- યુપીના સહારનપુરના ભીમરાવ આંબેડકર સ્ટેડિયમની ઘટના
- અંડર-17 સ્ટેટ લેવલના કબડ્ડી ખેલાડીઓને ટોઈલેટમાં પીરસાયું ભોજન
- સ્ટેડિયમની અંદર ટોઈલેટમાં રાંધીને રખાયા ભાત અને પૂરી
યુપીના સહારનપુરના ડો.ભીમરાવ આંબેડકર સ્ટેડિયમમાં કબડ્ડીના ખેલાડીઓને ટોઈલેટમાં લંચ કરાવાયું હતું. આ ઘટનાનો એક વીડિયો સામે આવતા હોબાળો મચ્યો હતો. આંબેડકર સ્ટેડિયમમાં રમાયેલી ત્રણ દિવસીય અંડર-17 સ્ટેટ લેવલની કબડ્ડી ટુર્નામેન્ટમાં 300થી વધુ ખેલાડીઓએ ભાગ લીધો હતો. આવેલા ખેલાડીઓ માટે સ્વિમિંગ પૂલ પાસેના ટોઈલેટમાં ખાવાનું બનાવાયું હતું અને ખેલાડીઓને ત્યાં જ ખાવાનું પીરસવામાં આવ્યું હતું. એટલું જ નહીં પરંતુ ખેલાડીઓને જે પણ ભોજન આપવામાં આવ્યું હતું તે સારી જાતનું નહોતું. દાળ, શાક, ભાત કાચા હતા અને ખાવાનું સ્વિમિંગ પૂલ પાસે બનાવવામાં આવતું હતું. ચોખા અને પુરી તૈયાર કરીને શૌચાલયમાં રાખવામાં આવ્યા હતા. દુર્ગંધના કારણે ત્યાં ઉભા રહેવું પણ મુશ્કેલ હતું.
રમતગમત અધિકારી સસ્પેન્ડ, તપાસના આદેશ
આ ઘટના સામે આવતા વિવાદ પેદા થયો હતો. સહારનપુરના ડિસ્ટ્રિક્ટ મેજિસ્ટ્રેટ અખિલેશ સિંહે જણાવ્યું હતું કે, "16 અને 17 સપ્ટેમ્બરના રોજ રાજ્ય કક્ષાની કબડ્ડી ટૂર્નામેન્ટનું આયોજન કરવામાં આવ્યું હતું જેમાં ખેલાડીઓને ટોઈલેટમાં ભોજન પીરસાયું હોવાની ફરિયાદો મળી હતી. આ ઘટનામાં જિલ્લા રમત ગમત અધિકારીને સસ્પેન્ડ કરવામાં આવ્યા છે. મેં આ મામલે તપાસના આદેશ આપ્યા છે અને સંબંધિત વ્યક્તિ ત્રણ દિવસમાં રિપોર્ટ રજૂ કરશે. અમે તેની વિગતવાર તપાસ કરીશું અને યોગ્ય કાર્યવાહી કરીશું.
ઘટનાનો વીડિયો થયો વાયરલ
ખાવાનું બનાવીને ટોઈલેટમાં રખાયું હોવાનો અને ખેલાડીઓ ત્યાંથી ખાવાનું લઈ રહેલા દેખાતા હતા. આ ઘટનાનો એક વીડિયો વાયરલ થયો છે. સ્ટેડિયમમાં જમવાનું સ્વિમિંગ પૂલ પરિસરમાં તૈયાર કરવામાં આવ્યું હતું. ત્યાં ચેન્જિંગ રૂમ અને ટોઇલેટમાં કાચું રેશન રાખવામાં આવ્યું હતું. સાથે જ બહાર ઇંટનો ચૂલો બનાવીને ખાવાનું તૈયાર કરવામાં આવ્યું હતું. ખાવાનું તૈયાર કર્યા બાદ તેને ટોયલેટમાં રાખવામાં આવ્યું હતું. કાગળ પર શૌચાલયના ફ્લોર પર ચોખાની મોટી પ્લેટો અને પુરીઓ રાખવામાં આવી હતી. ખેલાડીઓને કાચા ચોખા પીરસવામાં આવ્યા હતા, જે ખાવાની ઘણા ખેલાડીઓએ ના પાડી હતી. ત્યારબાદ ચોખાને ટેબલ પરથી દૂર કરવામાં આવ્યા હતા. આવી સ્થિતિમાં ટેબલ પર માત્ર બટાકાના શાક, દાળ અને રાયતા જ રહી ગયા હતા.
