રાજનીતિ / નીતિન પટેલે ધાનાણીને ટોણો માર્યો, તો ધાનાણીએ કહી નાખ્યું 'મૂંઝાશો નહીં મારો તમને ટેકો'

• નાયબ મુખ્યમંત્રી નીતિન પટેલના 'હું એકલા'નો મુદ્દે ગૃહમાં ગુંજ્યો હતો
• પરેશ ધાનાણીનો વળતો નીતિન પટેલ પર પ્રહાર
• નીતિન પટેલ વિવાદ મુદ્દે જીતુ વાઘાણીની પ્રતિક્રિયા

ટોણો મારતા નીતિન પટેલે કહ્યું હતું કે એક નેતા તો જવાબ આપવા માટે ગૃહમાં દેખાતા નથી. માત્ર ટેબલેટ મુદ્દે કોઈએ આપેલા કાગળિયા વાંચીને આપી જાય છે. નીતિન પટેલે કહ્યું હતું કે, બધા મારા વિશે વાત કરે છે તે બદલ આભાર. 

હું તમને ટેકો આપવા આવ્યો છુંઃ પરેશ ધાનાણી

ત્યારબાદ પરેશ ધાનાણીનો નીતિન પટેલને વળતો જવાબ આપ્યો હતો. પરેશ ધાનાણીએ કહ્યું હતું કે નીતિનભાઈ તમે મુંજાતા નહિ. કોંગ્રેસ હંમેશા તમારી સાથે છે. હું તમને ટેકો આપવા આવ્યો છું.

સમગ્ર મોવડી મંડળ નીતિન પટેલની સાથેઃ ભૂપેન્દ્રસિંહ

સામસામે પ્રહાર થતાં ભાજપના અન્ય નેતાઓ પણ નીતિન પટેલના બચાવમાં મેદાને ઉતર્યા હતા. ભૂપેન્દ્રસિંહે કહ્યું હતું કે, સમગ્ર મોવડી મંડળ નીતિન પટેલની સાથે છે.

નીતિન પટેલ વિવાદ મુદ્દે જીતુ વાઘાણીની પ્રતિક્રિયા

જીતુ વાઘાણીએ કહ્યું હતું કે વિશ્વ ઉમિયા ધામના પ્રોગ્રામમાં હું પણ હાજર હતો. નીતિન પટેલની આખી વાત અલગ હતી. વિપક્ષનાં લોકો આકારણ મુદ્દો ઉભો કરે છે. નીતિન પટેલ ફંડ ભેગું કરવા સંદર્ભે મીટીંગની વાત કરી રહ્યા હતા. નીતિન ભાઇને સલાહ આપવીની જગ્યાએ કોંગ્રેસ પોતાનું ઘર સંભાળે. નીતિનભાઇએ માત્ર ભાજપ વતી વાત કરી હતી એટલે કોંગ્રેસે હરખાવાની કોઇ જરૂર નથી. વધુમાં વાઘાણીએ કહ્યું હતું કે, બહુ ઉછળકૂદ કરવાની જરૂર નથી. હજુ પણ તમારે રાહ જ જોવાની છે. વિપક્ષ જે રીતે બોલે છે તે યોગ્ય નથી. 

ક્યાંથી શરૂ થયો વિવાદ?

મહત્વનું છે કે, નાયબ મુખ્યમંત્રી નીતિન પટેલના 'હું એકલા'નો મુદ્દે ગૃહમાં ગુંજ્યો હતો. આ મામલે કોંગ્રેસ કહ્યું હતું કે, નીતિનભાઈ તમે એકલા નથી. કોંગ્રેસના ધારાસભ્ય વીરજી ઠુમ્મરે મજાક કરતા કહ્યુ કે, નીતિનભાઈ તમે મુખ્યમંત્રી બનો, કોંગ્રેસ તમારી સાથે છે. છેલ્લા ઘણા સમયથી થઈ રહેલી અવગણાને લઈને ઉમિયા ધામના કાર્યક્રમમાં નીતિન પટેલે કહ્યું હતુ કે, મને એકલો પાડવાનો ઘણો પ્રયાસ થાય છે, પરંતુ સમય આવે હું યાદ આવી જ જાઉ છું. હું જ્યાં છું ત્યાં એમ જ નહીં પહોંચાતું. તમે ટીવીમાં અને છાપામાં જોતા જ હશો કે એકબાજુ બધા અને એકબાજુ હું એકલો છું. નીતિન પટેલના આ નિવેદન પર કોંગ્રેસે પ્રતિક્રિયા આપવાનું શરૂ કર્યું છે.