રાજકોટ / ગોંડલ રોડ પર આવેલ પાઈન વિટા હોટલમાં ફરી વખત બની દુર્ઘટના, બીજા માળેથી પટકાઈ અઢી વર્ષની બાળકી

• સોની પરીવાર સગાઈમાં આવ્યો હતો ત્યારે દુર્ઘટના ઘટી
• ગંભીર હાલતમાં બાળકીને ખાનગી હોસ્પિટલમાં ખસેડવામાં આવી 
• અગાઉ પણ આજ પ્રકારે પાઈન વિટા હોટલમાં બન્યો હતો બનાવ

રાજકોટમાં આજે કમકમાટી છૂટી જાય તેવી એક ઘટના સામે આવી છે. રાજકોટ ખાતે આવેલી હોટલના બીજા માળેથી એકાએક અઢી વર્ષની બાળકી નીચે પટકાઈ હતી. આ ઘટનાને લઈને ઉહાપોહ સર્જાયો હતો. બીજી તરફ દુર્ઘટના સ્થળે જોત જોતામાં લોકોના ટોળેટોળા ઉમટી પડ્યા હતા અને સ્થાનિક પોલીસ કાફલો પણ તાબડતોબ દોડી જઈ તાપસ હાથ ધરી હતી. કોઇ કારણસર રમતા-રમતા બાળકી નીચે ખાબકતાં પરિવાર સ્તબ્ધ થઇ ગયો હતો. 

નાઇશા સોની નામની બાળકી પટકાઈ 
રાજકોટના ગોંડલ રોડ પર આવેલી હોટેલમાં ફરી એક વખત હોટલ સંચાલકોની બેદરકારીને પાપે દુર્ઘટના ઘટી છે. પાઈન વિટા હોટલમાં સોની પરિવાર રોકાયો હતો. સગાઈની મંગલ પ્રસંગમાં સહભાગી થવા આવેલો સોની પરિવારએ હોટેલના રૂમ ન.201 રાત્રિ રોકાણ કર્યું હતું. જ્યાં આ પરિવારની નાઇશા ગોપલભાઈ સોની નામની રમતા-રમતા એકાએક બીજા માળેથી નીચે જમીન પર પટકાઈ હતી. જે અંગે જાણ થતાં પરિવારજનો અને હોટલનાં સ્ટાફ તથા સ્થાનિકો ત્યાં દોડી ગયા હતા. છેક બીજા માળેથી નીચે પડવાના કારણે ફૂલ જેવી દીકરીને ગંભીર ઇજા થવા પામી હતી. જેને પગલે તે સૂનમૂન થઇ ગઈ હતી. જેથી ઇજાગ્રસ્ત બાળકીને ગંભીર હાલતમાં સારવાર અર્થે હોસ્પિટલ ખાતે ખસેડવામાં આવી હતી. આ મામલો પોલીસે પણ દોડી જઈ હોટલના રૂમની તલાશી લીધી હતી અને બાળકીના પરિવારજનોની પૂછપરછ હાથ ધરી હતી. 

અગાઉ પણ હોટલમાં આવી જ દુર્ઘટના ઘટી હતી
ઉલ્લેખનીય છે કે, પાઈન વિટા હોટલમાં જ આશરે છ માસ અગાઉ આ પ્રકારની ઘટના પ્રકાસમાં આવી હતી. જે દરમિયાન પુનાનો પરિવાર રાજકોટમાં પ્રસંગ હોવાથી આવ્યો હતો. આ હોટલમાં ચોથા માળે રૂમમાં રાત્રિ રોકાણ કર્યું હતું. જ્યાં સવારે હોટલની બારી ખોલ્યા બાદ બાળકી રમતી હતી અને તે ટેબલ પર ચઢીને બારી પાસે રમતા-રમતા અચાનક નીચે પડી ગઈ હતી. આ દુર્ઘટનામાં બાળકી મોતને ભેટી હતી. જે દરમિયાન હોટલના સંચાલકો ભીંસમાં આવતા  હોટલના સંચાલકોએ તાત્કાલિક ગ્રીલ નાખી દેવાની ખાતરી આપી હતી. ત્યારબાદ આ દિશામાં કાર્યવાહી કરવામાં ન આવતા આજે ફરી આ ઘટના સામે આવી હતી આથી લોકોમાં રોષ ફેલાયો છે.