વાયરલ / અમદાવાદીઓ જોઈલો... શૌચાલયમાં જ બની રહી છે પ્રખ્યાત સ્વીટમાર્ટની 'રસમલાઇ'

• નાગરિકોના સ્વાસ્થ્ય સાથે ચેડાનો વધુ એક વીડિયો વાયરલ
• કોર્પોરેશન પણ એટલું જ જવાબદાર
• શું અમદાવાદીઓ આવી ગંદકીમાં બનતી મિઠાઇઓ આરોગી રહ્યા છે?

અમદાવાદના પાલડીના ગોપી સ્વીટ માર્ટનો વીડિયો વાયરલ થયો છે. જેમાં જાહેર શૌચાલયમાં રસમલાઇ તૈયાર થઇ રહી છે. વીડિયોમાં 2 શખ્સો આ મીઠાઇ તૈયાર કરી રહ્યાં છે. શહેરના જાગૃત નાગરિકે આ વીડિયો બનાવ્યો છે.

ગોપી સ્વીટમાર્ટની રસમલાઇ પ્રખ્યાત છે

ત્યારે શું અમદાવાદીઓ આવી ગંદકીમાં બનતી મીઠાઇઓ આરોગી રહ્યા છે? આ ગોપી સ્વીટ માર્ટમાંથી શહેરના અનેક લોકો મીઠાઇ ખરીદે છે. ત્યારે હાલ તહેવાર અને પ્રસંગોના દિવસો ચાલી રહ્યા છે ત્યારે શૌચાલયમાં બનતી મીઠાઇથી લોકોએ ચેતી જવાની જરૂર છે. આ સ્વીટમાર્ટ રસમલાઇ માટે પ્રખ્યાત છે. તેને લગ્ન પ્રસંગોના ઓર્ડર પણ મળે છે. 

ગોપી સ્વીટમાર્ટને રૂ. 5 હજારનો દંડ

મહત્વનું છે કે, સોશિયલ મીડિયામાં આ વીડિયો વાયરલ થતા કોર્પોરેશન દ્વારા કાર્યવાહી હાથ ધરવામાં આવી છે. ગોપી સ્વીટમાર્ટમાંથી મીઠાઇના નમૂના લેવામાં આવ્યા છે. જેની લેબોરેટરીમાં તપાસ થશે. હાલ આ સ્વીટમાર્ટને રૂ. 5 હજારનો દંડ ફટકારવામાં આવ્યો છે. ગોપી સ્વીટમાર્ટ દ્વારા આ દંડ ભરવામાં આવ્યો છે.

કોર્પોરેશન પણ એટલું જ જવાબદાર

અવાનનવાર અમદાવાદ શહેરમાં આ પ્રકારના કિસ્સાઓ સામે આવતા રહે છે. શહેરીજનોના સ્વાસ્થ્ય સાછે ચેડાં થઇ રહ્યા છે. કારીગરો દ્વારા ગંદકીની વચ્ચે મીઠાઇ તૈયાર થઇ રહી છે. ત્યારે આ પ્રકારની ઘટનાઓ પાછળ કોર્પોરેશન પણ એટલું જ જવાબદાર છે. તહેવારો અને પ્રસંગોના સમયે જ આ પ્રકારની ઘટનાઓ સામે આવે છે. ત્યારે કોર્પોરેશનને જ્યાં સુધી જગાડવામાં ન આવે ત્યાં સુધી ઉંઘી રહે છે. બીજી તરફ લેબોરેટરીના નમૂના 15 દિવસ સુધી નથી આવતા. લેબોરેટરીની સિસ્ટમ પણ નબળી છે. આવા અનેક એકમો અમદાવાદમાં આવેલા છે. ત્યારે કોર્પોરેશન ક્યારે નક્કર કાર્યવાહી કરશે તે જોવું રહ્યું.