બંગાળમાં થોડા જ મહિનામાં વિધાનસભાની ચૂંટણીઓ યોજાવા જઈ રહી છે, પરંતુ ટીએમસીને તેના આંચકા ઘણા સમય પહેલાથી જ મળવાના શરુ થઇ ગયા હતા.
બંગાળમાં થોડા મહિનામાં થવા જઈ રહી છે ચૂંટણી
આ વખતે મુખ્ય લડાઈ સત્તાધારી TMC અને ભાજપ વચ્ચે છે
ચૂંટણી પહેલા જ મમતા 'દીદી'ની ટીમમાંથી ખરી ચૂકી છે ઘણી વિકેટ
બંગાળની ચૂંટણીમાં હજુ થોડા મહિનાઓનો સમય બાકી છે, પરંતુ આ ઇલેકશનની તૈયારીઓનું બ્યુગલ ઘણા સમય પહેલાથી જ વાગી ચૂક્યું હતું, જેને લઈને બંગાળની સત્તાધારી પાર્ટી ટીએમસીમાંથી બળવાનો દોર પણ શરુ થઇ ગયો હતો.
પહેલાની ચૂંટણી કરતાં આ વખતે બંગાળમાં માહોલ અલગ છે
બંગાળમાં આ વખતની ચૂંટણીમાં પહેલા કરતા રાજનીતિક સમીકરણો ઘણા અલગ છે, એક સમયે બંગાળની રાજનીતિમાં પ્રભુત્વ ભોગવતા કોંગ્રેસ અને સામ્યવાદી પક્ષો કોરાણે છે અને આ વખતે બંગાળમાં મુખ્ય લડાઈ ભાજપ અને ટીએમસી વચ્ચે લડાશે તેમાં કોઈ બેમત નથી.
જો કે આ વખતે ટીએમસીના ઘણા નેતાઓ ભાજપનો ભગવો ધારણ કરીને તેમના માતૃપક્ષ સામે ચૂંટણીમાં ઉતરે તો નવાઈ નહિ, કેમ કે અત્યાર સુધીમાં ચાર સાંસદો અને 14 ધારાસભ્યો ભાજપી થઇ ચૂક્યા છે, અને હવે આ લિસ્ટમાં સૌથી તાજું નામ ટીએમસી રાજ્યસભા સાંસદ અને પૂર્વ રેલ મંત્રી દિનેશ ત્રિવેદીનું જોડાઈ ગયું છે.
2019 માં શરુ થયો સિલસિલો
બંગાળમાં તૃણમૂલના દિગ્ગ્જ નેતાઓના ભગવા રંગમાં રંગાવાની શરૂઆત 2019ની લોકસભા ચૂંટણીના અમુક મહિનાઓ પહેલાથી જ શરુ થઇ, સૌથી પહેલા મુકુલ રોયએ ભાજપનો પાલવ પકડ્યો, તેના પછી અનુપમ હાજરા, સૌમિત્ર ખાન વગેરે ભાજપમાં સામેલ થઇ ગયા, આના વચ્ચે ધારાસભ્ય અર્જુન સિંહ પણ ભાજપી બન્યા અને લોકસભામાં સાંસદ પણ બની ગયા.
વિધાનસભા ચૂંટણી પહેલા તીવ્રતા વધી
હવે બંગાળમાં વિધાનસભા ચૂંટણી 2021 પહેલાના દાવપેચ ગોઠ્વાવાના શરુ થઇ ગયા છે અને શરુઆતી આંકડાઓમાં ભાજપને ફાયદો થતો દેખાઈ રહ્યો છે, કેમ કે ટીએમસીના એક સાંસદ અને 13 ધારાસભ્યોને ભગવા પાર્ટી પોતાનામાં સામેલ કરી ચૂકી છે.