ગીર સોમનાથ જિલ્લામાં પોલીસની મીઠી નજર નીચે દારૂનો કારોબાર ચાલતો હોવાનું સામે આવ્યું છે. જેમાં પોલીસ કોન્સ્ટેબલ અને બુટલેગરનો ઓડિયો વાયરલ થયો છે.
પોલીસની મીઠી નજરથી ધમધમી રહ્યો છે દારૂનો કારોબાર!
કોન્સ્ટેબલનો બુટલેગર સાથે 'હપ્તા'ની વાત કરતો ઓડિયો વાયરલ
સાહેબ 14થી 15 હજાર કરી દઉં: બુટલેગર
આ વાયરલ ઓડિયો ક્લિપમાં કોન્સ્ટેબલ બુટલેગર પાસેથી રૂ. 20 હજારની માંગ કરતો હોવાનું જાણવા મળી રહ્યું છે. ત્યારે બુટલેગર કહે છે રૂ. 14થી 15 હજાર સુધી કરી આપીશ.
આ સાથે ઓડિયોમાં કોન્સ્ટેબલ જીવા નામના બુટલેગર પાસેથી માલ લેવાનું પણ કહી રહ્યો છે. જો બીજા પાસેથી માલ લીધો તો મજા નહીં આવે તેમ કોન્સ્ટેબલ ઓડિયોમાં કહેતો જોવા મળી રહ્યો છે.
કોન્સ્ટેબલની સોમનાથ સુરક્ષામાં બદલી કરી દેવાઇ
જો કે, આ સમગ્ર મામલે જિલ્લા પોલીસ વડાએ જરૂરી પગલાં લીધા છે. કોન્સ્ટેબલની સોમનાથ સુરક્ષામાં બદલી કરી દેવાઇ છે. આ અંગે SPનું કહેવું છે કે, હાલ ઓડિયો બાબતે તપાસ ચાલુ છે. તપાસ બાદ કાર્યવાહી થશે.
જુઓ વાયરલ ઓડિયોમાં કોન્સ્ટેબલ અને બુટલેગર વચ્ચે શું વાતચીત થઇ?
'હું કંઇ આખો દિવસ માલ વેચતો નથી, મારો માલ છે ને મને ભગાકાકાએ 3 વાર કીધું કે હું ક્લાસિસ આવતો હતો ને ત્યારે મે વાત કરી પઢિયાર સાહેબ સાથે વાત કરી, તેઓએ કીધું કે વેચજે, પછી મે માલ મંગાવ્યો: બુટલેગર
અમારા જે છે તેમાં વધારો થશે, કંઇ મફત નહીં થાય, 20 હજાર રૂપિયા થશે: કોન્સ્ટેબલ
હું મારી રીતે સમજી લઇશ: બુટલેગર
નહીં-નહીં તારી રીતના નહીં: કોન્સ્ટેબલ
જરા પોષાય એવી વાત કરો. હું તમને સાહેબ છેલ્લે 14થી 15 હજાર કરી દઉં. પછી મારાથી વધારે થાય એમ હોય તો કરી જ દઉં. એટલું જ તો તમારે મારું રાખવું પડે ને: બુટલેગર
વાંધો નહીં, હું જોઇ લઇશ હાલ. હું તારી સાથે ફોનમાં વાત કરું એનું કારણ મારી પાસે ટાઇમ નથી ત્યાં પોગવાનો અને તારી પાસે ગાડી નથી. એટલે એમાં જો ઘાલમેલ થઇ તો...: કોન્સ્ટેબલ
સાહેબ, એ નો થાય. તમે ખાલી વિશ્વાસ રાખો: બુટલેગર
તારામાં બીજાના હોય એટલે વાત છે. રામો ને બામો બધા તારા ભેગાં ફરે: કોન્સ્ટેબલ
ઇ કંઇ વસ્તુ થાય નહીં, એ રામો તો ખાલી મારી સાથે આવે જ છે, મારું કીધેલું પોષાશે ને?: બુટલેગર
માલ બીજેથી આવ્યો તો મજા નહીં આવે, ફોનનું જે મે તને કીધું કે મે તારો ફોન અડધી રાત્રે ફોન ઉપાડ્યો હતો અને તને ફોન કર્યો તો તે ઉપાડ્યો નહીં, તું અહીં જામીન દેવા આવ્યો ત્યારે, અંદર જતો રહ્યો ત્યારે: કોન્સ્ટેબલ
પણ હું અંદર હતો ને: બુટલેગર
સારું હવે ઘરે સીધો વયો જાજે, હું તને ઓળખું છું એટલે, બાકી કંઇ લાંબી ભોળી કરતો નહીં: કોન્સ્ટેબલ
જે દી તને પોષાય નહીં એ દિવસે મારા ઘરેથી પૈસા લઇ જજે, બાકી આ બાબતમાં ક્યાંય પડતા નહીં: કોન્સ્ટેબલ
સાહેબ એ તો અમનેય ખબર પડે કે આમાં નોકરીનો સવાલ કહેવાય, એ બધી મને ખબર પડે, એ લાઇનમાં હું આવું જ નહીં: બુટલેગર