રાજકોટ: ગોંડલ શો-રૂમમાં થયેલી ચોરીનો ભેદ ઉકેલાયો આરોપીઓ પાસેથી 40 લાખનો મુદ્દામાલ રીકવર 

રાજકોટ: ગોંડલના કોલેજીયન કપડાના શો-રૂમમાં થયેલી ચોરીના મામલે રાજકોટ ક્રાઈમબ્રાંચે વધુ એક આરોપીની ધરપકડ કરી છે. બસ સ્ટેન્ડમાંથી ચોરીના ગુનાનો વોન્ટેડ આરોપી ગોંડલના બાદશાહને ઝડપી 13 લાખ 17 હજારનો મુદ્દામાલ જપ્ત કર્યો છે.

ચોરીના બનાવ બાદ શહેરના શાસ્ત્રી મેદાનના બસ સ્ટેન્ડમાં એક શંકાસ્પદ ઈસમ ભાગવાની પેરવી કરી રહ્યો છે આવી બાતમી આધારે ક્રાઇમ બ્રાન્ચની ટિમ દોડી જઈ બસ સ્ટેન્ડના ગેટ પાસે જ અટકાવી તેની પૂછપરછ કરતા પોતે ગોંડલના દેવપરામાં રહેતો અબ્દુલ ઇકબાલભાઇ ઉર્ફે બોદુભાઇ અલ્લારખાભાઇ મૂળિયાં હોવાનું જણાવ્યું હતું. આ શખ્સ પાસે રહેલ થેલો ચેક કરતા થેલામાંથી 13 લાખ 17 હજાર રૂપિયા રોકડા મળી આવતા પોલીસ કાફલો ચોંકી ઉઠયો હતો. પૂછપરછ દરમિયાન પૈસા અંગે કોઈ જવાબ ન આપતા ચોરીનો ભેદ ઉકેલાયો છે. 

ઉલ્લેખનીય છે કે શહેરના બસ સ્ટેન્ડ નજીકના કોલેજીયન નામના કપડાના શો-રૂમના તાળા તોડી 40 લાખ રૂપિયાની ચોરી થઇ હતી. આ સમગ્ર ઘટના CCTVમાં કેદ થઇ હતી. જેમાં સ્પષ્ટ ચોરી કરતા તસ્કરો દેખાઇ આવે છે. જોકે અગાઉ પોલીસે 4 આરોપીઓને ઝડપી અંદાજીત 26 લાખથી વધુનો મુદ્દામાલ કબજે કર્યો હતો અને પાંચમાં આરોપી પાસેથી બાકીનો માલ જપ્તે કરતા કુલ 40 લાખનો મુદ્દામાલ રીકવર કરાયો છે.