વર્લ્ડ ચેમ્પિયન બનેલી ઈંગ્લેન્ડની ૧૫ સભ્યની ટીમમાં સાત ખેલાડી અન્ય દેશમાં જન્મેલા છે. એમાં ફાઇનલમાં મેન ઓફ ધ મેચ જાહેર થયેલો બેન સ્ટોક્સ અને ટીમ માટે ટૂર્નામેન્ટમાં સૌથી વધુ વિકેટ ઝડપનારો જોફ્રા આર્ચર પણ સામેલ છે.
ઈંગ્લેન્ડની ટીમનો કેપ્ટન ઈયોન મોર્ગન ખુદ આયર્લેન્ડનો છે અને તે આયર્લેન્ડની ટીમ તરફથી ૨૦૦૭નો વર્લ્ડકપ પણ રમી ચૂક્યો છે. ઓપનર જેશન રોય દક્ષિણ આફ્રિકાનો છે. ઈંગ્લેન્ડની ટીમ પહેલી વાર વર્લ્ડકપ જીતી છે. આજે અહીં નજર કરીએ ઈંગ્લેન્ડની ટીમમાં વિદેશી મૂળના ખેલાડી અને તેમણે વર્લ્ડકપમાં કરેલા પ્રદર્શન પર.
ઈયોન મોર્ગન (ડબલિન, આયર્લેન્ડ): ઈંગ્લેન્ડના કેપ્ટન ઈયોન મોર્ગને આયર્લેન્ડ તરફથી રમતા તા. ૫ ઓગસ્ટ, ૨૦૦૬ના રોજ સ્કોટલેન્ડ સામેની વન ડે મેચમાં ડેબ્યૂ કર્યું હતું. આયર્લેન્ડ તરફથી ડેબ્યૂનાં ત્રણ વર્ષ બાદ એટલે કે ૨૦૦૯ના ટી ૨૦ ક્રિકેટ વર્લ્ડકપમાં તેને ઈંગ્લેન્ડની ટીમમાં સ્થાન મળ્યું અને ત્યારથી મોર્ગન ઈંગ્લેન્ડ તરફથી રમી રહ્યો છે. આ વર્લ્ડકપમાં તેણે ૧૦ ઇંનિગ્સમાં ૩૭૧ રન બનાવ્યા.
જેશન રોય (ડર્બન, દક્ષિણ આફ્રિકા): દક્ષિણ આફ્રિકામાં જન્મેલો જેશન રોય જ્યારે ૧૦ વર્ષનો હતો ત્યારે તેનો પરિવાર ઈંગ્લેન્ડ આવી ગયો હતો. તે ઈંગ્લેન્ડમાંથી ફર્સ્ટક્લાસ ક્રિકેટ રમ્યો. જેસન રોયે ઈંગ્લેન્ડ તરફથી પહેલી વન ડે મે ૨૦૧૫માં રમી હતી. આ વર્લ્ડકપમાં તેણે સાત ઈંનિગ્સમાં ૪૪૩ રન ફટકાર્યા.
બેન સ્ટોક્સ (ક્રાઇસ્ટચર્ચ, ન્યૂઝીલેન્ડ): ન્યૂઝીલેન્ડમાં જન્મેલાે બેન સ્ટોક્સ જ્યારે ૧૨ વર્ષનો હતો ત્યારે તે ઈંગ્લેન્ડ આવી ગયો. અહીં તેણે સ્થાનિક ટીમ સાથે ક્રિકેટ રમવાનું શરૂકર્યું. તેણે ઓગસ્ટ ૨૦૧૧માં વન ડે ક્રિકેટમાં પદાર્પણ કર્યું હતું. આ વર્લ્ડકપમાં સ્ટોક્સે ૧૦ ઇિનંગ્સમાં ૪૬૫ રન ફટકારવા ઉપરાંત સાત વિકેટ પણ ઝડપી હતી.
