અમદાવાદ / VIDEO: સિવિલના કેમ્પસમાં રેસિડેન્ટ ડૉક્ટર્સની ધૂમ DJ ધમાલ, સત્તાધીશોએ કહ્યું હજુ બીજા 2 દિવસ કરીશું

• સિવિલના કેમ્પસમાં રેસિડેન્ટ તબીબોએ DJ પાર્ટી યોજાતા વિવાદ
• DJના કારણે સિવિલના દર્દીઓએ ભારે હાલાંકીનો સામનો કરવો પડ્યો
• હજુ પણ બે દિવસ સુધી કોન્સર્ટ યોજાશે

અમદાવાદ સિવિલ હોસ્પિટલના કેમ્પસમાં DJ પાર્ટી યોજાતા મોટો વિવાદ સર્જાયો છે. અમદાવાદ સિવિલ હોસ્પિટલમાં ડી.જે પાર્ટીનું આયોજન કરી મોટા પાયે ધ્વનિ પ્રદૂષણ કરીને રેસિડન્ટ તબીબોએ મોટો વિવાદ ઉભો કરી દીધો છે. મોટા પાયે ડી.જે પાર્ટીનું આયોજન કરીને તબીબો ડી.જેના તાલે ઝૂમ્યા હતા. જો કે, DJ પાર્ટીના કારણે સિવિલના દર્દીઓને ભારે હાલાંકીનો સામનો કરવો પડ્યો હતો. વારંવાર પોતાની તકલીફો અને માંગોને લઇને હડતાળ પર ઉતરી આરોગ્ય સેવા ખોરવતા તબીબો અને સિવિલ તંત્રએ આ DJ પાર્ટીનું આયોજન કરીને દર્દીઓની સમસ્યાને નજરઅંદાજ કરી હતી. હાલમાં દર્દીઓ તથા તેમના પરિવારજનોમાં પણ આ ઘટનાને લઇને ભારે આક્રોશ જોવા મળી રહ્યો છે. એવામાં તંત્ર આ બેદરકાર તબીબો સામે પગલાં લેશે કે નહીં તે હવે જોવું રહ્યું?

મારી પર કોઇ પણ પ્રકારનો ફોન પણ નથી આવ્યો: ડીન

વધુમાં તમને જણાવી દઇએ કે, સિવિલ કેમ્પસમાં આ કાર્યક્રમનું 4થી 5 દિવસ સુધી ચાલે તે પ્રકારનું આયોજન કરવામાં આવ્યું હતું. ત્યારે હજુ પણ બે દિવસ સુધી અહીં કોન્સર્ટ યોજાશે. આથી આ કોન્સર્ટના કારણે દર્દીઓને ચોક્કસથી હાલાંકી પડે તેવી શક્યતા સેવાઇ રહી છે. આ મામલે ડીનનું કહેવું છે કે, પોલીસની પરમિશન વિના આ કોન્સર્ટ નથી યોજવામાં આવી. પરંતુ BJMCનો જે આ કાર્યક્રમ છે તેના કારણે ચોક્કસથી દર્દીઓને હાલાંકી પડી રહી છે. આ જ કેમ્પસની બાજુમાં યુ.એન મહેતા હોસ્પિટલ આવેલી છે, કિડની હોસ્પિટલ આવેલી છે. તમને જણાવી દઇએ કે, અહીં લગભગ 2 હજારથી વધારે દર્દીઓ સારવાર લેતા હોય છે. પરંતુ ડીનનું કહેવું છે કે, કોઇ પણ દર્દીને આ DJ પાર્ટી દ્વારા હાલાંકી નથી થઇ. મારી પર કોઇ પણ પ્રકારનો ફોન પણ નથી આવ્યો તેમજ પોલીસ પરમિશન લઇને જ આ પ્રકારનો કાર્યક્રમ યોજવામાં આવ્યો છે. એટલે કે આ મામલે ડીન પણ ક્યાંક આંખ આડા કાન કરી રહ્યાં હોય તેવું લાગી રહ્યું છે.

આ કાર્યક્રમમાં ખુદ આરોગ્ય મંત્રી પણ હાજર રહ્યાં હતાં

વિશેષમાં તમને જણાવી દઇએ કે, આ કાર્યક્રમમાં આરોગ્ય મંત્રી ઋષિકેશ મંત્રી, મંત્રી પ્રદિપ પરમાર તેમજ પ્રદિપસિંહ જાડેજા પણ હાજર રહ્યાં હતાં. હજુ પણ બે દિવસ આ કોન્સર્ટ યોજાશે કે જેમાં દર્દીઓને ભારે હાલાંકી પડે તેવી શક્યતા રહેલી છે. એક તરફ રાજ્યમાં કોરોનાના કેસો વધી રહ્યાં છે, એમાંય સૌથી વધારે કેસ અમદાવાદમાં જ નોંધાતા હોય છે ત્યારે કોરોનાનું સંક્રમણ વધતી વેળાએ તબીબો દ્વારા જ આ રીતે કોન્સર્ટનું આયોજન કરવું તે કેટલું યોગ્ય?

મહત્વનું છે કે, પોતાની પડતર માંગોને લઇને અનેકવાર હડતાળ પર ઉતરી જતા તબીબોને DJ પાર્ટી યોજતી વખતે દર્દીઓના સ્વાસ્થ્યની ચિંતા કેમ ના થઇ. અહીં સિવિલ કેમ્પસમાં DJ પાર્ટી જોતા અનેક સવાલો પણ ઉભા થાય છે જેવાં કે, તબીબ જ દર્દીઓની સમસ્યા નહીં સમજી શકે તો કોણ સમજશે? સિવિલમાં જ દર્દીઓને હાલાંકી પડશે તો દર્દી આખરે જશે ક્યાં? બેફામ તબીબો સામે તંત્ર ક્યારે પગલાં લેશે? આ બેફામ તબીબોને ડી.જે પાર્ટીની મંજૂરી કોણે આપી? શું સિવિલ હોસ્પિટલના તંત્રએ આ DJ પાર્ટીને મંજૂરી આપી છે? વારંવાર પોતાની માંગોને લઇને હડતાળ પર ઉતરતા તબીબો આટલાં બેદરકાર કેમ? બેદરકાર તંત્ર, બેદરકાર તબીબો વચ્ચે દર્દીઓની સુરક્ષા કોણ કરશે?

સળગતા સવાલો

• અમદાવાદ સિવિલના તબીબો અસંવેદનશીલ કેમ?
• તબીબ દર્દીઓની સમસ્યા નહીં સમજી શકે તો કોણ સમજશે?
• સિવિલમાં જ દર્દીઓને હાલાકી પડશે તો દર્દી આખરે જશે ક્યાં?
• બેફામ તબીબો સામે તંત્ર ક્યારે પગલાં લેશે?
• આ બેફામ તબીબોને ડી.જે પાર્ટીની મંજૂરી કોણે આપી?
• શું સિવિલ હોસ્પિટલના તંત્રએ આ ડી.જે પાર્ટીને મંજૂરી આપી છે?
• વારંવાર પોતાની માંગોને લઇને હડતાળ પર ઉતરતા તબીબો આટલા બેદરકાર કેમ?
• બેદરકાર તંત્ર, બેદરકાર તબીબો વચ્ચે દર્દીઓની સુરક્ષા કોણ કરશે?
• કોરોનાના કેસો વધી રહ્યાં છે ને બીજી બાજુ તબીબો દ્વારા કોન્સર્ટ યોજવી તે કેટલું યોગ્ય?