આ વર્ષે યોજાઈ રહેલી IPLના મુખ્ય સ્પોન્સર તરીકે ચાઈનીઝ કંપની Vivoએ પોતાનું નામ પાછું ખેંચી લીધા બાદ ફેન્ટસી સ્પોર્ટ્સ એપ Dream 11 IPLના મુખ્ય સ્પોન્સર બન્યા છે અને આ ભારતીય કંપનીએ IPL 2020માં તોતિંગ 222 કરોડનું રોકાણ કર્યું છે. 2008માં ચાલુ થયેલી આ કંપની અત્યારે ભારતના યુનિકોર્ન સ્ટાર્ટઅપ્સમાંથી એક છે અર્થાત તેમની કંપનીનું વેલ્યુએશન 1 અબજ ડોલર એટલે કે 7500 કરોડ રૂપિયાથી પણ વધારે છે.
કોણ છે આ બે યુવકો?
2008ની વૈશ્વિક મંદીના સમયે શરુ થયેલી Dream 11 એપના અત્યારે 60 લાખથી વધુ વપરાશકર્તાઓ ધરાવે છે. આ કંપનીના યુવા સ્થાપકો હર્ષ જૈન અને ભાવિત શેઠે અમેરિકામાં તેમની MBA ડિગ્રી પૂર્ણ થાય તે પહેલા જ આ કંપનીની શરૂઆત કરી દીધી હતી. હર્ષ જૈન જાણીતા ઉદ્યોગપતિ અને ભારતીય ધનિક આનંદ જૈનના પુત્ર છે. આનંદ જૈન મુકેશ અંબાણીના ખૂબ અંગત મિત્ર માનવામાં આવે છે. જો કે તેમના પિતાની કોઈ નાણાંકીય મદદ વગર જ આ બંને એન્ટરપ્રેન્યોર્સે તેમની કંપનીને એ સ્તરે પહોંચાડી દીધી કે અત્યારે તેઓ ICC અને BCCIના ઓફિશ્યલ પાર્ટનર્સ છે.
કેવી રીતે શરુ થઇ Dream 11 એપ?
હર્ષ અને ભાવિત બંને ફૂટબોલના ખૂબ શોખીન હતા. તેઓએ નોંધ્યું કે પશ્ચિમના દેશોમાં ફેન્ટસી ફૂટબોલ નામનો એક કન્સેપ્ટ લોકપ્રિય છે જ્યાં ફેન્સ તેમની પોતાની અલગ અલગ ખેલાડીઓની એક ડ્રિમ ટીમ મોબાઈલ એપમાં બનાવે છે અને સીઝનના અંતે જે ટીમના ખેલાડીઓએ વાસ્તવિક રમતમાં સૌથી વધુ પોઈન્ટ્સ મેળવ્યા હોય તે ટીમ બનાવનાર વ્યક્તિ વિજેતા બને છે. વિજેતા વ્યક્તિ પૈસા પણ જીતે છે. તેઓએ આ જ ફેન્ટસી ગેમનો કન્સેપટ ભારતમાં લાવીને ફેન્ટસી ક્રિકેટની શરૂઆત કરી. IPLની સાથે Dream 11ને ખૂબ વેગ મળ્યો અને આજે Dream 11માં ફક્ત ક્રિકેટ જ નહીં પણ ફૂટબોલ, બાસ્કેટ બોલ, કબડ્ડી, હોકી જેવી રમતો ઉપર પણ ફેન્ટસી ટીમ બનાવવાની સુવિધા આપવામાં આવે છે.
ચીનની ટેન્સેન્ટ ટેક્નોલોજીએ 10% ઇન્વેસ્ટ કર્યું છે
Dream 11 કંપનીમાં ઘણી કંપનીઓએ વિશ્વાસ દાખવીને ઈન્વેસ્ટમેન્ટ કર્યું છે જેમાં ચીનની ટેન્સેન્ટ ટેક્નોલોજીનો પણ સમાવેશ થાય છે જેમણે Dream 11નો 10% જેટલો હિસ્સો ખરીદેલો છે. કંપનીનો બ્રાન્ડ એમ્બેસેડર મહેન્દ્ર સિંહ ધોની છે. Dream 11 સામે કાયદાકીય પ્રશ્નો ઉભા થયા હતા જેમાં ભારતીય હાઇકોર્ટે ચુકાદો આપ્યો હતો કે આ જુગાર નહીં પણ એક સ્કિલ ગેમ છે જેથી તેને કાયદાકીય રીતે માન્યતા આપવામાં આવી હતી.
Dream 11નો મુખ્ય હેતુ સ્પોર્ટ્સને વધુ રોચક બનાવવાનો છે
હર્ષ જૈન જણાવે છે કે Dream 11નો મુખ્ય હેતુ સ્પોર્ટ્સને વધુ રોચક બનાવવાનો છે. તેઓ કહે છે કે જયારે પણ કોઈ પણ રમતના પરિણામને આધારે તમે રૂપિયા જીતવાના કે હારવાનો હોવ ત્યારે તે રમત નિહાળવી વધુ રોમાંચક બની જાય છે. Dream 11 પોતાની આ કંપની ઉપરાંત એક ફાઉન્ડેશન ચલાવે છે જેમાં તેમણે ભારતમાં ઉભરતા ટેલેન્ટેડ ખેલાડીઓની તાલીમ અને કરિયર માટે 3 કરોડ રૂપિયાની ફાળવણી કરી છે.