દેશનાં 2 મોટા વ્યાવસાયિક શહેરો અમદાવાદ અને મુંબઈને હાઈસ્પીડ રેલ્વે નેટવર્કથી જોડવાની યોજનાને આગળ વધાર્યા બાદ હવે દિલ્હી-અમદાવાદ વચ્ચેની બુલેટ ટ્રેન પણ પ્લાનિંગમાં છે. આ ટ્રેન શરૂ થતાં સૌથી વધુ ફાયદો રાજસ્થાનને થશે.
દિલ્હી-અમદાવાદ વચ્ચેની બુલેટ ટ્રેન થશે શરૂ
રાજસ્થાનનાં 7 જિલ્લાઓમાંથી પસાર થશે ટ્રેન
રાજસ્થાનને પણ થશે અનેક ફાયદાઓ
કેન્દ્ર સરકાર હાઈસ્પીડ રેલ્વે નેટવર્ક પ્રોજેક્ટ અંતર્ગત અમદાવાદ-મુંબઈનાં બુલેટ ટ્રેન બાદ હવે અમદાવાદ-દિલ્હી માટે પણ ટ્રેન શરૂ કરવાની તૈયારીમાં છે. આ ટ્રેન રાજસ્થાનમાંથી પસાર થશે જેના લીધે રાજસ્થાનનાં લોકો પણ બુલેટ ટ્રેનની સવારી કરી શકશે. પ્રસ્તાવિત દિલ્હી-અમદાવાદ બુલેટ ટ્રેનનો મોટો ભાગ રાજસ્થાનમાંથી પસાર થશે. રાજસ્થાનનાં 7 જિલ્લાઓમાંથી આ ટ્રેન પસાર થવાની છે. તેના માટે ખાસ 9 સ્ટેશન પણ બનાવવામાં આવશે.
657 કિ.મીનો ટ્રેક રાજસ્થાનથી થશે પસાર
માહિતી અનુસાર દિલ્હી-અમદાવાદ રેલ યોજનાની કુલ લંબાઈ આશરે 875 કિલોમીટર રહેશે. તેમાંથી 657 કિલોમીટરનો ટ્રેક રાજસ્થાનથી પસાર થશે. તેનાથી રાજસ્થાનને અનેક લાભ મળી શકે છે. અત્યારસુધીની યોજના અનુસાર દિલ્હી-અમદાવાદ બુલેટ ટ્રેન રાજસ્થાનની રાજધાની જયપુરની સાથે અલવર, અજમેર, ભીલવાડા, ચિતૌડગઢ, ઉદયપુર અને ડુંગરપુરથી પસાર થશે.
રાજસ્થાનમાં ખાસ 9 સ્ટેશન બનશે
રાજસ્થાનમાં બુલેટ ટ્રેનનાં સ્ટોપ માટે બેહરોર, શાહજહાંપુર, વિજયનગર, અજમેર, ભીલવાડા, ચિતૌડગઢ, ઉદયપુર અને ડુંગરપુરમાં ખાસ સ્ટેશન બનાવવામાં આવશે. ઉદયપુરમાં તો બુલેટ ટ્રેન માટે 127 કિ.મી સુધી માટે ખાસ પટરી બેસાડવામાં આવશે. નેશનલ હાઈસ્પીડ રેલ કૉર્પોરેશનનાં અધિકારીએ આ મુદા માટેનો પ્રોજેક્ટ પણ તૈયાર કર્યો છે.
દેશભરમાં હાઈસ્પીડ રેલ નેટવર્ક
કેન્દ્ર સરકાર દેશભરમાં હાઈસ્પીડ રેલ નેટવર્ક ફેલાવવામાં લાગ્યું છે જેથી ટ્રાફિકને સરળ અને ઝડપી બનાવવામાં આવે. અમદાવાદને મુંબઈ સાથે જોડતી પહેલી બુલેટ ટ્રેનનું પણ કામ ચાલી જ રહ્યું છે. અમદાવાદથી દિલ્હી, અમદાવાદથી મુંબઈની સાથે વારાણસી-હાવડાની વચ્ચે પણ સંભવત: ટ્રેન ચલાવવાની યોજના છે.