ગાંધીનગર: આજથી વાયબ્રંટ સમિટની શરૂઆત થઈ છે. વાયબ્રંટ સમિટમાં અંદર જવા માટે લોકોના પાસ બનાવવામાં આવ્યા છે. ત્યારે હવે વાયબ્રંટ સમિટની બહાર પાસ ધારકોએ હોબાળો કર્યો હતો. પાસ ધારકોને અંદર ન જવા દેતા હોબાળો થયો હતો. પોલીસકર્મીઓએ હાઉસ ફૂલ હોવાનું કહીને લોકોને અંદર જવાથી અટકાવ્યા હતા. આ દરમિયાન પોલીસકર્મી અને પાસ ધારકો વચ્ચે ઉગ્ર બોલાચાલી થઈ હતી.
ઉલ્લેખનીય છે કે ગાંધીનગરમાં 18થી 20 જાન્યુઆરી સુધી વાયબ્રંટ સમિટનુ આયોજન કરવામાં આવ્યુ છે. વાયબ્રંટ સમિટમાં ભાગ લેવા માટે 15 દેશોના ડેલિગેશન ગાંધીનગરમાં પહોંચ્યા છે. દેશના મોટા ઉદ્યોગપતિઓ પણ ભાગ લેવા માટે ગાંધીનગરમાં આવ્યા છે.
શોપિંગ ફેસ્ટિવલમાં પણ થયો હોબાળો
અમદાવાદમાં શોપિંગ ફેસ્ટિવલની શરૂઆત થઈ છે. શોપિંગ ફેસ્ટિવલના બીજા જ દિવસે વિવાદ થયો. શોપિંગ ફેસ્ટિવલના દરવાજા 12 વાગ્યા સુધી બંધ રહેતા વિવાદ થયો હતો. દરવાજા બંધ રહેતા મુલાકાતાઓમાં નિરાશા જોવા મળી હતી.
નિરાશ થયેલા મુલાકાતીઓ પરત ફર્યા હતા. મહત્વનું છે કે પીએમ મોદીએ શોપિંગ ફેસ્ટિવલની શરૂઆત કરાવી હતી. સવારે 10થી રાતે 12 વાગ્યા સુધી મુલાકાતની જાહેરાત કરવામાં આવી હતી. જોકે આજે બીજા જ દિવસે બપોરે 12 વાગ્યા સુધી શોપિંગ ફેસ્ટિવલ ન ખુલતા અનેક સવાલો ઉઠ્યા છે.
દુબઇ જેવો છે શોપિંગ ફેસ્ટિવલ
ગુજરાત સરકાર અને અમદાવાદ મ્યુનિસિપલ કોર્પોરેશન તરફથી શોપિંગ ફેસ્ટિવલનું આયોજન થઇ રહ્યું છે. આ ફેસ્ટિવલ 16 થી 27 જાન્યુઆરી દરમ્યાન અમદાવાદમાં યોજાશે. દર વર્ષે દુબઇમાં જે શોપિંગ ફેસ્ટિવલ યોજાય છે તેવો આ ફેસ્ટિવલ છે. દુબઇની તર્જ પ્રમાણેનો આ ફેસ્ટિવલ યોજાશે.
આપને જણાવી દઇએ કે આ ફેસ્ટિવલમાં પાથરણાથી લઈને મોલ સુધીની તમામ વસ્તુઓ હશે. ગુજરાતના લોકોને શોપિંગમાં સરળતા મળે તે હેતુથી ફેસ્ટિવલનું આયોજન કરવામાં આવ્યુ છે. આ ફેસ્ટિવલમાં લોકડાયરો અને ફિલ્મ ફેસ્ટિવલ પણ યોજાશે. ફેસ્ટિવલમાં સેમિનાર કોમેડી શો ફેશન શો મ્યુઝીકલ કોન્સર્ટનો પણ સમાવેશ કરાયો છે. 27 વિવિધ સ્થળોએ સાંસ્કૃતિક પ્રોગ્રામોનો દેશવાસીઓ લાભ લઈ શકશે.