મહામારી / રાજ્યોએ લીધેલા આ નિર્ણયથી મોદી સરકારને મોટો ફટકો, મે મહિનામાં GSTની આવકમાં ધરખમ ઘટાડો

• મે મહિનામાં જીએસટી આવક ઘટીને 1.02 લાખ કરોડ થઈ
• કોરોના પ્રતિબંધોને કારણે જીએસટીની આવક ઘટી
• એપ્રિલમાં જીએસટીની રેકોર્ડબ્રેક આવક થઈ હતી

મે મહિનામાં સરકારના જીએસટી કલેક્શનમાં ઘટાડો થયો છે. નાણા મંત્રાલય દ્વારા જારી આંકડા અનુસાર મે મહિનામાં સરકારને જીએસટી તરીકે રુ. 1,02,709 કરોડની આવક થઈ હતી જોકે આ આવક એપ્રિલ કરતા ઘણી ઓછી છે. કોરોનાની બીજી લહેરને કારણે દેશના અલગ અલગ હિસ્સામાં લોકડાઉન અને લોકડાઉન જેવા પ્રતિબંધો લગાડાયા હતા જેને કારણે મે મહિનામાં કલેક્શન પર અસર પડી છે.

નાણા મંત્રાલય દ્વારા જારી આંકડા અનુસાર આ વખતે 1,02,709 કરોડ રુપિયા જીએસટી તરીકે મળ્યાં જેમાં સીજીએસટી 17,592 કરોડ, એસજીએસટી 22,653 કરોડ અને આઈજીએસટી 53,199 કરોડ (માલની આયાત પર એકત્ર 29.599 કરોડ રુપિયા સહિત) તથા સેસ 9265 કરોડ (માલની આયાત પર એકત્ર 868 કરોડ રુપિયા સહિત) છે. 

એપ્રિલમાં ઓલ ટાઈમ હાઈ હતું કલેક્શન

એપ્રિલ મહિનામાં સરકારને જીએસટી પેટે અત્યાર સુધીની સૌથી વધારે 1,41,384 કરોડી આવક થઈ હતી. આ જીએસટીની માસિક કલેક્શનની ઓલ ટાઈમ હાઈ આવક હતી.

સતત 8 મા મહિને 1 લાખ કરોડથી વધારે કલેક્શન

મે મહિનામાં કોરોના સંબંધિત અનેક પ્રતિબંધો લાગુ હોવા છતાં પણ જીએસટીની આવક 1 લાખ કરોડ કરતા વધારે રહી છે. સતત આઠમા મહિને જીએસટીની માસિક આવક 1 લાખ કરોડ કરતા વધારે રહી છે.

ગયા વર્ષ કરતા 65 ટકા વધારે કલેક્શન

આ વખતના મે મહિનાનું કલેક્શન મે 2020 ની તુલનામાં 65 ટકા વધારે છે. તો આયાતથી થનારી જીએસટી આવક ગત વર્ષ કરતા 56 ટકા વધારે છે. ઘરેલુ જીએસટી કલેક્શન પણ ગયા વર્ષની તુલનાએ 69 ટકા વધ્યું છે.