2021) : આંતરરાષ્ટ્રીય દરિયાઈ સરહદે 150 કરોડના હેરોઈન સાથે 8 પાકિસ્તાની ઝડપાયા
આંતરરાષ્ટ્રીય દરિયાઈ સરહદે 150 કરોડના હેરોઈન સાથે 8 પાકિસ્તાની શખ્સો ઝડપાયા હતા. ભુજની સ્પેશિયલ NDPS કોર્ટે ગુનાની ગંભીરતા સમજી આરોપીઓના 12 દિવસના રિમાન્ડ મંજૂર કર્યા હતા. આરોપીઓની કસ્ટડી ATS ગુજરાતને સોંપાઈ હતી. પકડાયેલા હેરોઇનની કિંમત 150 કરોડ આંકવામાં આવી હતી. હેરોઈનના પેકેટ પાકિસ્તાની બોટમાં યુક્તિપૂર્વક છુપાવાયા હતા.
મધ્ય ગુજરાતમાં ક્યારે કેટલું ઝડપાયું ડ્રગ્સ?
અમદાવાદ બોપલ હાઈપ્રોફાઇલ ડ્રગ્સ કાંડ
અમદાવાદના બોપલ હાઇપ્રોફાઇલ ડ્રગ્સ કાંડનો મામલો સામે આવ્યો હતો. મુખ્ય આરોપી વંદિત પટેલની પૂછપરછમાં અનેક લોકોના નામ સામે આવ્યા છે. તો કેટલાક ડ્રગ્સ પેડલરોને પણ ઝડપી પાડવામાં આવ્યા છે.
અમદાવાદમાં ક્રાઇમ બ્રાન્ચે 25 લાખની કિંમતનું 250 ગ્રામ ડ્રગ્સ ઝડપ્યું હતું. આ સાથે બે ડ્રગ્સ માફિયાઓને ઝડપી પાડ્યા હતા. ઝડપાયેલા બન્ને આરોપીઓ રાજસ્થાનથી સરકારી ST બસમાં ડ્રગ્સનો જથ્થો લઈને અમદાવાદ આવવા માટે નીકળ્યા હતા, પરંતુ પોલીસે જાણકારીના આધારે બન્નેને MD ડ્રગ્સ સાથે ઝડપી પાડ્યા હતા.
અમદાવાદમાં બે સ્થળેથી ડ્રગ્સનો જથ્થો ઝડપાયો હતો. ગુજરાત NCBને 20 કરોડનું કોકેઈન ડ્રગ્સ ઝડપાયું હતું. જેની કિંમત 20 કરોડ આંકવામાં આવી હતી. ત્યારે NCB દ્વારા પિલ્લાઇની ધરપકડ કરીને વધુ તપાસ હાથ ધરવામાં આવી હતી. પિલ્લાઈ અગાઉ પણ કેટલીક વાર ડ્રગ્સ માટે અમદાવાદ આવી ચૂક્યો હોવાનું સૂત્રો દ્વારા જાણવા મળ્યું હતું. પિલ્લાઈની સાથે અન્ય એક આરોપીની પણ પોલીસે ધરપકડ કરી હતી.
ATSની ટીમે મુંબઇથી આવતા શખ્સની એક કરોડની કિંમતના એક કિલો ડ્રગ્સ સાથે અમદાવાદથી ધરપકડ કરી હતી. કાર્યવાહી માટે ATSની ટીમે વોચ રાખીને આરોપીને શાહીબાગથી ઝડપી પાડ્યો હતો. ગુજરાત ATS વધુ તપાસ હાથ ધરતા માલુમ પડ્યું કે મેથામ્ફેટામાઇન નામનું ડ્રગ્સની કિંમત આંતરરાષ્ટ્રીય બજારમાં 5 કરોડ હોવાનું અનુમાન લગાવવામાં આવે છે.
ઉત્તરગુજરાતમાં ક્યારે કેટલું ઝડપાયું ડ્રગ્સ?
ડીસા(27-7-2021) : ડીસા શહેરમાંથી 8 લાખના મુદ્દામાલ સાથે ડ્રગ્સ ઝડપાયું
ડીસા શહેર દક્ષિણ પોલીસે બાતમીના આધારે ડીસા શહેરમાં આવેલી મોઢેશ્વરી સોસાયટીના એક રહેણાંક મકાનમાંથી અંદાજિત 8 લાખ રૂપિયાની કિંમતના ડ્રગ્સના જથ્થા સાથે 1 શખ્સની અટકાયત કરી હતી. તેના ઘરમાંથી જ 338.60 ગ્રામ ગાંજો, 59.760 ગ્રામ સ્મેક અને 18.25 ગ્રામ મેફેડ્રોનનો જથ્થો અને 3 મોબાઈલ રોકડ 6,350 સહિત તમામ જથ્થોની કિંમત 7,96,700 રૂપિયા હતી. પોલીસે આ તમામ જથ્થા સાથે શુભમકુમાર પટેલ ઉર્ફે પાબ્લો ઇસ્કોનની અટકાયત કરી હતી.