ઘરબંધી / અમદાવાદીઓ જ હવે કોરોનાને કાબૂમાં લાવી શકે, આજે 14 વિસ્તારને માઇક્રો કન્ટેઇન્મેઇન્ટમાંથી દૂર કરાયા, નવા 19 ઉમેરાયા

• અમદાવાદમાં કોરોનાની વકરતી સ્થિતિ
• આજે નવા કુલ 19 માઈક્રો કન્ટેઈન્મેન્ટ ઝોન ઉમેરાયા
• હાલમાં શહેરમાં કુલ 182 માઈક્રો કન્ટેઈન્મેન્ટ ઝોન અમલમાં

અમદાવાદ શહેરમાં કોરોના કુદકેને ભૂસકે વધી રહ્યો છે. આજે અમદાવાદમાં કોરોનાના 2903 કેસ નોંધાતા ફરી બીજી લહેરના દ્રશ્યો આંખ સામે તરવા લાગ્યા છે. ત્યારે અમદાવાદ શહેરમાં કોરોના સંક્રમણને અટકાવવા માટે AMC દ્વારા અનેક પગલાઓ લેવામાં આવી રહ્યા છે. જેના ભાગરૂપે આજે વધુ #COVID19 સંક્રમણ અટકાવવા અ.મ્યુ.કો. દ્વારા નવા કુલ 19 માઈક્રો કન્ટેઈન્મેન્ટ જાહેર કરવામાં આવ્યા છે. જ્યારે 14 માઈક્રો કન્ટેઈન્મેન્ટ વિસ્તારને ઝોનમાંથી મુક્તિ આપવામા આવી છે. ગઈકાલે 177 વિસ્તારો માઈક્રો કન્ટેઈન્મેન્ટ ઝોનમાં હતા જેમાંથી 14ને રીલીઝ તેમજ અન્ય 19ને ઉમેરવામાં આવતા હવે શહેરમાં આ વિસ્તારોની સંખ્યા 182 સુધી પહોંચી ગઈ છે.

કયા ઝોનમાં કેટલા વિસ્તાર માઈક્રો કન્ટેઈન્મેન્ટમાં મુકાયા
શહેરમાં કોરોનાની સ્થિતિ પહેલા કરતાં વધુ બગડતી જઈ રહી છે ત્યારે દક્ષિણ પશ્ચિમ ઝોનના 2 વિસ્તાર, પશ્ચિમ ઝોનના 4 વિસ્તાર, પૂર્વ ઝોનના 6 વિસ્તાર, મધ્ય ઝોનનો એક વિસ્તાર
દક્ષિણ ઝોનના 2 વિસ્તાર, ઉત્તર પશ્ચિમ ઝોનના 3 વિસ્તાર, ઉત્તર ઝોનના 1 વિસ્તારને માઈક્રો કન્ટેઈન્મેન્ટમાં મૂકી દેવામાં આવ્યા છે. ઉપરોક્ત વિસ્તારોના 111 ઘરોના 476 લોકોને આ ઝોનમાં મૂકવામાં આવ્યા છે. 12 જાન્યુઆરીના રોજ તમામ 19 વિસ્તારના ઘરોનું ટેસ્ટિંગ તેમજ અન્ય પ્રક્રિયાઓ હાથ ધરવામાં આવશે.

હાલમાં શહેરમાં કુલ 182 માઈક્રો કન્ટેઈન્મેન્ટ ઝોન અમલમાં છે.
ત્યારે #COVID19 સંક્રમણ અટકાવવા અ.મ્યુ.કો. દ્વારા આજે જાહેર કરાયેલા નવા કુલ 19 માઈક્રો કન્ટેઈન્મેન્ટ ઝોનની યાદી. pic.twitter.com/v8HYTakj7y

— Amdavad Municipal Corporation (@AmdavadAMC) January 11, 2022

મંગળવારે  7476 નવા કોરોનાના કેસ નોંધાયા
ગુજરાતમાં આજે ફરી કોરોનાએ ચિંતા વધારી છે. રાજ્યમાં આજે 7476 નવા કોરોનાના કેસ નોંધાયા છે. જ્યારે 2704 દર્દી સાજા થયા છે. 37238 એક્ટિવ કેસ છે, જેમાંથી 34 દર્દી વેન્ટીલેટર પર છે અને 37204 દર્દી સ્ટેબલ છે. આજે 3 દર્દીના મોત થયા છે. અત્યાર સુધીમાં 828406 દર્દી સાજા થઇ ચૂક્યા છે. તો કુલ 10132 દર્દીના મોત થઇ ચૂક્યા છે. રાજ્યનો રીકવરી રેટ દિવસેને દિવસે ઘટી રહ્યો છે, હાલ 94.59 ટકા પર પહોંચ્યો છે. આજરોજ 330074 લોકોનું રસીકરણ કરવામાં આવ્યું છે. આજરોજ ઓમિક્રોનનો એકપણ કેસ નોંધાયેલ નથી.