કોરોના વિસ્ફોટ / GNLUમાં વધુ 9 કોરોના કેસ નોંધાયા, 60ને પાર પહોંચ્યો આંકડો, જાણો કેવી છે સ્થિતિ

• ગુજરાત નેશનલ લૉ યુનિ.માં નવા 9 કોરોનાના કેસ નોંધાયા
• લૉ યુનિવર્સિટીના 60 વિદ્યાર્થીઓ કોરોના પોઝિટિવ
• તમામ વિદ્યાર્થીઓના સેમ્પલ ટેસ્ટિંગ માટે મોકલાયા
   

GNLUમાં કોરોના સંક્રમણ વધી રહ્યું છે. દિવસ જાય તેમ અન્ય નવા કેસ સામે આવી રહ્યા છે ત્યારે ફરી એકવાર નેશનલ લૉ યુનિવર્સિટીમાં વધુ 9 વિદ્યાર્થીઓ કોરોના પોઝિટીવ આવ્યા હોવાનું સામે આવ્યું છે. તમામ સેમ્પલ જિનોમ સિક્વન્સિંગ માટે મોકલવામાં આવ્યા છે.  વધતા કેસને પગલે હવે સમગ્ર સ્ટાફનો કોરોના ટેસ્ટ કરાશે.

GNLUમાં કોરોના વિસ્ફોટ 

ગાંધીનગર નેશનલ લૉ યુનિવર્સિટીમાં રોજબરોજ કોરોનાના કેસ નોંધાઇ રહ્યા છે. અત્યાર સુધીમાં કુલ 600 જેટલા વિદ્યાર્થીઓના ટેસ્ટિંગ કરાયા.  GNLUમાં પોઝિટિવ કેસનો કુલ આંક 60ને પાર થયો છે. કેમ્પસમાં રહેતા તમામ લોકોના ટેસ્ટિંગ કરવામાં આવ્યા હતા. ગાંધીનગર મનપા આરોગ્યની 3 ટીમ ટેસ્ટિંગ માટે ફાળવાઈ હતી.  વિદ્યાર્થીઓ કોવિડ પોઝિટિવ આવતા વાલીઓમાં ચિંતાનું મોજું ફરી વળ્યુ છે. તમામ વિદ્યાર્થીઓને હોસ્ટેલમાં ક્વોરન્ટાઇન કરાયા છે. બહારથી આવતા લોકોના પણ ટેસ્ટિંગ કરવામાં આવી રહ્યા છે. 

એક સપ્તાહ માટે વર્ક ફ્રોમ હોમ

GNLU કેમ્પસમાં ઉપસ્થિત તમામ વિદ્યાર્થીઓના ટેસ્ટ થઇ ગયા છે. જે પણ વિદ્યાર્થીઓના ટેસ્ટ પોઝિટિવ આવ્યા છે તેઓ ઝડપથી સ્વસ્થ થવામાં છે. મોટાભાગના એસિમ્પટોમેટિક કે હળવા લક્ષણો ધરાવે છે. જોકે, હજુ ફેકલ્ટીના ટેસ્ટિંગ બાકી છે. મહત્વનું છે કે ગાંધીનગર મ્યુનિસિપલ કોર્પોરેશનના હેલ્થ ડિપાર્ટમેન્ટ દ્વારા ૧૩૦ના રેપિડ એન્ટિજન ટેસ્ટ કરાયા હતા. જેમાંથી ચારના ટેસ્ટ પોઝિટિવ આવ્યા હતા. છેલ્લા બે દિવસમાં જે પાંચ વિદ્યાર્થીના આરટીપીસીઆર કરાયા તેઓ પણ પોઝિટિવ હોવાનું સામે આવ્યું હતું. તો વધતા કોરોનાના કેસને કારણે  GNLU દ્વારા તમામ ફેકલ્ટી અને સ્ટાફ માટે આગામી એક સપ્તાહ માટે 'વર્ક ફ્રોમ હોમ' જાહેર કરવામાં આવ્યું છે.

ગુજરાતમાં કોરોનાના ૩૫ નવા કેસ

ગુજરાતમાં છેલ્લા ૨૪ કલાકમાં કોરોનાના 35 નવા કેસ નોંધાયા છે જ્યારે એકપણ મૃત્યુ નોંધાયું નથી. છેલ્લા ૨૪ કલાકમાં ગાંધીનગરમાંથી 19, અમદાવાદમાંથી 9, વડોદરામાંથી ચાર જ્યારે જામનગર-કચ્છ-મહેસાણામાંથી 1-1 કેસ નોંધાયા હતા. રાજ્યમાં હાલ કુલ 148 એક્ટિવ કેસ છે જ્યારે એકપણ દર્દી વેન્ટિલેટર પર નથી. વધુ 16 દર્દી કોરોનાથી સાજા થતાં રીક્વરી રેટ 99.09% છે.