સવારે ઠંડી, બપોરે ગરમી અને રાત્રે ઠંડીના કારણે બીમારીઓ વધી રહી છે. ત્યારે હવામાન વિભાગ દ્વારા આગાહી કરવામાં આવી છે કે રાજ્યમાં ફરી વખત ઠંડીનો ચમકારો અનુભવાશે. શુક્રવારથી 1 ડિગ્રી તાપમાનમાં ઘટાડો થશે. જેથી બપોરે ગરમી, જ્યારે સાંજ બાદ ઠંડી શરૂ થઇ જશે.
રાજ્યમાં ઠંડીની સીઝનનો અંતિમ તબક્કો
ઠંડીનો ફરી થશે અહેસાસ
1 ડિગ્રી તાપમાન ઘટવાની સંભાવના
રાજ્યમાં ઠંડીની સીઝનનો અંતિમ તબક્કો શરૂ થવાનો છે. ત્યારે ફરી એકવાર ઠંડીનો અહેસાસ થશે. આવતીકાલથી 1 ડિગ્રી તાપમાન ઘટવાની સંભાવના છે. જોકે બપોરના સમયે ગરમીનો અહેસાસ થશે. તો દરિયામાં તેજ ગતિએ પવન ફૂંકાવાની શક્યતા સેવાઈ રહી છે. અરબી સમુદ્રમાં 45થી 55 કિલોમીટર ઝડપે પવન ફૂંકાશે. જેને પગલે માછીમારોને દરિયો ન ખેડવા સૂચના આપવામાં આવી છે. પશ્ચિમ મધ્ય અને દક્ષિણ પશ્ચિમ અરબી સમુદ્રમાં ન જવા માટે માછીમારોને સૂચન કરાયું છે.
હાલ શિયાળાનો અંતિમ તબક્કો ચાલી રહ્યો છે ત્યારે બે ઋતુનો અનુભવ થશે. માર્ચ મહિનાથી ઉનાળાની ગરમીની શરૂઆત થઇ જશે. રાજ્યમાં ઉતર તરફથી પવન ફુંકાવવાના કારણે તાપમાન નીચું જવાનું હવામાન વિભાગનુ અનુમાન છે.
આંબાના પાકને નુકસાનની ભીતિ
આંબા અને જીરૂંના પાક લેતા ખેડૂતોને મુશ્કેલીનો સામનો કરવો પડી શકે છે. ગત વર્ષે વાતાવરણ વારંવાર બદલવાના કારણે પાકને ભારે નુકસાન થયું હતું. આંબામાં આવતા મોર વધુ ઠંડીના કારણે બળી જાય છે. હાલ આંબા પર મોર વધુ માત્રા પર આવ્યા છે પરંતુ વાદળછાયું વાતાવરણ અને કમોસમી વરસાદના કારણે આંબાના પાકને નુકસાની થઇ શકે છે.