જોફ્રા આર્ચર (બાર્બાડોસ, વિન્ડીઝ): ઈંગ્લેન્ડના ફાસ્ટ બોલર જોફ્રાનો જન્મ વિન્ડીઝના બાર્બાડોસમાં થયો હતો. તે વિન્ડીઝ તરફથી અંડર ૧૯ ક્રિકેટ રમી ચૂક્યો છે. જોફ્રાએ ૨૦૧૬માં પહેલી વાર ફર્સ્ટ ક્લાસ ક્રિકેટમાં ઈંગ્લેન્ડની સસેક્સ ટીમ તરફથી પાકિસ્તાન સામેની મેચ રમી. ત્રણ વર્ષ બાદ તા. ૩ મે, ૨૦૧૯ના તેણે આયર્લેન્ડ વિરુદ્ધ ઈંગ્લેન્ડ તરફથી રમતા વન ડેમાં ડેબ્યૂ કર્યું. આ વર્લ્ડકપમાં જોફ્રાએ ૧૧ મેચમાં ૨૦ વિકેટ ઝડપી.
મોઇન અલી (મીરપુર, પીઓકે): ઈંગ્લેન્ડનો સ્પિનર મોઇન અલી પાકિસ્તાની મૂળનો ખેલાડી છે. જોકે તેના દાદા મીરપુરથી બર્મિંગહમ આવી ગયા હતા અને મોઇનનો જન્મ પણ ઈંગ્લેન્ડમાં જ થયો. મોઇને ક્રિકેટર કરિયર શરૂઆત ઈંગ્લેન્ડથી જ કરી. આ વર્લ્ડકપમાં મોઇને પાંચ ઇનિંગ્સમાં ૭૫ રન બનાવવા ઉપરાંત પાંચ વિકેટ પણ ઝડપી.
આદિલ રાશિદ (મીરપુર, પીઓકે): મોઇનની જેમ આદિલ રાશિદ પણ પાકિસ્તાની મૂળનો છે. તેનો પરિવાર ૧૯૬૭માં મીરપુરથી ઈંગ્લેન્ડના બ્રેડફોર્ડ ખાતે આવી ગયો હતો. આ વર્લ્ડમાં તેણે ૧૧ મેચમાં ૧૧ વિકેટ ઝડપી.
જીત બાદ ન્યૂઝીલેન્ડના ‘વિભીષણ’ સ્ટોક્સે પોતાના દેશની માફી માગી
ક્રિકેટના ઇતિહાસમાં વર્લ્ડકપની આવી ફાઇનલ હવે કદાચ જ જોવા મળી શકે. ગઈ કાલે અંતિમ ઓવરમાં ઈંગ્લેન્ડને જીત માટે ૧૫ રનની જરૂર હતી. છેલ્લી ઓવરના ચોથા બોલને સ્ટોક્સે મિડવિકેટ બાઉન્ડ્રી તરફ ધકેલ્યો અને બે રન માટે દોડી પડ્યો. તેણે પોતાની ક્રીઝમાં પહોંચવા માટે છલાંગ લગાવી દીધી. એ સમયે માર્ટિન ગપ્ટિલનો થ્રો સ્ટોક્સના બેટને અથડાઈને બાઉન્ડ્રી લાઇનને પાર થઈ ગયો. સ્ટોક્સ અને ઈંગ્લેન્ડને કુલ છ રન મળી ગયા. આ અંગે ન્યૂઝીલેન્ડના ક્રાઇસ્ટચર્ચમાં જન્મેલા બેન સ્ટોક્સે ન્યૂઝીલેન્ડ ટીમની માફી માગતાં કહ્યું, ''અંતિમ ઓવરમાં હોલ મારા બેટ સાથે અથડાઈને બાઉન્ડ્રીની બહાર ચાલ્યો ગયો. તમે એવું વિચાર્યું હોય. મેં કેન વિલિયમ્સન સાથે આ અંગે વાત કરીને માફી માગી લીધી છે. હું એવું કરવા ઇચ્છતો નહોતો.''