રાહત / ગૃહિણીઓ માટે ખુશખબરઃ કપાસિયા અને પામતેલના ભાવમાં વધુ 10 રૂ.નો ઘટાડો, જાણો ડબ્બાનો ભાવ

• રાજકોટમાં ખાદ્ય તેલના ભાવમાં થયો ફરી ઘટાડો
• કપાસિયા, પામતેલના ભાવમાં થયો 10 રૂપિયાનો ઘટાડો
• 3 દિવસમાં 40 રૂ.નો ઘટાડો નોંધાયો

માઝા મુકતી મોંઘવારી અને જીવનજરૂરી ચીજ વસ્તુઓના ભડકે બળતા ભાવ વચ્ચે રાહતના સમાચાર સાંપડી રહ્યા છે. જેમાં રાજકોટમાં ખાદ્ય તેલના ભાવમાં ફરી એક વખત ઘટાડો નોંધાયો છે. કપાસિયા અને પામતેલના ભાવમાં ઘટાડો આવ્યો છે જેને પગલે 3 દિવસમાં ભાવમાં 40 રૂપિયાનો ઘટાડો નોંધાયો છે. ભાવ ઘટાડાનો આ સિલસિલો આગામી સમયમાં પણ યથાવત રહે તેવું લોકો ઇચ્છી રહ્યા છે. 

તેલના ભાવમાં છેલ્લા 3 દિવસમાં 40 રૂપિયાનો ઘટાડો થયો
આસમાનને આંબી રહેલી મોંઘવારીથી સામાન્ય માણસ એક સાંધે ત્યાં તેર તૂટે તેવી સ્થિતિ જન્મી છે. જેને લઈને મધ્યમ વર્ગના માનવીની જીવન સાયકલમાં પણ અનેક વિઘ્નો આવ્યા છે. તેવામાં હાલ પેટ્રોલ-ડિઝલના ભાવમાં મહદઅંશે રાહતરૂપ ઘટાડો કરતાં બેકાબૂ મોંઘવારી થોડાઘણા અંશે અંકુશમાં આવી છે. તેવામાં રાજકોટમાં ખાદ્ય તેલના ભાવમાં  ફરી ઘટાડો થયો છે. કપાસિયા અને પામતેલમાં આજે વધુ 10 રૂપિયાનો ઘટાડો થયો હોવાથી કપાસિયા લુઝ તેલના ડબ્બાના રૂપિયા 1460 ભાવ હતા તે ઘટીને નવા ભાવ 1450 રૂપિયા પર સ્થિર થયા છે. બીજી તરફ કપાસિયા તેલના ડબ્બાનો જુનો ભાવ 2580 થી 2630 રૂપિયા હતો ત્યારબાદ ભાવમાં નજીવો ઘટાડો આવતા નવો ભાવ 2570 થી 2620 રૂપિયા પર અટક્યો છે. તેજ રીતે પામતેલના ડબ્બાનો જૂનો ભાવ 2420 થી 2425 રૂપિયા હતો તેમાં પણ ભાવ ઘટાડાને લઈને નવો ભાવ 2410થી 2415 પર અટક્યો છે. 

મોંઘવારીનો રાક્ષસ કાબૂમાં આવે તે જરૂરી  
અત્રે નોંધનિય છે કે, એક બાજુ કોરોનાને પગલે અમલી કરાયેલા લોકડાઉનથી ધંધા-રોજગારને મરણતોડ ફટકો પડયો છે. ધંધા-રોજગારની ગાડી હજુ બારોબાર પાટે ચડી નથી ત્યાં મોંઘવારીએ માજા મુકતા સામાન્ય માણસનું જીવન દોહ્યલું બની ગયું છે. આથી મોંઘવારીનો રાક્ષસ કાબૂમાં આવે અને બેફામ વધતાં જતાં ભાવ પર અંકુશ આવે તેવું લોકો ઇચ્છી રહ્યા છે.