એક તરફ ઇલેક્ટ્રીક વાહનોની ખરીદી માટે પ્રોત્સાહન આપવામાં આવે તો બીજી તરફ કામગીરીને નામે તંત્રની પાછી પાની કેમ ?
AMC ચાર્જિગ સ્ટેશનની જાળવણીમાં નિષ્ફળ
એક જ વર્ષમાં ચાર્જિગ સ્ટેશન બિસ્માર હાલતમાં
કાંકરિયા ખાતે બનાવેલ ચાર્જિગ સ્ટેશનની બિસ્માર હાલત
પેટ્રોલ ડીઝલના ભાવમાં વધારો તથા પર્યાવરણની જાળવણીને લઇને જાગૃત નાગરિકો ઇલેક્ટ્રીક વાહનો તરફ વળ્યા છે. પ્રદૂષણને કંટ્રોલ કરવા માટે ઇલેક્ટ્રીક વ્હિકલને પ્રોત્સાહન આપી રહ્યા છે તે વચ્ચે અમદાવાદ મ્યુનિસિપલ કોર્પોરેશન ક્યાંક બેદરકારી દાખવતું હોવાનું સાબિત થયુ છે. અમદાવાદમાં ચાર્જિંગ સ્ટેશનની જાળવણીમાં AMC નિષ્ફળ પુરવાર થયુ છે.
ચાર્જિંગ સ્ટેશન બિસ્માર હાલતમાં
અમદાવાદ મ્યુનિસિપલ કોર્પોરેશન દ્વારા કાંકરિયા ખાતે ઇલેક્ટ્રીક વ્હિકલના ચાર્જિંગ સ્ટેશન બનાવ્યા છે. પરંતુ અહીં આવનાર વાહનચાલકોએ ધક્કો ખાવાનો વારો આવે છે. કારણ કે ચાર્જિંગ સ્ટેશન અહીં ઉભા કરવામાં આવ્યે એક વર્ષ થયુ પરંતુ આજદિન સુધી બંધ હાલતમાં જ છે. વીટીવી ન્યૂઝ દ્વારા આ અંગે સ્થળ તપાસ કરવામાં આવી હતી જેમાં ચાર્જિંગ સ્ટેશન ધૂળ ખાતી હાલતમાં નજરે પડ્યુ હતું. એક તરફ કેન્દ્ર અને રાજ્ય સરકાર પ્રદૂષણનું પ્રમાણ ઘટાડવા માટે ઇલેક્ટ્રીક વાહનોમાં સબસીડી આપે છે તો આ તરફ તંત્રને આ અંગેની કામગીરીમાં કોઇ રસ ન હોય તેમ લાગી રહ્યું છે. તંત્ર દ્વારા મોટા ઉપાડે પ્રોજેક્ટની શરુઆત કરવામાં આવે છે, ટેન્ડર બહાર પાડવામાં આવે છે પરંતુ પ્રોજેક્ટ શરુ થયા બાદ તેનુ મેન્ટેનન્સ કરવામાં તંત્રની ઢીલી નીતિ સ્પષ્ટ થાયછે. શરમની વાત છે- શહેઝાદ ખાન
તો AMCના વિપક્ષના નેતા શહેજાદ ખાને આ અંગે નિવેદન આપતા જણાવ્યું હતું કે AMCનું 2022ના બજેટનો એજન્ડા હતો કે આ વર્ષે અમદાવાદને પોલ્યુશન ફ્રી સિટી બનાવવામાં આવશે.ઇલેકટ્રીક વાહનોને પ્રોત્સાહન આપવામાં આવ્યુ પરંતુ AMC દ્વારા પ્રોજેક્ટની જાહેરાત કરવામાં આવે છે પરંતુ યોજનાઓનું ઇમ્પ્લિમેન્ટ થતુ નથી જે ઘણી શરમની વાત છે.
ચાર્જિંગ સ્ટેશન પર જામ્યા ધૂળના થર
એક તરફ પોલ્યુશન ફ્રી સીટી બનાવવાની વાતો કરવામાં આવે છે. સરકાર અને તંત્ર દ્વારા ઇલેક્ટ્રીક વાહનો વધુ ખરીદે તે માટેના પ્રયાસો કરવામાં આવી રહ્યા છે. લોકો પણ પર્યાવરણને ધ્યાને રાખીને ઇલેક્ટ્રીક વાહનો ખરીદવા પ્રેરાયા છે. પરંતુ જો ચાર્જિંગ સ્ટેશનની જ આવી ખસ્તા હાલત છે તો વાહન ખરીદીને ચાર્જિંગ કરવા જનતા જશે ક્યાં ? ચાર્જિંગ સ્ટેશન પર રીતસર ધૂળના થર જામ્યા છે. પ્રજાના પૈસે તંત્ર દ્વારા નવી યોજનાઓ અને પ્રોજેક્ટ શરુ તો કરવામાં આવે છે પરંતુ જ્યારે અમલીકરણની વાત આવે ત્યારે તંત્રની ઘોર લાપરવાહી સ્પષ્ટ થાયછે.
સળગતા સવાલ
રાજ્ય સરકારની પોલિસીની લઇને AMC કેમ ગંભીર નથી?
AMC ઇલેક્ટ્રીક વાહનને લઇને નકારાત્મક કેમ છે?
શું આવી રીતે AMC ઇલેક્ટ્રીક વાહનોના ઉપયોગ માટે શહેરીજનોને પ્રોત્સાહિત કરશે?
AMCને માત્ર પ્રોજેક્ટ લોન્ચ કરવામાં કે ટેન્ડર બહાર પાડવામાં જ કેમ રસ છે?
કેન્દ્ર અને રાજ્ય સરકારના ડ્રીમ પ્રોજેક્ટને લઇને AMC કેમ ગંભીર નથી?
શું અમદાવાદના અનેક પ્રોજેક્ટ નિષ્ફળ થવા માટે AMC જવાબદાર છે?
ચાર્જિગ સ્ટેશનની જ વ્યવસ્થા નહીં હોય તો શહેરીજનો ઇલેક્ટ્રીક વાહન કેમ ખરીદશે?
કઇ એજન્સી પાસે ચાર્જિગ સ્ટેશનની જાળવણીનો કોન્ટ્રાક્ટ છે?