રાજ્યનાં અનેક જિલ્લામાં પાણીની સમસ્યા છે. લોકો પાણી માટે તકલીફો વેઠી રહ્યાં છે. રઝળપાટ કરી રહ્યાં છે. પરંતુ એક એવો પણ જિલ્લો છે. જ્યાંનાં જળાશયોમાં પાણી મબલક છે. છતાં લોકો પાણી માટે વલખાં મારે છે. લોકોની સમસ્યા ઘટવાની જગ્યાએ વધતી જઈ રહી છે. જાણે છતાં પાણીએ દુષ્કાળની સ્થિતિ ઊભી થઈ છે. ત્યારે કેવી છે જિલ્લાનાં જળાશયોની સ્થિતિ અને કેવો છે તંત્રની અણઆવડતનો નમૂનો તે જોઇએ અહીં અહેવાલમાં.
તાપમાનનો પારો 44 ડીગ્રી પાર પહોંચી જાય અને તમને કોઈ અગન જ્વાળામાં બેસવાનું કહે તો...? તમે ક્યાકેય નહીં બેસો. પરંતુ જુઓ અહીં કુદરતનાં પ્રકોપ વચ્ચે પણ લોકો રામધૂન બોલાવી રહ્યાં છે. મુખમાં તો રામનું નામ છે પરંતુ ચહેરા પર ગુસ્સો છે. કુદરતની જ્વાળા કરતા પણ તેમની અંદર જે જ્વાળા ભભુકી રહી છે. તેનું આંકલન કદાચ ન પણ લગાવી શકાય. અહીં વાત થાય છે અરવલ્લી જિલ્લાની કે જ્યાં પીવાનાં પાણીની સતત વધતી જતી સમસ્યાથી લોકો ત્રાહિમામ પોકારી ગયાં છે.
એક બેડાં પાણી માટે મહિલાઓ-બાળકો અને વૃદ્ધોને અનેક કિલોમીટર સુધી રઝળપાટ કરવી પડી રહી છે. છતાં પાણી મળે તેની કોઈ ગેરંટી નથી. એવું નથી કે જિલ્લાનાં જળાશયો ખાલીખમ છે. જળાશયોમાં પાણી ભરપૂર છે પરંતુ અણઘડ તંત્રનાં કારણે લોકોને પાણી નથી મળી રહ્યું જેનાં કારણે રઝળપાટ કરવાનો વારો આવ્યો છે.
છતાં પાણીએ દુષ્કાળ જેવી સ્થિતિ છે. ત્યારે જિલ્લાનાં ડેમની સ્થિતિ પર નજર કરવામાં આવે તો. શિયાળુ પાક માટે પાણી આપ્યાં બાદ હાલ વાત્રક ડેમમાં 25.52 ઘન મીટર જેટલું પાણી છે. જ્યારે માજુમ ડેમમાં 19.60 ઘન મીટર પાણીનો જથ્થો છે. તો જ્યારે મેશ્વો ડેમમાં 26.60 ઘન મીટર એટલે કે, 49.50 ટકા પાણીનો જથ્થો છે. આ પાણીનો જથ્થો એટલો છે કે, ઉનાળા બાદ પણ અનેક મહિનાઓ સુધી પીવા માટે ચાલી શકે તેમ છે પરંતુ તંત્રનાં કારણે આજે લોકો પાણી માટે ટળવળી રહ્યાં છે.
અહીં તંત્ર જ પાણીનો જથ્થો પુરતો હોવાનાં દાવા કરી રહ્યું છે. બીજી તરફ જિલ્લાનાં અનેક ગામડાઓ પાણીની બુમરાણ મચાવી રહ્યાં છે. પાણી માટે પારાયણ કરી રહ્યાં છે. અધિકારીઓ અને સ્થાનિકોનાં મતે ડેમોમાં પાણી પુરતા પ્રમાણમાં છે. તો પછી સવાલ એ થાય છે કે, શા માટે લોકોને પાણી નથી મળી રહ્યું. લોકો કેમ પાણી માટે વિરોધ કરવા મજબૂર બન્યાં છે. આ પાછળ માત્રને માત્ર એક જ કારણ જવાબદાર છે તંત્રની અણઆવડત. ત્યારે આશા રાખીએ કે, સરકાર આ દિશામાં થોડું ધ્યાન આપે. જેથી પાણી માટે રઝળપાટ કરતા લોકોને પીવા માટે અને પોતાનાં પશુધન માટે પુરતું પાણી મળી રહે.